「永遠的光」

我好感謝喺呢個神聖嘅聖誕時節同你哋一齊，紀念同慶祝耶穌基督、神嘅兒子同全人類嘅救主嘅誕生。

一年入面，我最鍾意嘅就係平安夜。當太陽落山，我哋嘅心思就會轉向去沉思救主降生到世上嘅呢件事。記憶中嘅每個平安夜，我都會同家人一齊，打開新約聖經去讀路加福音第二章呢啲熟悉嘅經文：

「約瑟……從加利利的拿撒勒城……到了大衛的城，名叫伯利恆，……要和他所聘之妻馬利亞一同報名上冊。那時馬利亞的身孕已經重了。」

試想像嗰位年輕嘅妻子馬利亞，喺佢細心體貼嘅丈夫約瑟陪同下，一齊喺塵土飛揚嘅路上前往伯利恆，佢哋唔知喺邊度落腳，亦唔知個仔幾時會出世。

而家，喺腦入面再加埋呢個畫面——係喺地球另一邊發生嘅事。喺美洲大陸柴雷罕拉地嗰度，有一班信徒正喺度「堅定地守候」救主誕生嘅徵兆。呢個徵兆係拉曼人撒母耳預言嘅；就係一日一夜再一日，天都唔會黑。佢哋為呢件事而憂傷，因為如果呢個徵兆唔出現，所有信徒都會被處死。

事情是這樣的……主的聲音臨到他說：抬起頭來，放心吧；因為看啊，時候就近在眼前，今晚徵兆必出現，明天我就要來到世上。」

每次我讀到呢幾節經文，我都會停低，心入面充滿驚嘆。

我驚嘆，耶穌基督——佢喺父嘅指示下創造大地，曾經向歷代先知同正義嘅神嘅兒女說話、去啟發佢哋——主竟然向尼腓宣告，佢好快就會紆尊降貴，以嬰孩嘅形象嚟到世上。

我亦驚嘆，呢位全人類嘅救主喺伯利恆誕生，正正就係嗰一刻，徵兆出現，拯救咗喺柴雷罕拉地堅守信仰嘅尼腓人。經文記載，「因為看啊，太陽下去天沒有黑。」

你想唔想像到，呢件事對嗰啲信徒——佢哋一直期待、為呢件事而生存、而且不斷祈求呢個預言會實現嘅對佢哋嚟講，呢件事代表住乜嘢呢？當然，佢哋都滿心歡喜！呢個真係一個有力嘅見證，證明耶穌基督嚟到世上，係要拯救 所有「信他名的人」。太陽雖然已經落山，但天空仍然充滿光明。

先知阿賓納代見證：「祂是世界的光和生命，是的，是無盡的、永不暗淡的光。」 耶穌基督宣告：「我是世界的光。跟從我的，就不在黑暗裏走，必要得著生命的光。」

喺我哋人生入面，總有啲時候，我哋嘅希望同夢想就好似太陽落山咁，一片黑暗。當我哋經歷失喪之痛，或者面對身體同情緒上嘅挑戰嗰陣，都好似太陽落咗山咁。但因為耶穌基督降生到世上，喺第三日復活，戰勝咗罪同死亡；所以，當太陽落山嗰陣，黑暗都唔會係永久嘅。我哋可以尋求同搵到主能夠賜生命嘅光。

當「主的使者站在他們旁邊」6，卑微牧羊人頭頂嘅夜空，充滿住亮光。天使向佢哋宣告呢個大喜嘅信息：「因今天在大衛的城裡，為你們生了救主，就是主基督。」有時，我哋可以跟隨救主嘅光，就好似牧羊人咁，跟住天上嘅指引「急忙」去尋找主，學習佢嘅神聖。然後，我哋都可以喺我哋嘅路途上，「因［我們］所聽見所看見的一切事……就歸榮耀與神，讚美他。」

但喺另一啲時候，我哋可能會似博士多啲，可能要用幾個星期、幾個月，甚至幾年時間去尋找佢。 但係，只要我哋繼續跟隨佢引導星嘅光嘅指引——無論光線有幾微弱都好——每行一步，我哋都會更加接近佢。 然後，就好似博士咁，我哋會懷住極大嘅喜樂，俯伏敬拜，獻上我哋感恩同愛嘅禮物。

我想再講返平安夜嘅神聖意義。我會同你哋分享，神嘅光同愛點樣喺兩個神聖嘅平安夜為我同家人驅散黑暗。

喺2010年嘅平安夜，我身處離屋企超過3,200公里外嘅醫院，照顧我丈夫布魯斯——佢啱啱做完一個手術，努力咁同死神搏鬥緊。佢嘅健康情況正喺度急速惡化，而照顧佢嘅醫生團隊都唔知點解。當我哋同全國各地嘅家人一齊禁食祈禱之後，我返去公寓度準備瞓一陣。半夜嗰陣，有位經過布魯斯病房門口嘅護士聽到佢咳咗一聲。佢心入面忽然有個諗法，要幫布魯斯做一個唔常見嘅呼吸系統病嘅檢測。檢測結果證實佢嘅諗法，而喺開始治療後短短幾個鐘內，布魯斯嘅健康就開始好轉。我哋知道，基督嘅光照耀到嗰位護士身上，向佢顯明能夠令布魯斯康復嘅方法。光明同希望取代咗我哋所經歷嘅黑暗。

布魯斯再次住院。經歴過兩次嚴重疾病，仲喺度康復緊嘅時候，佢嘅健康再次急劇惡化。醫生喺48個小時內就診斷出原因。佢哋同我哋講咗個治療方案，可能幫到佢克服呢個第三次嘅病。聽完醫生嘅計劃後，布魯斯禮貌咁請佢哋離開病房，話想同我單獨傾下。佢同我講，聖靈已經向佢低語，清楚咁講明醫生已經冇辦法挽救佢嘅生命。佢講嘅時候好平靜，充滿住聖靈。兩日之後，佢喺我哋家人身邊，平安咁去世。

雖然兩次平安夜嘅結果唔一樣，但對我哋嚟講，每次都係神聖嘅。我哋有冇流過眼淚？有冇感受到深切嘅悲傷、失落同孤單呢？有。我哋有冇感受到神嘅「愛的光」呢？有。喺我哋生活入面，如果感覺好似太陽落山嗰陣，神就會賜我哋光同理解力。

只要我哋專注喺耶穌基督身上，佢就會照亮我哋，帶我哋踏上希望同醫治嘅道路。就好似柴雷罕拉地嘅信徒經歷嘅一樣，因為救主戰勝咗罪同死亡，當我哋面對生命入面嘅黑夜同黑暗都唔會係永久嘅。

我好鍾意聖詩《美哉小城》入面呢句充滿深意嘅歌詞：「在祢漆黑的街衢，永遠的光照啟，萬世希望，眾生喜憂，今宵集中於祢。」

各位弟兄姊妹，主係我哋永遠嘅光！我見證耶穌基督降生到世上，為要帶畀我哋喜樂同希望，照亮我哋回天家嘅路。我好愛佢。我崇拜佢。「感謝神賜給我們祂神聖的兒子——這份無與倫比的禮物。」12 奉耶穌基督嘅聖名，阿們。