2025 nga Report sa Pagpang-atiman—Mensahe gikan sa Unang Kapangulohan

Minahal nga mga Higala,

Sa dinhi pa si Jesukristo sa yuta, mitudlo Siya og duha ka dagkong sugo: nga higugmaa ang Dios ug “higugmaa ang imong silingan sama sa imong kaugalingon” (Mateo 22:39). Kita gigiyahan pinaagi sa Iyang ehemplo. Isip Ang Simbahan ni Jesukristo sa mga Santos sa Ulahing mga Adlaw, kita nagtinguha sa pagsunod Kaniya pinaagi sa pagpangalagad sa masakiton, pagpakaon sa gigutom, ug paghupay sa gisakit. Ang atoa mao ang pagpangalagad sa dakong kalipay ngadto sa tanan nga anak sa Dios.

Ang 2025 nga Report sa Pagpang-atiman Niadtong Nanginahanglan nagtanyag og lakbit nga pagtan-aw sa talagsaong mga paningkamot nga nahitabo sa tibuok kalibotan pinaagi sa atong mga miyembro. Kini nga mga buhat sa pagserbisyo gipalig-on pinaagi sa mga kontribusyon sa oras ug kwarta o mga butang gikan sa mga higala sa laing mga tinuohan ug sa kasaligan nga mga organisasyon kinsa nakighiusa uban kanato niining bulahan nga buhat. Nadasig pinaagi sa ehemplo ni Jesukristo, nagtambayayong kita sa pagtabang sa pagpagaan sa mga palas-anon, pagdala og kaayohan, ug pagpahiuli sa paglaom sa mga pamilya ug mga indibidwal diha sa managlahi nga mga kahimtang.

Matag pagkaon nga gipakigbahin, matag kapuy-an nga gitukod, matag kamabination nga gitanyag nahimong kabahin sa buhat sa Ginoo. Samtang kita moserbisyo sa uban, kita sa pagkatinuod nagserbisyo Kaniya (tan-awa sa Mateo 25:40). Niini nga paagi, ang matag usa kanato nagtubag sa Iyang tawag nga mahimong usa ka kahayag sa kalibotan ug mosunod sa sumbanan sa Manluluwas sa paghigugma sa atong silingan.

Kami mopamatuod nga si Jesukristo mao ang sentro niining mahinungdanon nga buhat. Hinaot nga ang Dios mopanalangin kaninyo og daghan sa inyong kaayo, ug hinaot nga kamo mobati sa Iyang gugma samtang nagpadayon kamo sa paghigugma ug pag-atiman sa Iyang mga anak.

—Ang Unang Kapangulohan