Miti o le Po

O le faatulagaga sa filemu e pei ona mafai ona aumaia e le natura, le oo mai o le po i le amataga o le tautotogo. Na matua manino le lagi, i fetu na muamua susulu mai ta’isefulu, ona sosoo ai lea ma le ta’i selau, ma i’u ai ina faitau afe. O leoleo mamoe ma a latou lafu i fanua ua mauaina se toomaga i le mālū mai le mutinitini o le la ma le vaivai mai galuega mamafa o le aso. E na o le pau le elemene—uigaese ae ofoofogia le matagofie—i lena vaaiga i le vao lafulemu i le pitomauga i le tausi’usi’uga o le fanua na lata ane i le a’ai, o se faatanoavao na i ai faatasi ni tagata se toalua i luga o se pepe meamea sa taoto ai i le mea sa na’o manu fanua na molimauina le ofoofogia na latou vaaia.

O le toatolu lenei, sa le’i maua ni uo po o nisi latou te aiga i le a’ai tumutumu o Peteleema, muamua, o se tina taupou talavou tele ma lalelei e suafa ia Maria (masalo sa matuā laitiiti lava pe ana faapea na faamalosia agaifanua i na aso), o lona lototele ma le faatuatua uigaese na matua mata’ina i lo se isi mea na tusia i tusitusiga paia. Lona lua, o lana tane e igoa ia Iosefa, na matua atu i lana avā talavou ae, i le faauigaga, masalo o ia le tagata aupito sili lea ona agavaa i le lalolagi na te tausia se pepe sa le o sona atalii faaletino ae o se pepe o le a avea ma tamā faaleagaga o Iosefa pe a uma ona soifua ai i le olaga. Lona tolu, ma mulimuli, ma sili ona matagofie i mea uma: o le pepe o le a faaigoaina ia Iesu, na taoto i ie na aui ai i luga o faaputuga vao sili ona mamā na mafai ona aoina e se tamā popole.

O le tasi mea, o lenei vaaiga leleoa ma toafimalie, o le mea moni, e leai ma se pepe na fanau mai ua anoanoai mea ua iloa e uiga ia te ia ma o lē ua anoanoai mea ua tusia, ma o lē ua anoanoai mea ua faamoemoeina mai i ai. O le mea moni, o le iloa e uiga ia te ia ma le Tagata e avea ai o Ia sa amataina i malo o le lagi a o le’i fanau mai se isi lava tagata! I le avea ai ma Ulumatua o le Tama¹ i lalolagi o agaga, o iina na tofia ai o Ia e avea ma Faaola o le lalolagi,² muaifaauuina e avea ma “Tamai Mamoe na fasia mai le faavaega o le lalolagi.”³ Mulimuli ane, ae a o lumanai pea Lona soifua mai, o le a avea o Ia ma Ieova silisili o le Feagaiga Tuai, na fesoasoani ia Noa e laveai lona aiga i le taimi o le lolo⁴ ma leoleoina Iosefa a o laveaiina lona aiga i le taimi o le oge.⁵ O Ia o Ieova pule aoao o ona suafa ua aofia ai “Ofoofogia, o le Faipule, O le Atua Malosi Aoao, O le Tamā Faavavau, O le Alii o le Filemu.”⁶ O Ia o le Alefa ma le Omeka⁷ i le fuafuaga sili o le alofa mutimutivale o lē o le a mulimuli ane “talai le tala lelei i ē ua tigaina; … fufusi i ē loto momomo, … talai le saolotoga i le tafeaga, ma [tatala le falepuipui ia i latou] … o ē ua [saisaitia].”⁸

I le faaiuga, o lenei pepe o le a solia toatasi le tuugāuaina o le togiola atoa ma faia na o ia, e aunoa ma se soa faaletino o le a fesoasoani ia te Ia ma leai se soa faalelagi o le a mafai ona fesoasoani mai. I le tauaveina o avega faanoanoa uma o le olaga faaletino o le a Ia aumaia ai le meaalofa lē mafaamatalaina o le faaolataga i le aiga atoa o le tagata mai ia Atamu e oo i le iuga o le lalolagi. I le faaiuga o Lana malaga ma le faavavau, o le a avea ai o Ia ma “Leoleo Mamoe ma Epikopo o [o tatou] agaga,”⁹ le “Faitaulaga Silisili o la tatou galuega,”¹⁰ le “puna tafe fua o le amiotonu uma.”¹¹ O nei tiute uma faaletino ma poloaiga sa ao ona faataunuuina. Ae le o le po nei. E le o le po lenei. O i sa na o ia o se pepe i aao o se tina na alofa ia te ia, na leoleoina e se tama sa agamalu ma malosi.

Na o mai leoleo mamoe ma le faamemelo, o le faatusa o gaoioiga faaletino sili ona maualalo ma tagata sili ona matitiva ma a latou galuega. Mulimuli ane, na o mai tupu, le Au Makoi mai sasae, o le faatusa o ausiaga faaletino sili ona maualuluga ma tagata sili ona mauoa ma a latou galuega. Ae sili i mea uma—sili moni i mea uma—na o mai agelu ma vivii “O le viiga i le Atua i mea aupitoaluga,”⁵ o se potopotoga moni o lenei au o le lagi na viia le pepe meamea o lē ua i’u ina afio mai i le lalolagi. O le mea moni, na faailoga e agelu le ala e tau atu i lenei faatanoavao mo seneturi e tele. Sa oo mai se agelu ia Maria i le faasilasilaga paia ia te ia e uiga i le mea na filifilia o ia e fai ma le tagata ua filifilia o ia e la te faatasi.¹³ Sa oo mai se agelu ia Iosefa e faalototele o ia e faaipoipo i lenei tamaitai talavou o lē ua faalilolilo ona i ai se pepe, o se poloaiga na ia tulai ma le faatuatua e usiusitai i ai.¹⁴ Ina ua mavae le soifua mai, sa ta’u atu e se agelu i le ulugalii talavou e sosola ese mai le mea o le a faia e Herota o le fasiotiga o ē lē sala (nai tamaiti laiti o ē na avea ma uluai Kerisiano o le Feagaiga Fou na maliliu faamaturo), ma sa ta’u atu e se agelu i le ulugalii le taimi e mafai ona toefoi atu ai mai Aikupito ae ia lē nonofo i Peteleema po o Ierusalema ae nonofo maotua i Nasareta.¹⁵ Na manino lava, sa sili atu le iloa e agelu i le lagi nai lo tagata soifua i le lalolagi e tusa ma le uiga o lenei soifua mai ma le misiona a lenei tamaitiiti, e “tau’ave o tatou tiga ma tau’ave o tatou faanoanoaga, ia manu’a mo a tatou solitulafono ma uno’oa mo o tatou vaivaiga, ia faamamāina ina ia i ona luga le a’oa’iga o lo tatou filemu, ma o ona faalavalava o le a faamaloloina ai i tatou.”¹⁶

Mo a’u, e taua tele le oo mai o nei mea uma i le po, o lena taimi o o tatou olaga ua mapu ai lo tatou lēlavavā e malolo ma oo mai ai lagona toafimalie, pe a fai tatalo, pe a oo mai faaaliga ma le faaali mai faalelagi e pei ua latalata mai. Ma i le faa-tasi i le tausaga, o le po o le taimi lea e lē fia momoe ai tamaiti ona o le fiafia tele i lo latou iloaina o le aso a taeao o le Kerisimasi lea. Ioe, po o le a lava le faigata o se aso e oo i ai, o a tatou miti o le po e mafai ona sa’o ai mea uma. E pei ona tusia e Elder Parley P. Pratt i se tasi taimi:

“Ua faaali mai e le Atua le tele o faatonuga taua …e ala i miti. … [Ona] aveese lea o neura, ma taooto ai tagata ola uma i le fifilemu [moe filemu, ma] … o totoga faaleagaga … ua talanoa ma le Atua, … [ma] agelu, [ma] o agaga o tagata amiotonu ua atoatoa.”¹⁷

Ma o lea po o se maofa tele, e moni lava, “o tausaga o faamoemoega ma popolega”¹⁸ na taulau ai miti o Peteleema.

Ou te tuuina atu ia te outou, e avea ma au meaalofa o le Kerisimasi, o miti o Peteleema. Ma ou te faia lena mea i le suafa o le pepe ua moni ai na miti uma, o le Alii o Iesu Keriso, amene.