Na Soifua Mai Keriso e Laveai

Ou te fiafia i le Kerisimasi! O le tala faatusipaia, o musika, ma lagona o le manuia ma le agalelei e foliga mai e lolovaia ai le tele o le lalolagi i lenei taimi paia.

I le aluga o tausaga, sa ma i ai ma lo’u toalua i ni isi o atunuu i le vaitau o le Kerisimasi. Sa ma fiafia i le vaaia o aganuu eseese ma auala eseese e faamanatuina ai le Kerisimasi. O le mafaufau ai i nei aafiaga na fesoasoani ou te iloa ai o le Kerisimasi e mo tagata uma. E mo tamaiti, matua, matua o matua, tamaitai ma alii o aiga, tausoga. E mo tagata o o latou olaga o loo sologa lelei ma e mo i latou foi o loo ola ma ma’i, mativa, ma tofotofoga. E mo i latou o loo puapuagatia i le taufaafefe o taua ma mo i latou o loo ola i le filemu ma tulaga manuia. E mo i latou o loo taumafai e mulimuli i le Faaola, mo i latou e le’i faalogo lava i Lona suafa, e mo i latou foi o e teena o Ia. E mo i latou foi o e na ola a o le’i soifua mai o Ia. O le Kerisimasi e mo tagata uma!

O le Kerisimasi e mo tagata uma aua na auina mai e le Atua Lona Alo mo i tatou uma ma mo i tatou taitoatasi.¹ “Aua ua fanau mai mo i tatou se tama.”²

Ona na soifua mai le Faaola, ola i se olaga e le sala, togiola mo i tatou, ma sa toetu mai, ua tofu maua ai e i tatou taitoatasi le meaalofa silisili o le toetutu mai le oti. E leai se tagata na ola i lenei lalolagi e le faamanuiaina i lenei meaalofa ofoofogia. E faaopoopo atu i lenei meaalofa, “e lei vaaia e mata, e lei lagona foi e taliga, … o mea ia ua saunia e le Atua mo i latou o e alolofa ia te ia.”³

E le afaina le vaitaimi po o tulaga, o le soifua mai o le Faaola ua avea i taimi uma ma se pogai e olioli ai. Na afio mai o Ia e aumai i fanau taitoatasi a le Tama Faalelagi le “filemu i le lalolagi lenei, ma le ola e faavavau i le lalolagi a sau.”⁴

Talu mai le taimi o Atamu ma Eva, na tulimatai atu ai tagata amiotonu i le soifua mai o se Faaola, o lē o le a afio mai i le lalolagi ina ia mafai ona faataunuu le fuafuaga a le Tama mo Lana fanau.⁵ Na valoia e Isaia ma Nifae Lona soifua mai i le matalalaga o Lana misiona.⁶ E le mafai ona tuueseeseina Lona soifua mai mai le pogai na Ia afio mai ai i le lalolagi.

Mafaufau ia Ana ma Simona, o e na vaai i le pepe o Iesu ma iloaina ai o lenei pepe sa “o se malamalama e faamalamalama a’i”⁷ le lalolagi atoa ma o le faamoemoe mo le togiolaina.⁸ E leitioa atofa mai e le agelu le savali “tala lelei e olioli tele ai, lea o le a faia mo tagata uma.”⁹ Tatou te olioli pe a fanau mai soo se pepe, ae o lenei fanau mai ma lenei pepe sa ‘ese.

O Iesu Keriso, o le malamalama ma le ola lava lea o le lalolagi, sa soifua mai o se pepe meamea i se falemanu faatauvaa, ae sa faailo mai e se fetu fou lona soifua mai. Ua faamatala mai e le Tusi a Mamona e uiga i se mea matautia na tupu—o se ao, se po, ma se ao na leai se pogisa—sa faapea ona faailoina ai Lona afio mai. O nei faailoga faavavega sa tuuina mai e faalauiloa mai le oo mai o le Malamalama o le Lalolagi,¹⁰ o lē o le a laveaia i tatou mai le pogisa o le agasala ma le oti. E mafai ona tatou fesoasoani e faasoa atu Lona malamalama i le lalolagi.

I le vaitaimi o le Kerisimasi, e oo lava i tamaiti laiti e mafai ona latou lagona le tosinaga ma le aafiaga o le alofa o le Faaola. O ni nai tausaga ua mavae, sa tusia ai e Sonja, o se tasi o tama teine a le ma fanau, e uiga i se talanoaga sa la faia ma lana tama tama e lima tausaga.

Sa ia tusia, “Na fai mai Andrew ia te au a o ou faamoeina o ia, ‘O le tausaga a sau, o le a ou le taula’i tele atu i meaalofa, ae o le a ou taulai atu i se mea ou te avatu ia Iesu.’ Sa ou fesili ia te ia po o fea na ia maua mai ai lea manatu, sa ia ta’u mai na mai lona faiaoga Peraimeri. Mālō Peraimeri!”¹¹

Ioe. Mālō Peraimeri. O le taimi nei, i le 14 tausaga mulimuli ane, o loo auauna atu nei Andrew i se misiona ma faaalu lenei vaitau o le Kerimasi i le tuuina atu o le savali a Iesu Keriso i isi. Sa ia tusia talu ai nei, “Ua tuuina mai e Iesu ia i tatou mea uma … [ma] o le a ave a tatou agasala uma. O le mafuaaga lena ua ou i ai iinei i se misiona.”¹²

O le vaitau o le Kerisimasi o se taimi faapitoa e mafaufau ai i le mea e sili ona taua e tuuina atu. Atonu e mafai ona tatou fesoasoani i isi ia lagona le “fiafia o le faamoemoe”¹³ lea e maua mai le iloa o le Faaola ma le ofoina atu o o latou loto ia e Ia.

Na maliu le ma afafine o Alisa mai le kanesa i ni nai tausaga ua mavae, ma ou te fiafia lava i lona manatu e uiga i le Kerisimasi, e ui ina sa feagai ma auga ogaoga o le soifua maloloina. I se tasi tausaga sa ia tusia ai:

“Sa ou maua se mea na faateia ai au mo le Kerisimasi. O se mea telē lava. … Sa ou mauaina se imeli i le taimi tonu o le Kerisimasi mai le ofisa o la’u tausi soifua o le kanesa. Sa fai mai o ia, ‘Manuia le Kerisimasi—ua mautinoa le suesuega o le tuma mo le suiga o [se kenera faapitoa].’ … O le a le uiga o lena mea mo a’u? Na latou faamaonia … ni vailaau … e faasalaveia ia auga na matauina o sela o le kanesa [mo ni isi e i ai lena suiga]. E le o se vaifofo, ae o se vailaau ofoofogia e mafai ona faaitiitia … vave ai tuma. … O le mea e faanoanoa ai, na iu ina maua e le tino se auala e taamilo mai ai, ma toe foi mai ai le kanesa. … Ae sa ou lagonaina le pei na tuu mai e se tagata ia te au ni masina o le ola faaopoopo. Ma o le a le uiga o lena mea? … Se taumafanafana faaopoopo? Se isi vaitau o aso fiafia ma si a’u fanau? Sa ou tagi ina ua ou tatalaina le imeli ma faafetai i le Atua mo le faate’i sili ona manaia ua ou mauaina.”¹⁴

Sa maua e Alisa ni isi taimi taua ma lona aiga. Sa ia faasoa mai se aafiaga na maua e lona aiga a o tilivaina atu se meaalofa e le faailoaina i se tuaoi. E faaalia ai o auiliiliga uma o le tatou foai atu o ni meaalofa e le o taimi uma e atoatoa ai. Na ia tusia:

“Sa matou momoli faalilolilo atu … se meaalofa i se tasi po. Sa fuafua e tama a latou taga sili ona lelei e o ese mai ai ma nofoaga e lalafi ai.

“‘Ae ina nei o latou iloa mai tatou …,’ sa fai atu ai Sam ma le paū, ae faalagolago atu le isi toalua ma le popolevale. ‘E tatau ona uu ni a tatou polo kiona.’

“Na malamalama James. ‘Seki, la. Ia tau i le faitotoa e tapuni ai?’

“‘Leai,’ [na tali ai Sam], ‘tauai i o latou foliga.’”¹⁵

Sa faasoa mai e Alisa se talanoaga sili ona ootia ma lona atalii laitiiti, o Luke, o lē sa ono tausaga le matua i le taimi lea. Na ia tusia:

“O le po nei a o ma taooto i lona moega sa faamalamalama e moli lanu na tautau i luga a’e o lona faamalama, sa ou fesili ia te ia …, ‘Ia, o le a se mea e te fia manao … ai?’

“‘Ia, e i ai se mea o loo ou mafaufau i ai.’

“‘Oi?’

“‘E mafai ona faaaoga i vaitau uma.’

“Oi?

“Sāō umi. ‘O se opo ma se kisi mai ia mami.’

“O lena mea na tatau ai ni kisi laiti se 100 ma ni opo mafanafana lapopoa i le taimi lava lea. ‘Luke vasi, e mafai ona e maua na mea i soo se taimi lava!’

“Ae a o ou savali i fafo o le faitotoa, sa fai si o’u faanoanoa. Atonu o le a le moni atoatoa lena mea. Ou te lagona le matuai faafetai ona o lenei tausaga e mafai ona ia maua na mea faapea foi ma meaalofa.”¹⁶

Sa faapitoa ona taia au i manatu o Alisa e uiga i le faamoemoe ua siomia ai le Kerisimasi. Na ia tusia:

“Ua ou maofa i le faamoemoe i lenei vaitau. A o ou mafaufau i le vavega o Keriso ma le anoano o meaalofa a le Atua, ou te lagona le faamoemoe mo mea uma ma tagata uma. E le faapea o le ituaiga o faamoemoe o le a atoatoa mea uma, ae o le a lelei mea uma, ma iu ai ina manumalo le lelei. I o tatou olaga atoa. Ou te le manatu faapea ua fai si tuai mo vavega, mo suiga, mo le filemu. Ou te matuai talitonu loloto ma atoa i lena mea. O le a ou ioe e foliga mai e faigofie atu ona lagona lenei faamoemoe mo isi, ae faigata atu ona faatatau ia te au lava. Ae o loo ou aoao pea. ‘Talitonu i mea uma, faamoemoe i mea uma, onosai i mea uma.’ Faigofie. Matagofie.”

O le talanoa ai e uiga i lana tama tama, sa ia faaauau ai, “O James i le Po o le Kerisimasi o loo taina mo au [se pese o le Kerisimasi ma ou te] fiafia lava i upu o lenei pese:

Na soifua mai o Ia e laveai. E laveai oe ma a’u. E maeu se meaalofa lemafaatusalia e na’o Ia e mafai ona tuuina mai. E tusa lava po o a o tatou tulaga i le taimi nei, tau ina ia tatou atili lagona atoatoa Ana meaalofa i o tatou olaga i lenei vaitau o le Kerisimasi.

I le suafa o Iesu Keriso, amene.