Ko Hono Maʻu ha Mālohi mo ha Fiemālie ʻia Sīsū Kalaisí: Hena Mila

Naʻá ku maʻu ʻa e telefoni mei hoku tokouá ʻoku fiemaʻu ke u foki ki ʻapi ke sio ki heʻeku tangataʻeikí kimuʻa peá ne mālōloó. Ne feilaulau homau fāmilí ʻi he ʻaho ko iá ki ha mana, pea ʻi he ʻosi pē hono vete ʻemau feilaulaú, ne mau lea fakamāvae ki heʻeku tangataʻeikí, peá ne mālōlō leva. Pea naʻa mo e mōmeniti ko iá, ne u ʻiloʻi ko e maná ʻa ʻene maʻu ha fakafiemālie mei heʻene fokoutua fakamatelié mo e ngaahi faingataʻaʻiá. ʻOku ou fakakaukau ki he mamahi naʻá ne ʻomi ki homau fāmilí. Ka naʻe vave ʻaupito hono ʻomi ʻe he ʻEikí ha fakafiemālie kiate kimautolú. Taimi lahi naʻe faʻa ʻomi ʻe he ngaahi kaungāmeʻa mo e fāmili ʻofeiná ha fakafiemālie ʻi he lolotonga ʻo e taimi mātuʻaki faingataʻa ko ia kiate kimautolú.

Pea ʻi heʻeku fakakaukau ki he aʻusia ko ʻení, naʻá ku ako ha potufolofola ʻi he Tohi ʻa Molomoná. Ko e Ngaahi Lea ʻa Molomoná, veesi 17 mo e 18, ʻoku talanoa fekauʻaki mo e Tuʻi ko Penisimaní, ʻa ia ʻokú ne maʻu ʻa e ngāue faingataʻa ʻo hono fakamelino ha sosaietí. Pea ʻoku ou saiʻia ʻi hono fakaleá. ʻOku pehē ai, “ko e tuʻi ko Penisimaní ko ha tangata māʻoniʻoni ia, pea naʻá ne pule ki hono kakaí ʻi he māʻoniʻoni; pea naʻe ʻi ai ha kau tangata māʻoniʻoni tokolahi ʻi he fonuá.” Pea toki pehē kimui ange, “ʻI he tokoni ʻa kinautolu ní, naʻe toe langa hake ʻe he Tuʻi ko Penisimaní ʻa e melinó ʻi he fonuá, ʻo ne ngāue ʻaki hono tūkuingata ʻo hono sinó mo e mālohi ʻo hono laumālié kotoa, kae ʻumaʻā foki ʻa e kau palōfitá, peá ne toe fokotuʻu ai ʻa e melinó ʻi he fonuá.”

Pea ʻoku ou fakakaukau ki he kupuʻi lea “ʻi he tokoni ʻa kinautolu ní” pea mo e tuʻo lahi ʻo ʻeku fehangahangai mo e ngaahi faingataʻá ni ʻi heʻeku moʻuí ʻa ia ne ʻikai ke u mei lava ʻo ikuna ka ne taʻeʻoua e tokoni ʻa e kau tangata mo e kau fafine māʻoniʻoni ʻoku ʻi hoku tafaʻakí ʻo tangi mo au, fakafiemālieʻi au ʻi heʻeku tuʻu ko ha fakamoʻoni ʻo e ʻOtuá. ʻOku ʻi ai e taimi ʻe niʻihi hangē ʻoku ʻikai ongo ʻetau lotú. Hangē ʻoku ʻikai talí, naʻa mo ʻikai ongona ʻe he ʻEikí. Ka ʻoku ou fie fakamoʻoni ʻoku ongona ʻa e ngaahi lotu ko iá pea ʻoku tali mai ia ʻi ha founga haohaoa. Koeʻuhí ʻoku tokanga mai ʻa e ʻEikí kiate koe, ʻokú Ne tokanga ki hoʻo ngaahi lotú, ʻokú Ne tokanga ki he ngaahi meʻa ʻoku nofo ʻi ho fakakaukaú mo e lotó, ʻokú Ne tokanga ki he meʻa ʻokú ne hohaʻasi koe ʻi he poʻulí. Pea ʻe hoko mai e ngaahi tali ko iá. Te nau hoko mai.