Tsʼoʼok u Kaʼayantal u Chukaʼanil u Maʼalob Péeksil Jesucristo

Jach kik tsʼáaik ojéetbil Yuumtsileʼ u yaakuntmaj U paalaloʼob teʼ tuláakal luʼumil yóokʼolkabaʼ. Yuumtsil le Taataoʼ u tsʼáamaj toʼon le kʼujul síijil, le minaʼan u jeel kuxtalil yéetel le toksaj tambesaj minaʼan u xuul yoʼolal U Yaakunaj Paal Jesucristo. Yoʼolal u páajtalil le Taataoʼ, Jesuseʼ kaʼa kuxlajiʼ yéetel tu wekʼaj le kíimiloʼ. Letiʼeʼ ik Toksajil, ik Weʼesajil yéetel ik Áantajil.

Tsʼoʼok u máan doscientos jaʼaboʼob, tiʼ jumpʼéel kíichkelem jaʼatskab yáaxkʼiinoʼ tiʼ 1820, le táankelem Jose Smithoʼ, taakchaj u yojéeltik tiʼ máakalmáak najil Kʼuj kʼanaʼan u núupkubaj. Bin túun payalchiʼ teʼ kʼáax maʼ náach tiʼ u yotoch, tu xamáan tiʼ u luʼumil Nueva York teʼ Estados Unidos, tuméen taak u yojéeltik bix jeʼel u toksaʼaj u pixan, u yoojel xan Yuumtsileʼ yaan u yeʼesik tiʼ.

Yéetel kaambal óolaleʼ, kik aʼalikeʼ u payalchiʼeʼ núukaʼabiʼ, Yuumtsil le Taatáa yéetel U Paal Jesucristoeʼ chikpajoʼob tiʼ Jose, beytúun Letiʼobeʼ tu chúunsajoʼob u kaʼa yaantal tuláakal baʼaloʼob (ileʼex Hechos 3:21) jeʼel bix aʼalaʼab teʼ Bibliaoʼ. Yoʼosak le baʼax tu yilajoʼ, tu yojéeltaj Jose u Najil Cristo tiʼ u kʼiinil Túumben Tsʼíibiltʼaaneʼ xuʼul teʼ yóokʼol luʼumaʼ kaʼ tsʼoʼok u kíimil le yáax apostoloʼoboʼ. Josejeʼ yaʼab baʼal tu beetaj yoʼolal u kaʼa yaantal.

Kik jaajkuntik kaʼaten u tʼaan le Taatáa yéetel U Paal, teʼ kaʼanoʼoboʼ taaloʼob taasaj tʼaanoʼob utiaʼal u kaʼansikoʼob Jose, utiaʼal xan u jeetsʼkuntikoʼob u Najil Jesucristo. Le kaʼa kuxaʼan Juan Bautista tu kaʼa taasaj le páajtalil utiaʼal le okjaoʼ ichil jaʼ utiaʼal u luʼusaj kʼeban. Le óoxtúul tiʼ le kaʼalajun yáax apostoloʼob—Pedro, Santiago yéetel Juaneʼ—tu kaʼa taasoʼob le apostolil yéetel le yabeʼob tiʼ u páajtalil tiʼ le sacerdocioil. Taal u jeeloʼob xan, ichileʼ tiʼan Elias le Aj bóobatoʼ, le máax tu kaʼa taasaj u páajtalil utiaʼal u tsaykubaj láakʼtsilil ku bin kʼiin, ku kʼaxkubaʼob minaʼan u xuul kex kíimikoʼ.

Kik tsʼáaik xan jaajiltʼaan tsʼáab tiʼ Jose Smith u síibalil yéetel u páajtalil le Yuumtsil utiaʼal u suut tsʼíibtik le úuchben tsʼíiboʼoboʼ: U Áanalteʼil Mormoneʼ, U Láakʼ Tsʼíibiltʼaan Jesucristo. Ichil le wáaloʼob tiʼ le kʼuyel tsʼíibaʼ yaan u xookil u kaʼansajil Jesucristo ichil le wíinikoʼob way luʼumeʼ tuʼux yaanoʼon bejlaʼeʼ chéen pʼéel U Kaʼakuxtaloʼ. Le áanalteʼoʼ ku kaʼansik u yoʼosakil le kuxtalaʼ yéetel ku tsolik u kaʼansajil Cristo, le kaʼansajilaʼ jach kʼabéet utiaʼal le jeʼelaʼ. Bey jumpʼéel kʼuyel chuuk tsʼíibil utiaʼal le Bibliaoʼ, le Áanalteʼil Mormonoʼ ku yaʼalikeʼ toʼoneʼ u paalaloʼon ik Jkaʼanil Taatáa, ku yáakuntikoʼon. Ku yaʼalik xaneʼ Letiʼeʼ yaan jumpʼéel kʼujul tuukul utiaʼal ik kuxtal yéetel U Paal Jesucristoeʼ ku tʼaankoʼon bejlaʼeʼ, bey tu beetaj teʼ úuchben kʼiinoʼoboʼ.

Kik aʼalik U Najil Jesucristo tiʼ le Maʼalob Wíinikoʼob tiʼ le Tsʼook Kʼiinoʼob, chúunsabij tiʼ 6 tiʼ kan wiʼinal tiʼ 1830, leteʼ u Najil Cristo tsʼáab tu kaʼatéen bey tu kʼiinil Túumben Tsʼíibiltʼaan. U Najil Kʼujaʼ makʼantaʼan yóokʼol U toj kuxtalil Jesucristo, Letiʼeʼ u noj tuunichil le chuun pakʼoʼ, yóokʼol U Toksajil minaʼan u xuul, yóokʼol U jaajil Kaʼakuxtal. Jesucristoeʼ tu tʼaanaj tu kaʼatéen U apostoloʼob kaʼ tu tsʼáaj tiʼob u páajtalil tiʼ le sacerdocio. Letiʼeʼ ku tʼaanik tuláakal kaʼ taakoʼon tu Najil utiaʼal ik kʼamik le Kiliʼich Pixanoʼ, u tsolmeyajiloʼob, áantajil yéetel kiʼ óolal minaʼan u xuul.

Tsʼoʼok u máan doscientos jaʼaboʼob, kaʼ tu chunoʼob le Kaʼayantal tuméen Yuumtsil le Taataoʼ yéetel U Yaakunaj Paal Jesucristo. Yaʼabkach wíinikoʼob tuláakal yóokʼolkabeʼ tsʼoʼok u kʼamkoʼob u kʼajóolalil tiʼ le baʼaloʼob aʼalaʼan úuchilak.

Yéetel kiʼimak óolal kik aʼalikeʼ le Kaʼayantal aʼalaʼanoʼ túun bíin u nojochtal yéetel yeʼesil tiichʼkʼiin. Le luʼumaʼ tsʼoʼok u kʼéexpajal tuméen Yuumtsileʼ yaan u muuchʼkintik tuláakal baʼaloʼob tiʼ Cristo (ileʼex Efesios 1:10).

Yéetel chíimpoolil yéetel níibóolalil, bey U apostoloʼobeʼ kik tʼaanik tuláakal wíinikoʼob kaʼ u yojéeltoʼob—bey ik ojel toʼoneʼ—le kaʼanoʼ jekʼaboʼob. Kik kaʼa aʼalik Yuumtsileʼ táan u tsʼáaik ojeltbiʼ U yóolal utiaʼal u yaakunaj paalaloʼob. Kik jaajkuntik le máaxoʼob kʼamik yéetel pixanil payalchiʼeʼ u kaʼansajil le Kaʼayantal yéetel u beetoʼob yéetel oksajóolal yaan u kiʼikiʼitʼaaniloʼob utiaʼal u kʼamkoʼob u jaajiltʼaanoʼob tiʼ le kʼujul yéetel u yoʼosakil utiaʼal u liʼiskubaʼ le yóokʼolkabaʼ utiaʼal le Kaʼa Suut aʼalaʼan yóokʼol le Kʼuj ik Toksaj Jesucristo.