Unang Kapangulohan
Si Jesukristo nangulo sa Iyang Simbahan pinaagi sa usa ka propeta, kinsa molihok isip ang Presidente sa Simbahan, ug duha ka Apostol nga tawagon nga mahimong mga magtatambag sa propeta. Kini nga grupo nailhan nga ang Unang Kapangulohan, ug kini mao ang kinatas-an nga nagdumala nga pundok sa Simbahan.
Ang mga sakop sa Unang Kapangulohan mga Apostol ni Jesukristo. Kuyog sa ubang Apostoles, sila espesyal nga mga saksi ni Jesukristo, gitawag sa pagtudlo ug pagpamatuod bahin Niya sa tibuok kalibotan. Kanunay silang mobiyahe, mamulong ug moawhag sa dagko nga mga kongregasyon sa mga miyembro sa Simbahan ug sa uban, ingon man sa pagpakigtagbo sa mga lider sa Simbahan. Sila magtinguha og direksiyon gikan ni Jesukristo samtang sila modumala sa mga butang nga makaapekto sa minilyon ka miyembro sa Simbahan sa tibuok kalibotan. Kini nga mga butang naglakip sa misyonaryo nga buhat, makitawhanon nga tabang, pagserbisyo sa templo, panudlo sa ebanghelyo, ug mas daghan pa.
Ang Presidente sa Simbahan kanunay nga mao ang senior nga Apostol—ang tawo kinsa miserbisyo isip usa ka sakop sa Korum sa Napulog Duha ka Apostoles sa kinatas-ang panahon. Kon ang Presidente sa Simbahan mamatay, ang sunod nga senior nga Apostol mahimong ang Presidente sa Simbahan ug mopili og mga magtatambag nga moserbisyo uban niya diha sa Unang Kapangulohan. Samtang ang tanang miyembro sa Korum sa Napulog Duha ka Apostoles gipaluyohan isip “mga propeta, mga manalagna, ug mga tigpadayag,” ang termino nga “ang propeta” nagpasabot sa Presidente sa Simbahan.
Pinaagi sa dinasig nga mga mensahe sa Unang Kapangulohan ug sa Korum sa Napulog Duha ka Apostoles, ang Ginoo mohatag og mga instruksiyon ngadto sa Iyang Simbahan, lakip sa giya nga motabang sa mga miyembro nga adunay mga hagit nga ilang nasinati sa kinabuhi.
Ang Unang Kapangulohan orihinal nga giorganisar ni Joseph Smith, ang unang propeta sa Simbahan.