Noong Setyembre 30, 1978, sa ika-148 na Pangkalahating Taong Pangkalahatang Kumperensiya ng Ang Simbahan ni Jesucristo ng mga Banal sa mga Huling Araw, ang mga sumusunod ay inilahad ni Pangulong N. Eldon Tanner, Unang Tagapayo sa Unang Panguluhan ng Simbahan:

Noong unang bahagi ng Hunyo ng taong ito, ipinahayag ng Unang Panguluhan na isang paghahayag ang natanggap ni Pangulong Spencer W. Kimball na naggagawad ng pagkasaserdote at mga pagpapala sa templo sa lahat ng karapat-dapat na lalaking kasapi ng Simbahan. Hiniling ni Pangulong Kimball na aking sabihin sa kumperensiya na pagkatapos niyang matanggap ang paghahayag na ito, na dumating sa kanya matapos ang mahabang pagbubulay-bulay at panalangin sa mga sagradong silid ng banal na templo, inilahad niya ito sa kanyang mga tagapayo, na tinanggap ito at pinagtibay ito. Pagkatapos ay inilahad ito sa Korum ng Labindalawang Apostol, na buong pagkakaisang pinagtibay ito, at pagkaraan ay iniharap sa lahat ng iba pang Pangkalahatang Pinuno, na buong pagkakaisa ring pinagtibay ito.

Hiniling ni Pangulong Kimball na basahin ko ngayon ang liham na ito:

Habang nasasaksihan namin ang paglawak ng gawain ng Panginoon sa mundo, nagpapasalamat kami na ang mga tao ng maraming bansa ay tumugon sa mensahe ng ipinanumbalik na ebanghelyo, at sumapi sa Simbahan sa lalong lumalaking bilang. Dahil dito, binigyan kami ng inspirasyon nito na hangaring igawad sa bawat karapat-dapat na kasapi ng Simbahan ang lahat ng pribilehiyo at pagpapalang naibibigay ng ebanghelyo.

Batid ang mga pangakong ginawa ng mga propeta at pangulo ng Simbahan na nangauna sa amin na balang-araw, sa walang hanggang plano ng Diyos, lahat ng ating mga kapatid na lalaki na karapat-dapat ay maaaring tumanggap ng pagkasaserdote, at namamalas ang katapatan ng mga yaong pinagkaitan ng pagkasaserdote, kami ay nagsumamo nang matagal at taimtim alang-alang sa kanila, na ating matatapat na kapatid, gumugugol ng maraming oras sa Itaas na Silid ng Templo, nagsusumamo sa Panginoon para sa banal na patnubay.

Kanyang dininig ang aming mga panalangin, at sa pamamagitan ng paghahayag ay pinagtibay na sumapit na ang matagal nang ipinangakong araw kung kailan ang bawat matapat at karapat-dapat na lalaki sa Simbahan ay maaaring tanggapin ang banal na pagkasaserdote, na may kapangyarihang gamitin ang banal na karapatang ito, at tamasahin kasama ang kanyang mga minamahal ang lahat ng pagpapalang umaagos mula roon, kabilang na ang mga pagpapala ng templo. Alinsunod dito, lahat ng karapat-dapat na lalaking kasapi ng Simbahan ay maaaring iorden sa pagkasaserdote nang walang pagsasaalang-alang ng lahi o kulay ng balat. Ang mga pinuno ng pagkasaserdote ay tinatagubilinang sumunod sa patakaran ng maingat na pakikipanayam sa lahat ng kandidato sa ordinasyon sa Pagkasaserdoteng Aaron o Melquisedec upang matiyak na kanilang natugunan ang mga naitatag nang pamantayan sa pagiging karapat-dapat.

Aming mataimtim na ipinapahayag na ipinaalam ng Panginoon ngayon ang kanyang kalooban para sa pagpapala ng lahat ng kanyang mga anak sa lahat ng dako ng mundo na makikinig sa tinig ng kanyang mga tagapaglingkod na binigyan ng kapangyarihan, at ihanda ang kanilang sarili na tumanggap ng lahat ng pagpapala ng ebanghelyo.

Kinikilala si Spencer W. Kimball bilang propeta, tagakita, at tagapaghayag, at pangulo ng Ang Simbahan ni Jesucristo ng mga Banal sa mga Huling Araw, iminumungkahi na tanggapin natin bilang isang manghahalal na kapulungan ang paghahayag na ito bilang salita at kalooban ng Panginoon. Lahat ng sumasang-ayon, mangyaring ipakita sa pamamagitan ng pagtataas ng inyong kanang kamay. Sinuman ang hindi sumasang-ayon, sa pamamagitan ng gayunding tanda.

Ang boto na tanggapin ang naunang mungkahi ay sinasang-ayunan nang may buong pagkakaisa.