Le Kuxaʼan Cristo

Utiaʼal kʼimbesik u síijil Jesucristo uchaak kaʼapʼéel mil jaʼaboʼob, ik aʼalik ik tsʼáajaajil tiʼ u jach jaajil U kuxtal minaʼan u jeel bixeʼ yéetel tiʼ u yutsilil minaʼan u xuul tiʼ U nojoch toksajil táambesaj. Mix u jéel wíinik u beetmaj jumpʼéel maʼalob taan péeksil yóokʼol tuláakal máaxoʼob kuxaʼan kaʼacheʼ, beʼoraʼeʼ yéetel máaxoʼob ku kuxtaloʼob yóokʼol le luʼumaʼ.

Letiʼeʼ leteʼ Nojoch Jehova tiʼ le Úuchben Tsʼíibiltʼaan, u Mesiasiʼ tiʼ le Túumben Tsʼíibiltʼaan. Túuxtaʼan tuméen U Yuum, Letiʼ makʼantej le luʼumaʼ. “Tu yoʼolal letiʼeʼ beetaʼabiʼ tuláakal baʼaloʼob. Tiʼ le baʼaloʼob yanoʼoboʼ mixbaʼal beetaʼan wa maʼ tu yoʼolal letiʼ” (Juan 1:3). Kex minaʼan u kʼebaneʼ okjaʼanajiʼ yoʼolal u beetaʼaj tuláakal baʼal tu beel. “Bix máanik xan letiʼeʼ […] u beetik uts” (Hechos 10:38), baʼaleʼ pʼeektaʼabij yoʼosak. U Maʼalob Péeksil jumpʼéel tʼaan jetsʼóolal yéetel maʼalob óolal. Letiʼeʼ tu kʼáat óoltaj tiʼ tuláakal kaʼ beetak baʼax tu kaʼansaj. Tu xíimbaltaj u beeliloʼob Palestina, tu tsʼakaj kʼojaʼanoʼob, tu beetaj u paakat le chʼoopoʼoboʼ yéetel tu beetaj u líikʼil le kíimenoʼoboʼ. Tu kaʼansaj u jaajil mantatsʼ kʼiin, u jaajil kaʼalikil síijil tik kuxtalil, le u baʼax yoʼosak ik kuxtalil yóokʼol le luʼumaʼ yéetel le páajtalil yaan tiʼ u paalaloʼob Yuumtsil teʼ kuxtal ku taaloʼ.

Tu tsʼáaj le Kiliʼich Jaanal bey kʼaʼajsajil tiʼ U nojoch toksajil táambesaj. Kʼaʼaxij yéetel kʼaʼalij tuméen taʼak u pool yéetel tuusil, aʼalaʼab yaan u siʼipil yoʼolal u kiʼimakunsaʼal u yóol le múuchʼ máakoʼoboʼ, aʼalaʼabeʼ yaan u kíimil teʼ kʼatalcheʼoʼ teʼ Calvario. Letiʼeʼ tu tsʼáaj U kuxtalil yoʼosak u luʼukʼsik u kʼebanoʼob tuláakal wíinik. Tu tsʼáaj U kuxtalil bey nojoch síibal utiaʼal u yutsilil tuláakal le máaxoʼob ku kuxtal teʼ luʼumaʼ.

Ik aʼalik jach tu jaajil u kuxtal Letiʼeʼ, kʼambeʼenil tiʼ u tsʼíibil kuxtalil tuláakal wíinik, maʼ chúun teʼ Belenoʼ mix tsʼoʼok teʼ Calvarioʼ. Letiʼeʼ u Yáax Paalil Yuum, Juntúuliliʼ Paal tiʼ u bakʼeʼ, u Toksajil le yóokʼolkab.

Letiʼeʼ líikʼ teʼ muknaloʼ u yáaxil tiʼ le kíimenoʼoboʼ (ileʼex 1 Corintios 15:20). Bey le Kʼuj Kaʼ Kuxlajiʼ, xíimbalnaj ichil le máax tu yáabiltaj kaʼach kuxaʼaneʼ. Bin u xíimbalt U “láakʼ tamanoʼob” (Juan 10:16) tiʼ le úuchben Americaoʼ. Teʼ túumben yóokʼolkabaʼ, Letiʼ yéetel U Yuumeʼ chíikpajoʼob tiʼ le táankelem Jose Smith, bey chúunik le baʼax aʼalaʼan yaʼab u tʼéenel tiʼ le kʼiinjaʼaboʼob yaan u yúuchul ken kʼuchuk u kʼiinil (ileʼex Efesios 1:10).

Tiʼ le Kuxaʼan Cristoʼ, le aj bóobat Josejoʼ tu tsʼíibtaj: “U yichoʼobeʼ bey chakjopeʼen kʼáakʼeʼ; u tsʼoʼotsel u pooleʼ saak bey sen bateʼ; u paakateʼ ku sen letsʼbal mas ket u sáasil le kʼiinoʼ; yéetel u tʼaaneʼ bey u yáambal yaʼab jaʼiloʼobeʼ bey u tʼaan Jehova túunoʼ, ku yaʼalik:

“Teeneʼ u yáaxil yéetel u tsʼook; kuxaʼanen, kíinsaʼaben; teeneʼ kin wáantikeʼex tu táan Yuum” (K y N 110:3–4).

Yoʼolal Letiʼeʼ, tu yaʼalaj xan le Aj bóobatoʼ: “Beʼoraʼeʼ u tsʼook tiʼ yaʼab jaajiltʼaanoʼobeʼ tsʼáajaʼan tu yoʼolal leteʼ jaajil tʼaanaʼ, u tsʼook tiʼ tuláakal, kik tsʼáaik tu yoʼolal: ¡Kuxaʼan!

“Tuméen tik ilajeʼ, beyoʼ tu noʼoj Yuumtsileʼ; tik uʼuyaj u jaajil tʼaan letiʼeʼ Juntúuliliʼ Paal tiʼ u Yuum—

“yoʼolal letiʼ, tuméen letiʼ, utiaʼal letiʼeʼ yaan le yóokʼolkaboʼoboʼ, máakʼantaʼaboʼob xaneʼ, yéetel síijoʼob u kajnáaliloʼob bey paalaloʼob utiaʼal Yuumtsil” (K y N 76:22–24).

Ik aʼalik tiʼ jach noj tʼaanoʼobeʼ U sacerdocioil yéetel U Najil Kʼujeʼ tsʼokaʼan u kaʼ yaantal yóokʼol le luʼumaʼ, beetaʼan yóokʼol u chúunpakʼil tiʼ apostoloʼob yéetel aj bóobatoʼob, u noʼojaʼan tuunichil le chuumpakʼoʼ layliʼ Jesucristoeʼ (ileʼex Efesios 2:20).

Ik tsʼáaik jaajil Letiʼeʼ bíin kaʼ suunak teʼ luʼumaʼ. Yaan u yeʼesik u nojbeʼenil Jehova, yéetel tuláakal baʼal kuxaʼaneʼ muuchʼil yaan u yilik (ileʼex Isaias 40:5). Yaan u beetik u nojochil bey Ajaw tiʼ ajawoʼobeʼ, yaan u jbejaltik bey Kʼuj tiʼ kʼujoʼobeʼ, yéetel tuláakal píixeʼ yaan u xoltal, yéetel tuláakal waakʼeʼ bíin tʼaanak utiaʼal u kúult tu Táan. Tuláakal toʼoneʼ yaan ik yaantal utiaʼal pʼisóoltaʼal tuméen Letiʼ yoʼolal baʼax ik beetmaj yéetel baʼax tik tsʼíiboltaj tik puksiʼikʼal.

Kik tsʼáaik jaajil, bey U apostoloʼon tsʼáajaʼan u kuuchoʼob, Letiʼeʼ Jesus le Kuxaʼan Cristo, le maʼ kíimilil Paal tiʼ Yuumtsil. Letiʼeʼ le nojoch Ajaw Emanuel, bejlaʼeʼ tiʼan tu noʼoj U Taataeʼ. Letiʼeʼ u sáasilil, u kuxtalil yéetel u yalabóolil yóokʼolkab. U beeleʼ leteʼ ku bisik tiʼ kiʼimak óolal tiʼ le kuxtalaʼ yéetel le minaʼan u xuul kuxtalil teʼ yóokʼolkab ku taaloʼ. Níib óolal tsʼáabak tiʼ Yuumtsil yoʼosak u tsʼáabilaj minaʼan u jeel bix tiʼ u kʼujul Paal.

Le Yáax Noj Poolil

U Cuorumil le Kaʼalajun Apostoloʼob