Орон нутгийнхаа хэн нэгэнд үйлчлэх

Ерөнхийлөгч Рассэлл М.Нэлсон 2024 оны 9-р сард 100 насныхаа ойг тэмдэглэн, Христийн алдагдсан хонины сургаалт зүйрлэлд дурдсанчлан хэн нэгэн хүнд хүрч үйлчлэхийг бид бүгдээс хүссэн билээ. Уг сургаалт зүйрлэлд халамжит хоньчин тусламж хэрэгтэй нэг хонио олохоор аглаг буйд руу явсан нь бид Аврагчийн хувьд ямар их үнэ цэнтэйг сануулдаг.

Дэлхий даяарх гишүүд гэр бүлийн гишүүн, найз, хөрш зэрэг орон нутгийнхаа хэн нэгэнд үйлчлэхээр энэхүү урилгыг баяртайгаар хүлээн авсан юм. Ерөнхийлөгч Нэлсон энэ тухайд чиглүүлэг өгөн ийн хэлсэн: “Ирэх саруудад би та бүхнийг залбиралтайгаар: Урам хугарсан хэнийг би мэдэх билээ? Би хэнтэй учраа олж, уучлал гуйх хэрэгтэй байгаа билээ? Яагаад гэдгийг мэдэхгүй ч нэр нь миний санаанд орж ирээд байгаа хэн байгаа билээ? гэсэн асуултуудыг бодож үзэхийг урьж байна. Та бүхэн эдгээр асуултыг Их Эзэнд авчирвал, Тэрээр таныг тусламж хэрэгтэй байгаа тэр нэг хүнд хэрхэн хүрч, дэмжихээ мэдэхэд тань нөлөөлөх болно.”

Орон нутагтаа тусламж хэрэгтэй хэн нэгэнд үйлчлэхэд тань туслах дараах санаануудыг бодож үзнэ үү.

1. Найзтайгаа уулзах: Таны нөхөрлөлөөр дутсан хэн нэгэнтэй холбоо барь. Тэдэнтэй уулзаж ярилцан, үдийн хоол идэх эсвэл хамт алхах цаг гарга.
2. Хоол хийх: Хэн нэгнийг оройн хоолонд урь эсвэл тусламж хэрэгтэй хэн нэгэнд хоол аваачиж өг.
3. Хүүхэд, өсвөр насныханд зөвлөх: Нэг хүүхдээс ном уншиж өгөхийг хүс, эсвэл гэрийн даалгавраа хийхэд нь тусал эсвэл хамт шалгалтад бэлд.
4. Хувцас, хоол хүнс, бусад зүйлийг хандивлах: Орон нутгийнхаа хандивын аян, түр хоргодох байр, энэрлийн байгууллагад хэрэгцээтэй зүйлсийг өг.
5. Гэр бүлдээ туслах: Аяга тавгаа угаа, өрөөгөө цэвэрлэхэд нь ах, эгч, дүүдээ тусал эсвэл гэр бүлийн гишүүнээ тэвэр.
6. Сонсох: Гэр бүлийн гишүүн, найз эсвэл хөрштэйгөө хамт суугаад зүгээр л сонс. Сонсох нь анхаарал халамж тавьж байгаагаа харуулах, тэдэнд хэрхэн үйлчлэхээ ойлгох боломжийг өгдөг.
7. Зурвас эсвэл тэмдэглэл илгээх: Хэн нэгэнд энгийн зурвас илгээ эсвэл найрсаг захидал бичиж, анхаарч халамжилдгаа мэдрүүл.
8. Баярлалаа гэж хэлэх: Найз нөхөд, гэр бүлийнхэн, тэр ч байтугай шуудан хүргэгч гэх мэт өдөр бүр танд тусалдаг хүмүүст талархлын зурвас үлдээ.
9. Орон нутгийнхаа Сүмийн удирдлагатай ярилц: Халамжийн нийгэмлэг эсвэл ахлагчийн чуулгын ерөнхийлөгчөөс орон нутагт тань тусламж хэрэгтэй байгаа хүн байгаа эсэхийг асуу.
10. Удирдамж гуйн залбир: Тусламж хэрэгтэй хүмүүсийг халамжлах хичээл зүтгэлийг тань чиглүүлж, сүнслэгээр нөлөөлөхийг Бурханаас гуй.
11. JustServe.org-оос үйлчлэх боломжуудыг хайж олох: Justserve.org-т зочлох эсвэл аппликэйшныг нь татаж аван өөрийн ойролцоох үйлчлэлийн төслүүдийг хай.