Russell M. Nelson

Na soifua mai i le aso 9 o Setema, 1924, ma o Peresitene Nelson o le alo o Marion C. ma Edna Anderson Nelson. O ia ma lona faletua ua maliu, o Dantzel White, e toasefulu o la alo. Na maliu Sister Nelson ia Fepuari 2005. Ia Aperila 2006, na faaipoipo ai o ia ia Wendy L. Watson.

Ao lei avea o ia ma faauluuluga o le Ekalesia, sa auauna atu Peresitene Nelson o se peresitene o le Korama a Aposetolo e Toasefululua mai le aso 15 Iulai, 2015, seia oo i lona valaauga o se taitai o le Ekalesia. Na ia galue o se uso o lena korama talu mai le aso 7 Aperila, 1984.

O se foma’i tipitipi lauiloa i le lalolagi ma se tagata suesue faafoma’i, na mauaina e Dr. Nelson ana tikeri o le B.A. ma le M.D. mai le Iunivesite o Iuta (1945, 47). O sosaiete faasikola maualuluga faamamaluina o loo avea ai o ia ma sui e aofia ai le Phi Beta Kappa ma le Alpha Omega Alpha. Na galue o ia i lona tulaga aloaia i le faia o taotoga i le Maota Gasegase i Masatusa ma le Iunivesite o Minesota, lea na tauaaoina atu ai i ai lona Faailoga Ph.D. i le 1954. Na ia mauaina foi faailoga faamamaluina o le Fomai o Saienisi mai le Iunivesite o Polika Iaga i le 1970, Fomai o Saienisi Faafomai mai le Iunivesite o le Setete o Iuta i le 1989, ma le Fomai o Humane Letters mai le Kolisi o Snow i le 1994.

O lana galuega faapolofesa na aofia ai tulaga o le polofesa suesue o taotoga ma le faatonu sili o le Thoracic Surgery Residency i le Iunivesite o Iuta, ma le taitaifono o le Vaega o le Thoracic Surgery i le Falemai o le AAG i le Aai o Sate Leki.

O se tusitala o le tele o lomiga ma mataupu i tusi faafomai, sa faiaoga foi Peresitene Nelson ma asiasi atu faapolofesa i vaega eseese o le Iunaite Setete ma le tele o isi atunuu a o lei valaauina i lona tofiga e avea ma se Pulega Aoao. E anoanoai taui ma faamamaluga na tauaaoina atu ia te ia, e aofia ai le Taui Taualoa a le Aluminae, Iunivesite o Iuta; o le Taui o le Heart of Gold [Taui o le Fatu Auro] mai le Asosi o Fatu i Amerika; o se tusi faamaonia mo le Tautua Faavaomalo mai le Asosi o Fatu i Amerika; ma le Taui o le Peleti Auro [Golden Plate Award], na tauaaoina atu e le Ausiaga Faaakatemia i Amerika [American Academy of Achievement]. Na tauaaoina atu foi ia te ia ni taui faamamaluina faapolofesa mai i iunivesite e tolu o le Malo Ripapelika o Saina.

Sa avea Dr. Nelson ma peresitene o le Society for Vascular Surgery [Sosaiete a Fomai Tipitipi o Alatoto], o se faatonu sili o le Fono Faatonu o Fomai Tipitipi o Fatafata a Amerika [American Board of Thoracic Surgery], o le taitaifono o le Council on Cardiovascular Surgery [Aufono Faufautua o Fomai Tipitipi o le Fatu ma Alatoto o le Asosi Fatu Amerika] ma peresitene o le Asosi Faafoma’i o le Setete o Iuta.

O loo aofia ai o ia i le Tagata Iloga i le Lalolagi, Tagata Iloga i Amerika, ma le Tagata Iloga i Talitonuga Faalelotu.

E tele tofiga faaletaitai na umia e Peresitene Nelson i le Ekalesia. Na avea o ia ma se peresitene o le siteki o le Siteki a Bonneville mai le 1964 e oo atu ia Iuni 1971, ina ua tofia o ia e avea ma peresitene aoao o le Aoga Sa. Na muamua atu i lona valaauga i le Korama a Aposetolo e Toasefululua, sa avea o ia ma se sui risone na tofia i le Risone o Kearns Iuta. Sa avea talu ai o ia ma se Sui Risone o le Iunivesite o Polika Iaga.