Iza moa izahay

Afaka mahita anay miaina sy miasa ary mikarakara ny fianakaviana manerana izao tontolo izao ianao. Ho anay, ny fandraisana anjara eo anivon’ny fiarahamonina misy anay dia fomba iray ahafahanay mitia ny namanay araka ny nampianarin’i Jesoa.

Izahay rehetra dia samy mandray anjara eo anivon’ny fiangonana misy anay eo an-toerana, amin’ny alalan’ny fananana anjara asa eo amin’ny fitarihana sy amin’ny alalan’ny fanaovana lahateny izay nampiandraiketina ary amin’ny alalan’ireo fahafahana manao zavatra an-tsitrapo, fa tsy manana mpitondra fivavahana mandray karama.

Ho anay, ny fiangonana dia mihoatra noho ny fitsaohana isaky ny alahady. Toerana iray ahafahana mahita fanohanana amin’ny alalan’ny finamanana sy ny zavatra iainana koa izany izay manamafy orina ny finoana sy manolotra fanampiana mahasoa eo anatrehan’ireo olana eo amin’ny fiainana.

Any anatin’ireo vondrona mpiangona eo an-toerana izay miisa 30.000 mahery manerana izao tontolo izao, dia mivondrona miaraka amin’ireo olona hafa eo anivon’ny fiarahamonina misy azy ireo ny olona mba hitsaoka, hivavaka, hihira hira ao amin’ny fihirana, ary handalina ny filazantsaran’i Jesoa Kristy.

Mandritra ny herinandro, ny olona ao anatin’ny sokajin-taona rehetra dia mivondrona mba hanatrika kilasy, toy ny seminera ho an’ny zatovo na institiota ho an’ny tanora tokan-tena sy mpivady vao herotrerony, mba hiaraka handalina ny fampianaran’i Jesoa.

Ny tetikasa fanompoana dia singa iray tsy tapaka mandrafitra ny fiaraha-mientana ataon’ny Fiangonana ary fomba iray manan-danja hankatoavanay ilay didin’ Andriamanitra mba hitia ny namanay.

Ireo mpiangona ao aminay dia isan’ireo mponina ao amin’ireo toerana ipetrahanay, ary miezaka mafy izahay mba ho mpifanolobodirindrina sy namana tsara. Ireo fiaraha-mientana ara-tsôsialy dia ampahany mahafinaritra sy manan-danja ao anatin’ny fanorenana fiarahamonina eo anivon’ny fiangonana.

Ny fifandraisana mafy orina eo amin’ny fianakaviana dia mahatonga ity fiainana ity ho feno fifaliana ary manampy antsika hanorina ilay karazana tontolo tiantsika haorina. Ny zavatra iainanay ao am-piangonana sy ny asa fanompoana ataonay dia manampy amin’ny hisian’ny fifandraisana lalina kokoa sy feno fitiavana eo anivon’ny fianakaviana.

Ny fahatongavana amin’ilay karazana olona hantenainay hahatongavana dia ampahany manan-danja eo amin’ny fiainanay ao amin’ny fiangonanay. Ireo fandaharan’asan’ny Fiangonana dia manampy ny olona hianatra sy hivoatra ara-panahy sy amin’ny fomba mahasoa amin’ny alalan’ny filazantsaran’i Jesoa Kristy.

Ny Fiangonana dia tarihin’ny mpaminany iray sy ireo apôstôly amin’izao fotoana izao, izay manaraka ilay lamina napetrak’i Jesoa Kristy mba hitarihana ny olony tamin’ny andron’ny Baiboly. Manompo sy miasa eo ambanin’ny fitarihany mifono fanentanam-panahy ireo mpitarika ireo. Afaka mianatra misimisy kokoa momba azy ireo ianao ato.

Lehilahy sy vehivavy avy amin’ny sehatra rehetra eo amin’ny fiainana dia manampy amin’ny fitarihana ny asan’ny Fiangonana maneran-tany sy eo anivon’ny faritra. Ohatra iray amin’izany ny vehivavy mitarika ny Fikambanana Ifanampiana.

Ireo mpiangona eo an-toerana dia tarihin’ny mpikambana ao amin’ny Fiangonana izay manolotra an-tsitrapo ny fotoanany, fa tsy mpitondra fivavahana mandray karama. Tohanan’ireo olon-tsotra hafa mpikamban’ny Fiangonana izy ireo izay manampy amin’ny zavatra rehetra manomboka any amin’ny fampianarana ireo kilasin’ny Sekoly Alahady ka hatrany amin’ny fanadiovana ny trano fiangonana.

Rehefa mitsidika ny mpiangona ao aminay ianao dia hahatsikaritra fa mifampianatra izahay ary miara-mianatra avy amin’ny soratra masina. Mino izahay fa ny olona tsirairay dia manana zavatra sarobidy atolotra mba ho anjara biriky, noho izany dia mangataka olona maro samihafa ireo mpitarika mba hitory eny amin’ny polipitra, hivavaka, ary hampianatra kilasy.