Erie Canal

Ang Erie Canal adunay importanteng tahas sa pag-usab sa kaugmaon sa ekonomiya sa Kasadpang New York. Ang 584 kilometros nga sistema sa kanal midangat og walo ka tuig aron makompleto ug makonektar ang Buffalo sa silangang baybayon sa Lake Erie ngadto sa Albany ug sa Hudson River. Sa kataposan, kining bag-o taas nga agianan sa tubig naghatag og mas sayon nga paagi sa pagdala sa mga butang ug mga tawo ngadto ug gikan sa pantalan sa New York City ug sa mga pamuloy-an sa nag-uswag nga mga utlanan sa New York, Pennsylvania, ug Ohio.

Ang Erie Canal nakatabang sa paghimo sa nagkadako na nga lungsod sa Palmyra, New York, ngadto sa usa ka makugihon, maayong pagkasumpay nga lungsod sa kanal. Ang nagtubo nga industriyal nga komunidad sa Palmyra naglakip sa negosyo sa muwebles, duha ka himoanan og panit, usa ka brick yard, galingan, ashery, ug usa ka malamposon nga distilling operation. Human maablihan ang kanal niadtong 1825, ang koneksiyon tali sa Palmyra ug sa ubang bahin sa rehiyon misangpot sa pag-uswag sa rehiyon sa naglambo nga industriya sa pagpang-imprinta nga naghimo sa E.B. Grandin nga bag-o pang printahanan nga maayong dapit alang sa pag-imprinta ug pag-apod-apod sa Basahon ni Mormon.

Karon ang kanal adunay usa ka agianan sa paglakaw ug pagbisikleta, nga moagi sa Pal-Mac Aqueduct County Park, nga ubos sa duha ka kilometro gikan sa Printahanan ni Grandin. May pangpublikong parkinganan usab, ug ang agianan nagtanyag ug nindot nga talan-awon sa likod nga bahin sa makasaysayanong mga bilding sa Palymyra.