Lubnganan ni Alvin Smith

Natawo sa Vermont niadtong 1798, si Alvin Smith mao ang kinamagulangan nga nakalahotay nga anak ni Joseph Smith Sr. ug Lucy Mack ug magulang nga igsoong lalaki ni Joseph Smith Jr. Si Alvin adunay dakong tahas sa pagbalhin sa pamilya gikan sa Vermont ngadto sa Palmyra, New York, ug usa ka lig-ong tumutuo sa langitnong mga pagpakita kang Joseph Smith. Giawhag ni Alvin si Joseph nga magpabiling matinud-anon aron iyang madawat ang Basahon ni Mormon. Niadtong Nobiyembre 1823, namatay si Alvin sa edad nga 25. Gihinumdoman siya isip usa ka buotan ug matinud-anon nga tawo.

Naapektohan pag-ayo si Joseph Smith Jr. sa pagkamatay ni Alvin nga iyang gihigugma pag-ayo. Niadtong Enero 1836, samtang nakigkita sa mga Elder sa ikatulong andana sa Kirtland Temple, nakita ni Joseph Smith si Alvin sa celestial nga gingharian diha sa panan-awon. “Ug katingalahan kon giunsa kini nga siya nakakuha og kabilin niana nga gingharian, nakakita nga siya mibiya niini nga kinabuhi sa wala pa ang [Ginoo] makapahimutang sa iyang kamot aron pagpundok sa Israel sa ikaduha nga higayon, ug wala pa mabunyagi alang sa kapasayloan sa mga sala” misulat si Joseph Smith (Doktrina ug mga Pakigsaad 136:6). Niini nga pagpadayag, ang Ginoo mitudlo nga ang “Tanan kinsa namatay nga walay kahibalo niini nga ebanghelyo, kinsa unta makadawat niini kon sila gitugotan pa sa pagpabilin, mahimo nga manununod sa celestial nga gingharian sa Dios” (Doktrina ug mga Pakigsaad 137:7). Samtang kini nga pagpadayag nagtanyag og kahupayan ngadto ni Joseph nga si Alvin maluwas na, dili pa klaro kon giunsa kini pagkahitabo. Si Joseph Smith padayon sa pagpamalandong ug pag-ampo sa dugang panabot diin mitapos sa pagpadayag nga ang tanang ordinansa sa pagkapari mahimo ngadto sa mga buhi ug ngadto sa mga patay diha sa balaang mga templo pinaagi sa pag-proxy.

Basaha ang mahitungod sa panan-awon ni Joseph Smith kabahin ni Alvin sa Mga Santos Volume 1, Kapitulo 21.

Unsay Malaoman

Ang Lubnganan ni Alvin Smith dili opisyal nga makasaysayanong dapit sa Simbahan, apan ang mga bisita gihangop nga matinahurong motan-aw sa lubnganan niining lokal nga sementeryo.