Fakamatala Fakanounou ʻo e Tokangaekiná 2024—Pōpoaki mei he Kau Palesitenisī ʻUluakí

Si‘i Ngaahi Kaungāmeʻa,

ʻOku mau houngaʻia moʻoni ʻi he foaki lahi homou taimí mo e ngaahi maʻuʻanga tokoní ʻi he 2024. ʻI he taʻu kuo ʻosí, naʻe fakaafeʻi ʻa e kāingalotu mo e ngaahi kaungāmeʻa ʻo e Siasí ke nau fekumi mo tokoni ki he “toko tahá,” ʻo hangē ko ia naʻe akoʻi ʻe Sīsū Kalaisi ʻi Heʻene ngaahi talanoa fakatātaá pea fakahaaʻi ʻi Heʻene ngāue fakafaifekau ʻi he māmaní.

ʻOku fakatupu loto-fakatōkilalo moʻoni hoʻomou ngaahi taliangi fakamātoató. ʻI he funga ʻo e māmaní, kuo mou ngāueʻi ai ʻa e fakaafe ko ʻení ke mou alanima atu ʻo tokoni ki he toko tahá pea ʻofa ki ho kaungāʻapí. ʻOku mau houngaʻia ʻi hoʻomou ngaahi foakí pea ʻoku mau fiefia ke vahevahe ʻa e lipooti ʻo ʻemau ngaahi fengāueʻaki fakataha ʻi he taʻu ní. ʻOku fakahaaʻi ʻe he fakamatala fakanounou ko ʻení ʻa ʻetau tokangaʻi fakataha e fānau ʻa e ʻOtuá ʻi he ngaahi ngāue hangē ko e tokoni ki he ngaahi meʻa fakatuʻupakeé, fafanga ʻo e fiekaiá, mo hono tokangaekina ʻa e tuʻunga lelei ʻo e houʻeiki fafiné mo e fānaú. ʻOku malava ʻa e ngaahi ngāue ko ʻení ʻi hoʻomou angaʻofá, ʻo fengāueʻaki fakataha mo ha ngaahi kautaha falalaʻanga, pea ʻoku fakatupulaki ia ʻe he angalelei ʻa e kakai ʻi he feituʻu kotoa pē ʻoku nau feinga ke tokangaʻi honau kaungāʻapi ʻoku faingataʻaʻiá.

ʻI he hokohoko atu ʻetau tokangaʻi e fānau ʻa e ʻOtuá, te tau lava ʻo tokoniʻi kinautolu ke nau ongoʻi ʻEne ʻofa fakalangí. ʻOku ʻofa ʻa e Tamai Hēvaní ʻi Heʻene fānaú takitaha pea ʻokú Ne ʻafioʻi ʻa e ngāue lelei ʻoku nau fakahokó. ʻOku mau fakaafeʻi koe ke hokohoko atu hoʻo tokoni mo ʻofa ʻiate kinautolu ʻoku mou feohí. Fakatauange ʻe tāpuakiʻi koe ʻe he ʻOtuá ʻi hoʻo ngaahi ngāue faivelengá.

—Kau Palesitenisī ʻUluakí