Sección 89
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, febrero 27, 1833-pe. Joyke’ykuéra oipurúgui petỹ iñembyatyhápe, ogueraha Profétape ojepy’amongeta ko mba’ére; ha upévare oporandu Ñandejárape kóvare. Ko rrevelasiõ, ojeikuaáva Arandu Ñe’ẽ ramo, ha’ékuri upe rresultádo.
1–9, Oñembotove víno jeiporu, vevída imbaretéva, petỹ, ha vevída aku; 10–17, Oñemoĩ umi ka’avo, yva, so’o ha yvara’ỹikuéra yvypóra ha mymbakuéra jeporurã; 18–21, Evanhélio léire ñe’ẽrendu, oikévape Arandu Ñe’ẽ, ogueru umi jehovasa temporal ha espiritual.
1 Peteĩ arandu Ñe’ẽ, sumo sacerdote-kuéra konsého ñeimeporãrã, oñembyatýva Kirtland-pe, ha tupaópe, ha avei santokuéra Sion-gua.
2 Oñemondo hag̃ua ñemomaitei rupive; ndaha’éi tembiapoukapy térã ñemyaña rupive, ha katu rrevelasiõ ha upe arandu ñe’ẽ rupive, ohechaukávo órden ha Tupã rembipota opa santokuéra ára pahapegua salvasiõ temporal-pe—
3 Oñeme’ẽva peteĩ prinsípio ramo promésa reheve, oñemohendáva opa santokuéra ikangýva ha ikangyvéva katupyrýpe, ha’éva térã oñehenoikuaáva sánto.
4 Péina ápe, añetehápe, péicha he’i peẽme Ñandejára: Umi tembiapoñaña ha plan ñaña oĩva ha oĩtava rupi tekovekuéra hembiapoñemíva korasõme umi ára pahápe, Che pomomarandúkuri ha pohesape’a, ame’ẽvo peẽme ko arandu ñe’ẽ, rrevelasiõ rupive—
5 Oĩramo pende apytépe omboy’úva víno térã vevída imbaretéva, péina ápe, kóva naiporãi ni noĩporãiri pende Ru resa renondépe, ndaha’éirõ peñembyaty jave peikuave’ẽ hag̃ua pene sacramento henondépe.
6 Ha, péina ápe, kóva ha’eva’erã víno, héẽ, víno parral’águi apopyre, peẽ pejapova’ekue.
7 Ha avei, umi vevída imbaretéva ndaha’éi ñande py’ápe g̃uarã, ha katu ñande rete jejoheirã.
8 Ha avei, petỹ ndaha’éi tetépe g̃uarã, ni py’ápe g̃uarã, ha naiporãi yvypórape g̃uarã, ha katu kóva ha’e peteĩ ka’avo ñañembotárõ g̃uarã ha opa mymba hasývape g̃uarã, ojeporuva’erã akãguapy ha katupyrýpe.
9 Ha avei, umi vevída aku ndaha’éi tete térã py’ápe g̃uarã.
10 Ha avei, añetehápe Che ha’e peẽme, Tupã omoĩhague opa ka’avo porã yvypóra rete ñemombarete, resãi ha jeporurã—
11 Opa ka’avo hi’araitépe, ha opa yva hi’araitépe; opa ko’ãva ojeporu hag̃ua akãguapy ha aguyjeme’ẽme.
12 Héẽ, avei mymbakuéra ro’o ha yvytugua guyrakuéra, Che, Ñandejára, amoĩva’ekue yvypóra jeiporurã, aguyjeme’ẽ reheve; upevére, ojeporu’arã ñemboharai’ỹre;
13 Ha che aguerohory ani hag̃ua ojeporu umíva, araro’ýpe añónte, térã ro’y, térã ñembyahýi árape.
14 Opa yvara’ỹi oñemoĩva’ekue yvypóra ha mymbakuéra oiporu hag̃ua, oikove hag̃ua hikuái; ndaha’éi yvypórape g̃uarã añónte, ha katu umi ñumegua mymba, yvytugua guyra, ha opa mymba ka’aguy oñaníva térã yvýre otyryrývape g̃uarã.
15 Ha ko’ãvape Tupã ojapova’ekue yvypóra jeporurã, ñembyahýi ha vare’a vai árape añónte.
16 Opa yvara’ỹi iporã yvypórape oñemongaru hag̃ua; ha avei upe parralty rykue; umi hi’áva, taha’e yvy guýpe térã yvy ári—
17 Upevére, trígo yvypórape g̃uarã, avati guéipe g̃uarã, avéna kavajúpe g̃uarã, senténo umi guyra, kure ha opa ñumegua mymbakuérape g̃uarã, ha seváda opa mymba ojeporukuaávape g̃uarã ha vevída imbarete’ỹvape g̃uarã, ha péicha avei ambue gráno.
18 Ha opa santokuéra imandu’áva oñongatu ha ojapo hag̃ua ko’ã mba’e, oikóvo ñe’ẽrendúpe tembiapoukapykuérare, ohupytýta tesãi ipuru’ãme ha karaku ikanguépe;
19 Ha ojuhúta arandu ha umi kuaapy rehegua mba’erepy guasu, jepeve umi mba’erepy ñemimby.
20 Ha oñaníta ijuku’a’ỹre, ha oguatáta ikangy’ỹre.
21 Ha Che, Ñandejára, apromete peẽme, pe ánhel oporohundíva ohasataha ijypypekuéra, Israel ra’ykuéraicha, ha ndojukamo’ãi chupekuéra. Amén