ʻŪ Sieke ne hala Hono Pākí

Founga Ngāue he MLS

Fai e meʻá ni kapau naʻe hala hono paaki e sieke ʻi he MLS:Kosiʻi e ngaahi fakamoʻoni hingoa he sieke ne pākí, pea fakaʻauha e konga ʻoku ʻi ai e ngaahi fakamoʻoni hingoá. Tauhi e toenga ʻo e sieké mo e konga ʻo e laʻi sieké ʻoku pipiki ki he tohi sieké fakataha mo e ngaahi fakamatala fakapepa ki he kulupu (batch) ʻo e fakamole ko iá. ʻE fie maʻu ke ke fai ʻeni koeʻuhí ko e kau ʻaotitá. Tauhi ia he taʻu ʻe tolu kau ai e taʻu lolotongá ʻi he ʻIunaiteti Siteití pe taʻu ʻe nima kau ai e taʻu lolotongá ʻi Kānata. Ki he ngaahi fonua kehé, muimui he ngaahi fakahinohino mei he ʻofisi pule ʻoku mou fengāueʻakí.Fakataʻeʻaongaʻi e sieke ʻi he MLS ʻaki hono fai ʻo e ngaahi meʻá ni:

1. ʻI he menu he MLS ki he lisí, lomiʻi ʻi he Meʻa Fakapaʻangá.
2. Lomiʻi ʻi he Vakaiʻi/Fakamatala Fakamuimuitaha ʻo e Ngaahi Fakamolé.
3. Lomiʻi ʻi he fehokotakiʻanga ʻo e fika sieke ʻoku fie maʻu ke ke fakataʻeʻaongaʻí. Fakatokangaʻi ange: Kapau ʻoku ʻikai ke lisi e fika ʻo e sieké he MLS, ʻoku ʻikai toe fie maʻu ha ngāue ia ki ai.
4. Lomiʻi ʻi he Fakataʻeʻaongaʻí.
5. ʻE ʻasi atu ha window ʻo lisi atu e ngaahi ʻuhinga te ke lava ke fakataʻeʻaongaʻi ai ha sieké. Lomiʻi ʻi he Hoko Atú.
6. Fakahū e ʻuhinga ʻokú ke fakataʻeʻaongaʻi ai e sieké. Lomiʻi ʻi he OK.

ʻOku ʻasi e ngaahi sieke fakataʻeʻaongaʻí ʻi he screen ʻo e Vakaiʻi/Fakamatala Fakamuimuitaha ki he Ngaahi Fakamolé mo e foʻi fakaʻilonga fakafetuʻu ʻe tolu (***) kimuʻa he fika fakafekauʻakí.