Lipooti ʻo e Tokangaekiná ki he 2025—Pōpoaki mei he Kau Palesitenisī ʻUluakí

Si‘i Ngaahi Kaungāmeʻa,

ʻI he taimi naʻe ʻi māmani ai ʻa Sīsū Kalaisí, naʻá Ne akoʻi ha ongo fekau lalahi ʻe ua: ke ʻofa ki he ʻOtuá pea ke “ʻofa ki ho kaungāʻapí ʻo hangē pē ko koé” (Mātiu 22:39). ʻOku tataki kitautolu ʻe Heʻene sīpingá. ʻI heʻetau hoko ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau feinga ke muimui kiate Ia ʻaki ʻetau ngāue fakaetauhi ki he mahakí, fafanga ʻa e fiekaiá, mo fakafiemālieʻi ʻa kinautolu ʻoku faingataʻaʻiá. Ko ʻetau ngāué ko ha ngāue fakaetauhi ia ʻo e fiefia lahi ki he fānau kotoa ʻa e ʻOtuá.

ʻOku ʻomi ʻe he Lipooti ʻo Hono Tokangaekina ʻo Kinautolu ʻOku Faingataʻaʻiá ki he 2025 ha kiʻi ʻata ʻo e ngaahi ngāue fakaofo ʻoku fakahoko ʻi he funga ʻo e māmaní ʻe hotau kāingalotú. ʻOku fakamālohia e ngaahi ngāue tokoni ko ʻení ʻe he tuku taimi mo e tokoni fakapaʻanga ʻa e ngaahi kaungāmeʻa mei he ngaahi tui fakalotu kehé mo e ngaahi kautaha falalaʻanga ʻoku nau kau fakataha mo kitautolu ʻi he ngāue mohu tāpuekina ko ʻení. ʻI hono ueʻi kitautolu ʻe he sīpinga ʻa Sīsū Kalaisí, ʻoku tau alanima fakataha ai ke hiki hake ʻa e kavenga mafasiá, ʻomi ʻa e fakamoʻuí, mo fakafoki ʻa e ʻamanaki leleí ki he ngaahi fāmilí mo e niʻihi fakafoʻituitui ʻi he ngaahi tūkunga kehekehe.

ʻOku hoko ʻa e meʻatokoni kotoa pē kuo vahevahé, fale hūfangaʻanga kotoa pē kuo langá, mo e loto-ʻofa kotoa pē kuo foakí ko ha konga ʻo e ngāue ʻa e ʻEikí. ʻI heʻetau tokoniʻi e niʻihi kehé, ʻoku tau tauhi moʻoni ai kiate Ia (vakai, Mātiu 25:40). ʻI he founga ko ʻení, ʻoku tau takitaha tali ai ʻEne fekau ke hoko ko ha maama ki māmani pea muimui ki he sīpinga ʻa e Fakamoʻuí ke ʻofa ʻi hotau kaungāʻapí.

ʻOku mau fakamoʻoni ko Sīsū Kalaisi ʻa e uho ʻo e ngāue maʻongoʻongá ni. ʻOfa ke mahutafea hono faitāpuekina kimoutolu ʻe he ʻOtuá koeʻuhí ko hoʻomou leleí, pea fakatauange ke mou ongoʻi ʻEne ʻofá ʻi hoʻomou hokohoko atu ke ʻofa mo tauhi ʻEne fānaú.

—Kau Palesitenisī ʻUluakí