Au Peresitene Sili
O Iesu Keriso e taitaia Lana Ekalesia e ala i se perofeta, o le e galue o le Peresitene o le Ekalesia, ma Aposetolo e toalua e valaauina e avea ma fesoasoani o le perofeta. O lenei vaega ua ta’ua o le Au Peresitene Sili, ma o le tino aupito maualuga lea e pulea le Ekalesia.
O sui auai o le Au Peresitene Sili o Aposetolo a Iesu Keriso. Faatasi ai ma isi Aposetolo, o i latou o molimau faapitoa a Iesu Keriso, ua valaauina e aoao atu ma molimau atu ia te Ia i le lalolagi atoa. Latou te malaga soo, lauga ma fautuaina aulotu toatele o tagata o le Ekalesia ma isi, faapea foi ma le feiloai ai ma taitai o le Ekalesia. Latou te sailia le taitaiga mai ia Iesu Keriso a o latou vaaia mataupu e aafia ai le faitau miliona o tagata o le Ekalesia i le lalolagi atoa. O nei mataupu e aofia ai le galuega faafaifeautalai, fesoasoaniga alofa, auaunaga i le malumalu, aoaoga o le talalelei, ma le tele o isi mea.
O le Peresitene o le Ekalesia o le Aposetolo sinia i taimi uma—o le tagata ua auauna atu o se uso o le Korama a Aposetolo e Toasefululua mo le taimi aupito umi. Pe a maliu se Peresitene o le Ekalesia, o le Isi Aposetolo sinia e sosoo ai e avea ma Peresitene o le Ekalesia ma e filifilia fesoasoani e galulue faatasi ma ia i le Au Peresitene Sili. E ui o uso uma o le Korama a Aposetolo e Toasefululua e lagolagoina o “perofeta, tagatavaai, ma talifaaaliga,” o le faaupuga “o le perofeta” e faasino i le Peresitene o le Ekalesia.
E ala i savali musuia a le Au Peresitene Sili ma le Korama a Aposetolo e Toasefululua, e tuuina mai ai e le Alii faatonuga i Lana Ekalesia, e aofia ai le taitaiga e fesoasoani ai i tagata o le ekalesia i luitau latou te oo i ai i le olaga.
Sa muai faatulagaina le Au Peresitene Sili e Iosefa Samita, le uluai perofeta o le Ekalesia.