Stap Manejem Ol samting We Oli Impoten: Sharlene Miner

Wanem we i moa impoten long mi hem i blong stap lavem God mo stap lavem ol narafala man. Presiden Benson i talem se taem yumi putum God fastaem, evri samting bae i foldaon long stret ples blong hem. Trutok long saed ia hem i we yumi evriwan i stap long ol defren situesen. Sam long yumi i sapotem ol famli blong yumi, sam long yumi oli singgel, sam long yumi oli stap olgetawan nomo, mo sam long yumi oli responsibol long ol famli aotsaed long hemia blong olgeta. Wanem we mi bin lanem se sapos yumi putum God fastaem, bae evri samting oli foldaon stret long ples blong hem. Presiden Oaks i talem, “Ol samting we oli moa impoten yumi save luksave long hao yumi yusum taem blong yumi.” So mi luk se taem mi yusum gud taem blong mi, mi kam blong luk moa klia sapos laef blong mi i wok stret wetem ol samting we i moa impoten long mi.

Mi mi wan imejensi dokta, mo mi lukaotem olgeta we oli kam long hospital we oli sik o harem nogud o oli paralaes o lusum wan we oli lavem long wan nogud aksiden. Ol fas gol blong mi hem i blong lavem God mo lavem ol narafala man. Mekem se blong wan sot taem, mi mas bildim wan rilesensip blong tras mo mi mas helpem ol nara pipol oli filim lav blong God. Taem mi go long wok, mi no tingting olsem, “Hao nao mi save mekem gud moa long karia blong mi long semtaem we mi stap wok tedei?” Prea blong mi evri dei bifo mi go wok hem i, “Hao nao mi save helpem ol sik man we mi lukaotem blong filim lav blong Jisas Kraes?” Hem i impoten tumas tu se taem pipol i aot long imejensi dipatmen afta we oli luk mi, se oli filim lav blong Jisas Kraes. Mi no stret gud evriwan, be bae mi talem long yu se evri taem we mi go wok, evri taem mi girap long moning, evri taem we mi mekem wan samting wetem ol pikinini blong mi, hem i prea blong mi, se oli save filim lav blong Papa long Heven tru long mi.

Mi testifae se Papa long Heven i lavem yu. Hem i lavem wanwan long ol pikinini blong Hem. Mi testifae tu se taem yumi tingting blong serem lav blong Jisas Kraes wetem ol narafala man, bae ol wanwan hat blong yumi i fulap. Bae yumi fulap wetem laef blong Jisas Kraes, mo bae oli save kam blong filim lav blong Hem tru long yumi.