Klebkall bo er a Dios

Ungil Kurismas, betik er a renguk el odam me a odos er ngak, a kudersii a omereng el saul el mo er a First Presidency er tial techall el mo ochotii a ngara renguk el kirel tial chedaol el belsechel a Kurismas me a cherellel a Rubak er kid e Osobel, Jesus Kristo.

Ng diak bo el mesaul a renguk er a klumech er a Kurismas sel lomuchel er a cherellel a tolechoi Jesus er a Bethelehem er a Judea.

A Isaiah a milechisii tial tekoi er a betok er a euid el dart el rrak er a uchei: “Ngar ngii a kekerel dil el mo dioll, ng mo mechelii a ngelekel sechal e mo mengeklii el Emmanuel.”

A King Benjamin a ulemlaoch, “Ng mo okodongall el Jesus Kristo, el Ngelekel a Dios, el Demal a babeluades me a beluulechad, el Omebael er a rokui el tekoi er a uchlel; ea delal a mo okodongall el Mary.”

A propet Nephi a ulerrenges er a ngor el kmo, “Ea klukuk e Ngak e mei er a beluulechad.”

A bo el kukuk, cheroid el beluu, ea Kristo a milchell. Ng bleketakl el delal, er a Mary, a mlo mechas a rengul er a dirk milchell el ngelekel sechal, di Chimol Ngelekel a Demad er a tech.

Ngara bukl er a Judea el iiliuekl ra Bethelehem, ea Lukas ouchais er kid el kirir a remengkar a sib er a ked. Tirka dimlak el dil hutsu el mengkar a sib le te “tokubets e chedaol el chad” el tir a mo sioning er a cherellel a ngalek el Kristo.

“Ea, tal, anghel er a Rubak a mlo duum er tir, ma klebkellel a Rubak a diliich el meliuekl er tir: me te mlo medakt.

“Me a anghel a dilu er tir el kmo, Lak ko medakt: A kulab a ungil chais lekor kemiu, el ngii a mo mesterir a rokuil chad a deurreng. Chelechal sils ea milechell er a belual a David, a Osobel, el ngii a Kristo el Rubak.”6

“Chelechal sils ea milechell er a belual a David, a Osobel, el ngii a Kristo el Rubak.” …

“Ng dimlak el meketeket eng duum a cheldebechel er reanghel er a eanged e ulebengkel ngii el anghel el oldanges er a Dios el kmo,

“Klebkall bo er a Dios el ngarbab, ma beluulechad bo el budech, klengeltengat bo er rechad.”

Domtab er a mla er a Judea—ea eanged a mle mui er a llemesel a klebokel el btuch me a chelitakl a mla er a eanged el olangchelel tial meang el tekoi. A remengkar a sib mlo “orreched” lomes er a tolechoi el ulekedurs er a ongolel a charm. Ea uriul e te “milechisii er cheroid” a lilsang.

Ng bek el rak ra Kurismas eng uldekdak a sioning er kid el uaia remengkar a sib el kmo Jesus Kristo, a di tang el Ngelekel a Dios, mle er a merkelel a beluulechad el okodongall el Chedaol Chutem.

A rmengekar a sib uleba ngariou el reng er a lebo er a blil a charm el mo mengull er a King er a re kings. Ng mekerang ongull er Ngii er chelchal belsechel? Ombebechar a klalou? Meselsel e omsiich a blid? Sei a uldars er kid el mo er a Osobel? A lechub eke de nguu a mekngit el reng el mo budech, ongedaol el mo er tirkel lousbech a ngarbad el moktek, klebkall bo er a Dios loeak a blak el reng el ngara moktek er Ngii. A Jesus a milekoi: “Mei [e] moltirakl er ngak.”

A osisecheklel a Jesus Kristo, liluut lokiu a Profet Joseph Smith, ng mlotaut er a re mesiou el iliuekl ra beluulechad. Ak mla soiseb er tial klemeriar reng er tirkel mle kerekikl a chedaol tekingel er a oberberk el daob el mo er a rokir chelsel a Rosia.

A rebebil er a re beldeked a mle kot el Santo el mle cheludel er a Zion. A tal redil, el Hannah Last Cornaby, a kiliei er a Spanish Fork, Utah. A chelsel aikel meringel el taem ea Kurismas a lebebil ea olengchelel a kesiokel el kerekur malechub eng eduib el omotsia, malechub eng di mamed el oninio—dimlak el oumesind. A Hannah lilchesii er a December 25, 1856:

“Kurismas er a mla imiit er a kebsengei ea rengelkek el dirk olngesonges a klemedengei er tir a kilabs a stakings, e melchedech [aikang] el kmo [ngmo mui] a chelsel. Ng mle mekngit a renguk, er a kisterir me ak milekoi er tir el menglou a rengrir el kmo diak a mo obes er kemiu; me te mlo bad el semeriar el kirel a tutau.

“Ng dimlak a ngii di el merkos, ng dimlak kudengei el kmo mekerang. Ng diak, el kirir, el mo mekngit a rengrir. Ak mlo lematk a tongang el ngara blai el ksilngoes e chilubel a lemel, ngii, sel lobau el telal bung, eng mo merkos el ilaot. Maikang, me a sesel meringel, e ak riruul a blauang, el ngii, sel de tektuk el mo kakerous el kata, e chuum er a ongerdechidel, (eleng dimlak a stob er ngak) e siluk er a stakings e ruleterir mo ungil a rengrir el diuaia rengrir el mo er a takai el merkos el kall.”

Ng sebechek el mesa tial el cheldecheduch el smodii a chedil el oureor el tal kesus el diak a stob el omekbeot er a urerel. Engdi ng meringel losiik a rolel a deurreng el mo er a rengelkel, el melisiich a rengrir, e omtebechel er a delengchokl, “Sils er a Deurreng! Rokui a mlo ungil besul.” Tiang diak el sa lungil suobel er a Kurismas?

President Monson Olsisechakl: “A techall el doruul el kired a diak urebetellel, eng di ng mo tmurk er a ulebongel. Ngar ngii a reng el dongesuseu. Ngar ngii a delemdemk el tekoi el medung. Ngar ngii a omiange el dodars.”

Blechoel sel dedak lobengkel a Rubak—meruul a urerel, melikou er tirkel iiliuekl er kid—e kid a obang sel sioning el kmo Ngii a ngar e Ngii a betik a rengul er kid, ng diak el iior er a aikel ringel el dengar ngii.

A tara kuoll el chad el ngara reksi er a Ikelesia a John Menzies Macfarlane el ulbult el mo chedal a ikelesia el chad er a Scotland. Ng mlo chedal a Ikelesia ngii me a mesobil el delal me a odam er ngii, me tir el tedei a millukl el mo er a Salt Lake er a 1852. Ng mle 18 a rekil. Aikel rak, eng mlo chad er a omeluk el chutem, daiksang, e mlo chad er a llach, eng di cheliteklel a rirelii el mo merael a chisel.

Ng milkdebechii a kot el chelchad er a remengitakl er a Cedar City e ngiluu a cheldebechel er ngii liueklii a mesechesechel a dims er a Utah. A uriul er a klekool er a St. George, ea Elder Erastus Snow, el Apostol e mereder er tial beluu, a milngesuseu er ngii el mo kiei er a delengchokl er a dims er Utah e ngititerir a rechad er a blil me a cheliteklel lobengkel.

Ng kmal mle betok a meringel er a 1869, ea Elder Snow a ulengit er a Brother Macfarlane el mo ousekool er a prokuram er a Kurismas el mengelaod a rengrir a rechad. Brother Macfarlane a mle soal a beches e ongelaod el chelitakl er tial tekoi. Ng mle meringel el meluches er a chelitakl, eng di dimlak a duubech. Ng miluluuch el kirel omlisiich er a reng e liluut el meluluuch. Ea, tal kesus, eng ulekisii a bechil e dulang el kmo, “Ngar ngii a tekoi el mo er a chelitakl, ng dirrek el ngarngii a ongak!” Ng ulerreched el mo er a orunga e mocha ouskool er a hu, e meluches er ngii ea bechil a orreked er a lambei el kekerei a letul me a cheluchul ngara biul. A tekoi me a ongak e kmal mle beot el tuobed:

A Brother Macfarlane a dirkak a tal bo er a Judea e mesa risois el uaia keribetbad el bukl, eng di aikal ungil tekoi er tial chelitakl a uldibsobs er a rengul el sioning er a Osobel er a cherellel er a Bethlehem er a Judea, er a uchelel el ngii a mo ngodechii a beluulechad el mo cherechar.

A kuuchais ra sioning er ngak el kmo a Diak a Ulebengellel Chedam a ngar. A moktek er Ngii er a deurreng a dmolech el klengeltengat er a klengar er a rebek el ngelekel er a bek el telcheroll. Ak medengei el kmo A Betik er a Rengul Ngelekel, Jesus Kristo, el ngalek el milechell er a Bethlehem, a Osobel e Osebelel a beluulechad me a President Thomas S. Monson el Profet er Ngii er a beluulechad er chelechal taem. Aikal tekoi er a odanges a klemerang er a oderngesek: “ Klebkall bo er a Dios el ngara kot el ngarbab, budech er a beluulechad, klengeltengat bo er a rokui el chad.”

El ngara ngklel a Jesus Kristo, amen.