Russell M. Nelson

Natawo niadtong Septyembre 9, 1924, si Presidente Nelson anak nila ni Marion C. ug ni Edna Anderson Nelson. Siya ug ang iyang asawa, ang kanhi Dantzel White, adunay napulo ka anak. Si Sister Nelson namatay niadtong Pebrero 2005. Niadtong Abril 2006, naminyo siya ni Wendy L. Watson.

Sa wala pa ang iyang pagserbisyo isip pangulo sa Simbahan, si Presidente Nelson nakaserbisyo isip presidente sa Korum sa Napulog Duha ka Apostoles gikan sa Hulyo 15, 2015, hangtud sa iyang pagkatawag isip lider sa Simbahan. Nakaserbisyo siya isip sakop niana nga korum sukad niadtong Abril 7, 1984.

Usa ka inila sa tibuok kalibotan nga doktor sa pag-opera [surgeon] ug medikal nga tigpaniksik, si Dr. Nelson nakadawat sa iyang B.A. ug M.D. nga kurso gikan sa University of Utah (1945, 47). Mga pasidungog sa eskolastika nga mga katilingban naglakip sa Phi Beta Kappa ug sa Alpha Omega Alpha. Napahigayon niya ang iyang pagbansay sa pag-opera [residency] didto sa Massachusetts General Hospital sa Boston ug sa University of Minnesota, diin nahatagan siya sa iyang Ph.D. Degree niadtong 1954. Nakadawat usab siya og mga honorary degree sa pagka-Doctor of Science gikan sa Brigham Young University niadtong 1970, Doctor of Medical Science gikan sa Utah State University niadtong 1989, ug Doctor of Humane Letters gikan sa Snow College niadtong 1994.

Ang propesyonal niya nga pagpanarbaho naglakip sa mga posisyon nga research professor of surgery ug director sa Thoracic Surgery Residency sa University of Utah ug tsirman sa Division of Thoracic Surgery sa LDS Hospital sa Siyudad sa Salt Lake.

Tigsulat sa daghang gipangmantala nga mga publikasyon ug mga kapitulo sa medikal nga mga basahon, si Presidente Nelson propesyonal nga nakapanudlo ug nakabisita libot sa Estados Unidos ug sa daghan pang ubang mga kanasoran sa wala pa siya matawag nga General Authority. Daghan kaayo nga mga ganti ug mga pasidungog ang miabot kaniya, lakip na ang Distinguished Alumni Award gikan sa University of Utah; ang Heart of Gold Award gikan sa American Heart Association; usa ka citation for International Service gikan sa American Heart Association; ug ang Golden Plate Award, nga gihatag sa American Academy of Achievement. Gihatagan siya og mga honorary professorship gikan sa tulo ka unibersidad sa People’s Republic of China.

Si Dr. Nelson nakaserbisyo isip presidente sa Society for Vascular Surgery, direktor sa American Board of Thoracic Surgery, tsirman sa Council on Cardiovascular Surgery alang sa American Heart Association, ug presidente sa Utah State Medical Association.

Lakip siya sa lista sa Kinsa ang Nailhan sa Kalibotan (Who’s Who in the World), Kinsa ang Nailhan sa Amerika (Who’s Who in America), ug sa Kinsa ang Nailhan sa Relihiyon (Who’s Who in Religion).

Si Presidente Nelson nakahupot og daghang responsibilidad sa Simbahan. Nakaserbisyo siya isip presidente sa stake sa Bonneville Stake gikan 1964 hangtud sa Hunyo, 1971, dihang gitawag siya nga kinatibuk-ang presidente sa Sunday School. Sa wala pa ang iyang tawag ngadto sa Korum sa Napulog Duha ka Apostoles, nag-alagad siya isip Regional Representative nga gi-assign ngadto sa Kearns Utah Region. Kaniadto nagserbisyo siya isip Regional Representative sa Brigham Young University.