Ko e Tokoni ki he Toko Taha ʻi Homou Koló

Naʻe fakaʻilongaʻi ʻe Palesiteni Lāsolo M. Nalesoni hono taʻu 100 ʻi Sepitema 2024 ʻaki ha kole fakamātoato kiate kitautolu kotoa ke tau ala atu ʻo tokoni ki he toko tahá, ʻo hangē ko hono fakamatalaʻi ʻe Kalaisi ʻi he talanoa fakatātā ʻo e sipi heé. ʻI he talanoa fakatātā ko ʻení, naʻe ʻalu atu ʻa e tauhisipi ʻofá ki he toafá ke kumi ʻa e tokotaha faingataʻaʻiá—ko ha fakamanatu ʻo hotau mahuʻinga ki he Fakamoʻuí.

Naʻe tali loto-vēkeveke ʻe he kāingalotu ʻi he funga ʻo e māmaní ʻa e fakaafe ko ʻení ke tokoni ki he toko taha ʻi honau tukui koló—ʻo tatau ai pē pe ko ha mēmipa ʻo e fāmilí, kaungāmeʻa, pe ko ha kaungāʻapi. Naʻe ʻomi ʻe Palesiteni Nalesoni ha fakahinohino ki he ngāué ni, ʻo pehē, “ʻOku ou fakaafeʻi kimoutolu ʻi he ngaahi māhina ka hokó ke mou fakakaukau ʻi he faʻa lotu: ko hai ʻokú ke ʻiloʻi ʻoku loto-foʻí? Ko hai ʻe fiemaʻu ke mo fakalelei pe te ke kole fakamolemole ki aí? Kuo ʻi ai nai ha hingoa naʻá ke fakakaukau ki ai kimuí ni, neongo ʻoku teʻeki ke ke ʻilo hono ʻuhingá? ʻI hoʻo ʻave ʻa e ngaahi fehuʻi ko ʻení ki he ʻEikí, te Ne ueʻi koe ke ke ʻiloʻi ʻa e founga te ke lava ai ʻo tokoni mo hiki hake ha taha ʻoku fiemaʻu tokoní.”

Fakakaukau ki he ngaahi fakakaukau ko ʻení ke tataki koe ʻi hoʻo tokoniʻi ʻa e toko taha faingataʻaʻia ʻi ho koló.

1. Fakataha mo ha kaungāmeʻa: Tokoni ki ha taha te ne ala fiemaʻu ho feohi [fakakaungāmeʻá]. Kumi ha taimi ke ke fetaulaki ai mo e tokotahá ni ke mo fepōtalanoaʻaki, maʻu meʻatokoni hoʻatā, pe luelue.
2. Ngaohi ha meʻatokoni: Fakaafeʻi ha taha ki he maʻu meʻatokoni efiafí pe ʻomi ha meʻatokoni ki ha taha ʻoku faingataʻaʻia.
3. Faleʻi ha fānau pe toʻu tupu: Fakaafeʻi ha taha ʻo e fānaú ke ne lau atu ha tohi kiate koe, tokoni ki ha tokotaha ako ʻi he ngāue fakaako mei ʻapí, pe ako mo ha taha ki ha sivi.
4. Foaki ha vala, meʻakai, pe ngaahi meʻa kehe pē: Foaki ʻa e ngaahi meʻa ʻoku fiemaʻú ki ha polokalama tokoni, nofoʻanga, pe kautaha foaki ʻofa.
5. Tokoni ki ho fāmilí: Fufulu ʻa e peletí, tokoni ki ho ngaahi tokouá ke fakamaau honau lokí, pe fāʻofua ki ha mēmipa ʻo e fāmilí.
6. Fakafanongo: Tuku ha taimi ke ke tangutu ai mo ha mēmipa ʻo e fāmilí, kaungāmeʻá, pe kaungāʻapí ʻo fakafanongo pē. ʻOku fakahaaʻi ʻe he fakafanongó ʻokú ke tokanga pea ʻe lava ke ʻoatu ai ha ngaahi fakakaukau ki he founga ke tokoniʻi ai ʻa kinautolu ʻokú ke ʻofa aí.
7. ʻAve ha text pe fakamatala: ʻAve ha text faingofua ki ha taha, pe fai ha fanga kiʻi tohi ʻofa ke ʻiloʻi ʻe he kakaí ʻoku tokangaekina kinautolu.
8. Fai ha fakamālō: Tuku ha kiʻi tohi fakamālō koeʻuhí ko hoʻo ngaahi kaungāmeʻá, fāmilí, pe naʻa mo e kakai ʻoku nau tokoniʻi fakaʻaho koé, ʻo hangē ko e tokotaha ʻokú ne ʻave hoʻo meilí.
9. Talanoa ki hoʻo kau taki fakalotofonua ʻi he Siasí: ʻEke ki hoʻo palesiteni Fineʻofá pe palesiteni ʻo e kōlomu ʻo e kaumātuʻá pe ʻoku ʻi ai ha taha ʻi homou koló ʻoku fiemaʻu ha ʻofa mo ha tokoni.
10. Lotua ha fakahinohino: Kole ki he ʻOtuá ke Ne tataki mo ueʻi fakalaumālie koe ʻi hoʻo feinga ke tokangaekina ʻa e kakai ʻoku faingataʻaʻiá.
11. Kumi ha ngaahi faingamālie ngāue tokoni ʻi he JustServe.org: Hū ki he justserve.org pe download ʻa e polokalamá ke fekumi ki ha ngaahi ngāue tokoni ofi atu kiate koe.