Сүм тусламж хэрэгтэй хүмүүсийг хэрхэн халамжилдаг вэ?
“Нэгдүгээрт Бурханаа хайрла, хоёрдугаарт хөршөө хайрла гэсэн хоёр агуу зарлиг биднийг хөтлөн удирдах болно. Бид үйлчилснээр хайраа харуулдаг.”
Онцлох халамжийн үйл ажиллагаанууд
Humanitarian Efforts of the Church
“Бусдад тусламж үзүүлэх буюу ухамсраараа бусдад өөртэйгөө адил эсвэл өөрөөсөө илүү санаа тавих—энэ бол бидний хувьд баяр баясгалан билээ. Тэрхүү хоёр дахь агуу зарлигийн дагуу амьдрах нь Есүс Христийн жинхэнэ шавь болохын гол түлхүүр юм.”
Би бусдыг хэрхэн халамжилж чадах вэ?
Би оршин байгаа газартаа хэрхэн үйлчилж болох вэ?
Та том, жижиг янз бүрийн арга замаар оршин байгаа газартаа бусдад үйлчилж чадна! Дараах зарчмууд таныг хаанаас эхлэхээ мэдэхэд тусална. Үүнд:
- Хэрэгцээг тодорхойлох: Орон нутагтаа үйлчлэл хийх боломж, мөн ашгийн бус байгууллагуудын талаар эргэн тойрныхоо хүмүүсээс асуу.
- Утга учиртай харилцаа холбоо тогтоох: Бусдыг өөртэйгөө хамт үйлчлэхэд урамшуулан дэмж. Таны үйлчилж буй хүн бүр Бурханы хүүхэд бөгөөд тэднийг ойлгож, хайрлаж, хүндэлж харьцах нь зүйтэй гэдгийг сана.
- Төлөвлөгөө гарга: Яаралтай хэрэгцээг шийдэж, бусдыг бие даахад нь туслах төлөвлөгөө гарга. “Би энэ хэрэгцээг шийдвэрлэхийн тулд юу хийж үзсэн бэ?” “Би юу хийж үзэхийг хүсэж байна вэ?” “Би хаана, хэзээ, ямар байдлаар тусламж авахыг хүсэж байна вэ?” гэх мэт асуултыг өөрөөсөө асууж үз.
- Туршлагаа хуваалц: Өдөр тутмын харилцан яриа болон олон нийтийн мэдээллийн хэрэгслээр таны үйлчлэл танд болон бусдад хэрхэн нөлөөлснийг хуваалцсанаар бусдад үйлчлэхэд нь сүнслэгээр нөлөөл.
Мөн та JustServe.org дээрээс ойролцоо байгаа үйлчлэлийн төслүүдийг олж болно. JustServe вэбсайтыг амьдардаг газартаа ашиглах боломжтой эсэхийг шалгана уу.
Үйлчлэлийн номлолын ямар ямар сонголт байдаг вэ?
Үйлчлэлийн номлолд үйлчлэхийг сонирхож байна уу? Шашны номлол хийдэггүй номлолд үйлчлэх хүсэлтэй хөгшин залуу хэн бүхэнд үйлчлэлийн номлол нь гайхалтай боломж юм. Гэрээсээ, Сүмийн эзэмшлийн газарт эсвэл орон нутагтаа үйлчлэхийг хүсэж байна уу гэдгээс хамааран өөрийн хэрэгцээнд тааруулан сонгох боломжтой олон төрлийн номлол байдаг.
Жишээлбэл: Та ажил эрхлэлтийн төв, бишопын агуулах, лаазлах болон үйлдвэрлэх төвд үйлчилж болно. Мөн та донтолтоос ангижрах бүлгүүдийг хөтөлж явуулах, бие даах чадвар хөгжүүлэх хичээл заах эсвэл орон нутагт хэрэгжүүлэх хүмүүнлэгийн төслүүдийг боловсруулах замаар үйлчилж болно. Энэ мэтчилэн үйлчлэлийн номлолын боломжийг эндээс үзнэ үү.
Анхаарал тавьж халамжлах нь гэрээнүүдтэй минь хэрхэн холбогддог вэ?
Есүс Христийн Хожмын Үеийн Гэгээнтнүүдийн Сүмийн гишүүд баптисм хүртэхдээ “нэг нэгнийхээ ачааг … үүрэлцэ[ж], … гашуудах тэдний хамт гашууда[ж] … мөн тайтгарал хэрэгтэй тэднийг тайтгаруул[хад]” (Мозая 18:8–9) бэлэн гэдгээ амлаж гэрээ байгуулдаг. Энэ амлалт буюу гэрээгээ сахих нь биднийг Есүс Христтэй илүү адил болоход туслах чухал үүрэгтэй.
Тэгвэл бусдыг халамжлах энэхүү гэрээгээ та хэрхэн сахиж болох вэ? Бид амин хувиа бодолгүй үйлчлэх Христийн үлгэр жишээг төгс дагаж чадахгүй ч цаг зав, авьяас чадвар, хөрөнгө мөнгө, хичээл зүтгэлээ харамгүй зориулснаар бусдын ачааг хөнгөлж чадна. Бид зовж шаналж байгаа хүмүүст өрөвдөх сэтгэл, мөн бодит тусламж хэрэгтэй байдгийг ойлгон сэтгэл санааны дэмжлэг, халамж үзүүлснээр Аврагчийн үлгэр жишээг дагаж чадна. Бид хүмүүст Бурханы хайрыг мэдрүүлж, хамгийн хүнд хэцүү хямралын үед ч амар тайвныг мэдрэхэд туслах арга замаар халамжилж чадна.
Би Сүмийн хүмүүнлэгийн ажилд хэрхэн хандив өргөх вэ?
Хэрэв та тусламж хэрэгтэй хүмүүсийг халамжлах Их Эзэний ажлыг урагшлуулахын тулд Сүмд хандив өргөхийг хүсвэл philanthropies.ChurchofJesusChrist.org-т зочлоорой.
Өөрчлөлт хийхэд мөнгө хэрэггүй. Орон нутагтаа байгаа хүмүүст үйлчилж, тэдэнд анхаарал халамж тавихад цаг зав, хүчин чармайлтаа зориулах нь бусдыг хүчирхэгжүүлж, тэднийг бие даах чадвартай болох зам дээр хөтөлж чадна. JustServe.org-оос орон нутагтаа үйлчлэх боломжийг хайж олно уу.