Russell M. Nelson

’Ua fānauhia ’oia i te 9 nō Setepa 1924 ’e e tamaiti te peresideni Nelson nō Marion C. rāua ’o Edna Anderson Nelson. ’Ua fānau rāua tāna vahine mātāmua, ’o Dantzel White, e ’ahuru tamari’i. ’Ua pohe te tuahine Nelson i te ’āva’e Fepuare 2005. I te ’āva’e ’Ēperēra 2006, ’ua fa’aipoipo ’oia ia Wendy L. Watson.

Hou tāna tāvinira’a ’ei upo’o fa’atere nō te ’Ēkālesia, ’ua tāvini te peresideni Nelson ’ei peresideni nō te Tino ’Ahuru Ma Piti ’āpōsetolo mai te 15 nō Tiurai 2015, tae atu i tōna pi’ira’ahia ’ei fa’atere nō te ’Ēkālesia. ’Ua tāvini ’oia ’ei melo nō taua pupu ra mai te 7 nō ’Ēperēra 1984.

E taote tu’iro’o ’oia nā te ao nei, ’ei taote tāpū ’e ’ei taote mā’imi. ’Ua fāri’i te Taote Nelson i tāna parau tū’ite Licence ’e te Master i te fare ha’api’ira’a tuatoru University of Utah (1945, 47). E melo ’oia nō te mau fare auhoa ha’api’ira’a teitei Phi Beta Kappa ’e Alpha Omega Alpha. ’Ua ha’api’ipi’i ’oia i te ’ohipa tāpū i nā fare ha’api’ira’a tuatoru ra Massachusetts General Hospital i Boston ’e University of Minnesota, i reira ’oia i te fāri’ira’a i tāna parau tahu’a tuatoru [Doctorat] i te matahiti 1954. ’Ua fāri’i ato’a ’oia i te parau tū’ite Taote ihi [Docteur en Sciences] i te fare ha’api’ira’a tuatoru Brigham Young University, i te matahiti 1970, te parau tū’ite Taote rapa’au [Docteur en médecine] i te fare ha’api’ira’a tuatoru University of Utah i te matahiti 1989, ’e te parau tū’ite Taote ihi orara’a ta’ata [Docteur en Lettres et sciences humaines] i te fare ha’api’ira’a tuatoru Snow College i te matahiti 1994.

’Ua mau iāna te mau ti’ara’a ’orometua mā’imi nō te ’ohipa tāpū, upo’o fa’atere nō te Tuha’a ha’api’ipi’ira’a tāpū ’ōuma i te fare ha’api’ira’a tuatoru University of Utah ’e tae noa atu te ti’ara’a peresideni nō te Tuha’a tāpū ’ōuma i te fare ma’i a te ’Ēkālesia i Roto Miti.

’Ua pāpa’i ’oia e rave rahi mau buka nō ni’a i te ’ohipa taote, ’e ’ua paraparau ’e ’ua rātere te peresideni Nelson nā roto i te tā’āto’ara’a o te fenua Marite ’e nā roto i te tahi atu mau fenua hou ’a pi’ihia ai ’oia ’ei Huimana fa’atere rahi. E rave rahi feti’a ’e mau fa’ahanahanara’a tei fāri’ihia e āna, mai te Distinguished Alumni Award nō te University of Utah ; te Heart of Gold Award nō te American Heart Association ; te hō’ē fa’ahanahanara’a nō te tāvinira’a nā te ao nei, tei hōro’ahia mai e te American Heart Association ; ’e te Golden Plate Award, tei horo’ahia mai e te American Academy of Achievement. ’Ua fa’ahanahanahia ’oia ’ei ’orometua rahi i roto e toru fare ha’api’ira’a tuatoru i te Rēpūpirīta nūna’a nō Taina.

’Ua tāvini te Taote Nelson ’ei peresideni nō te Society for Vascular Surgery [Sōtaiete nō te tāpūra’a uaua], ’ei upo’o fa’atere nō te American Board of Thoracic Surgery [Tōmite fa’atere marite nō te tāpūra’a ’ouma], ’ei fa’atere nō te Council on Cardiovascular Surgery [’Āpo’ora’a fa’atere nō te tāpūra’a māfatu] nō te American Heart Association, ’e ’ei peresideni nō te Utah State Medical Association [’Āmuitahira’a taote rapa’au nō Utah].

’Ua tāpurahia tōna i’oa i roto i te mau buka Who’s Who [’O vai terā] nō te ao ato’a nei, nō Amerika ’e nō te pae fa’aro’o.

’Ua mau te peresideni Nelson i te mau ti’ara’a e rave rahi i roto i te ’Ēkālesia. ’Ua tāvini ’oia ’ei peresideni nō te titi nō Bonneville mai te matahiti 1964 ē tae atu i te ’āva’e Tiunu 1971, ’a pi’ihia ai ’oia ’ei peresideni rahi nō te Ha’api’ira’a Sābati. Hou ’a piihia ai ’oia i roto i te pupu nō te Tino ’Ahuru Ma Piti ’āpōsetolo, e ti’a retiōni ’oia nō te retiōni nō Kearns, i Utah. Nā mua atu i te reira, ’ua tāvini ’oia ’ei ti’a retiōni nō te fare ha’api’ira’a teitei nō BYU.