Karolo ea 63
Ts’enolo e fanoeng ka moporofeta Joseph Smith, Kirtland, Ohio, ka la 30 Phato 1831. Moporofeta, Sidney Rigdon, le Oliver Cowdery ba ne ba fihletse Kirtland ka la 27 Phato ba tsoa leetong la bona la ho etela Missouri. Nalane ea Joseph Smith e hlalosa ts’enolo ena ka mantsoe ana: “Matsatsing ana a boseeng ba Kereke, ho ne ho e-na le ngongoreho e kholo ea ho fumana lentsoe la Morena mabapi le taba e ’ngoe le e ’ngoe e amanang le pholoho ea rona; ’me kaha lefats’e la Sione ka nako ena e ne e le ntho ea bohlokoa ka ho fetisisa ka chebahalo ea lintho, ke ile ka botsa Morena bakeng sa tlhahisoleseling e eketsehileng mabapi le pokello ea bahalaleli, theko ea mobu, le litaba tse ling.”
1–6, Letsatsi la khalefo le tla tla holim’a ba khopo; 7–12, Mats’oao a tla ka tumelo, 13–19, Ba febang ka lipelong ba tla latola tumelo ’me ba lahleloe lets’eng la mollo; 20, Ba ts’epahalang ba tla amohela lefa la bona lefats’eng le fetotsoeng; 21, Tlaleho e feletseng ea liketsahalo Thabeng ea Phetoho ha e so senoloe; 22–23, Ba mamelang ba amohela liphiri tsa ’muso; 24–31, Mafa a Sione a lokela ho rekoa; 32–35, Morena o laela lintoa, ’me ba khopo ba bolaea ba khopo; 36–48, Bahalaleli ba lokela ho bokana Sione ’me ba fane ka chelete ho e tsosa; 49–54, Litlhohonolofatso li netefalitsoe ho ba ts’epahalang nakong ea Ho Tla Lekhetlo la Bobeli, ka Tsoho ea Bafu, le nakong ea Sekete sa lilemo; 55–58, Lena ke letsatsi la temoso; 59–66, Lebitso la Morena le nkeloa lefeela ke ba le sebelisang ntle le tokelo.
1 Mamelang, oho lona batho, ’me le bule lipelo tsa lona, ’me le theele tsebe le le hole; lona ba ipitsang batho ba Morena, ’me le utloe lentsoe la Morena le thato ea hae malebana le lona.
2 Ee, kannete, ke re, utloang lentsoe la eo khalefo ea hae e tukang khahlanong le ba khopo le ba koenehang.
3 Ea ratang ho nka esita le bao a tlang ho ba nka, le ho boloka bophelong bao a tlang ho ba boloka;
4 Ea ahang ka thato ea hae le monyaka; ’me a senya ha a rata, ’me o na le matla a ho lahlela moea tlase liheleng.
5 Bonang, ’na, Morena, ke bua lentsoe la ka, ’me le tla mameloa.
6 Ka baka leo, kannete ke re, a ba khopo ba mamele, ’me etsang hore bakoenehi ba ts’abe ’me ba thothomele; ’me etsang hore ba sa lumeleng ba ts’oare melomo ea bona, ka ha letsatsi la khalefo le tla ba fihlela joaloka sefefo, ’me nama eohle e tla tseba hore ke ’na Molimo.
7 ’Me ea batlang mats’oao, o tla bona mats’oao, empa eseng a isang pholohong.
8 Kannete, ke re ho lona, ho na le ba bang ho lona ba batlang mats’oao, ’me ho bile le ba joalo esita le ho tloha ts’imolohong;
9 Empa, bona, tumelo ha e tle ka mats’oao, empa mats’oao a latela ba lumelang.
10 E, mats’oao a tla ka tumelo, eseng ka thato ea batho, kapa kamoo ba batlang kateng, empa ka thato ea Molimo.
11 Ee, mats’oao a tla ka tumelo, mesebetsing e matla, hobane ntle le tumelo ha ho motho ea khahlisang Molimo; ’me le eo Molimo a mo halefetseng ha a khahloe ke eena; ka baka leo, ho ba joalo ha a ba bonts’e mats’oao, ntle le feela ka khalefo e isang kahlolong ea bona.
12 Ka baka leo, ’Na, Morena, ha kea thabela ba bang har’a lona ba batlileng mats’oao le meeka ea tumelo, eseng bakeng sa molemo oa batho ho rorisa lebitso la ka.
13 Leha ho le joalo, ke fana ka litaelo, ’me ba bangata ba fetohela litaelo tsa ka ’me ha ba li boloke.
14 Ho ne ho le teng har’a lona lihlola le liotsoa; ba bang ba bona ba le fetohetse, ’me ba bang ba sala le lona bao hamorao ba tla senoloa.
15 Etsang hore ba joalo ba hlokomele ’me ba bake kapele, esere kahlolo ea tla holim’a bona joalo ka leraba, ’me booatla ba bona bo tla bonahala, ’me mesebetsi ea bona e tla ba latela mahlong a batho.
16 ’Me kannete ke re ho lona, joalo ka ha ke se ke boletse pele, mang kapa mang ea talimang mosali ka ho mo lakatsa, kapa haeba mang kapa mang a feba ka pelong ea hae, a ke ke a e-ba le Moea, empa o tla latola tumelo ’me o tla ts’aba.
17 Ka baka leo, ’na, Morena, ke boletse hore ba ts’abang, le ba sa lumeleng, le bohle ba leshano, le mang kapa mang ea ratang le ho etsa leshano, le bafebi, le baloi, ba tla ba le kabelo ea bona lets’eng le tukang ka mollo le sebabole, e leng lefu la bobeli.
18 Kannete ke re, ba ke ke ba e-ba le kabelo tsohong ea pele ea bafu.
19 ’Me joale, bonang, ’na, Morena, ke re ho lona hore ha le a lokafatsoa, hobane lintho tsena li teng har’a lona.
20 Leha ho le joalo, ea mamellang tumelong ’me a etsa thato ea ka, ke eena ea tla hlola, ’me a fumana lefa holim’a lefats’e ha letsatsi la phetoho le tla tla.
21 Mohlang lefats’e le tlang ho fetoloa, esita le ho latela mohlala o bonts’itsoeng ho baapostola ba ka thabeng; eo tlaleho ea eona le e-so e fumane ka botlalo.
22 ’Me joale, kannete ke re ho lona, joaloka ha ke boletse hore ke tla le tsebisa thato ea ka, bonang, ke tla le tsebisa, eseng ka tsela ea taelo, hobane ho na le ba bangata ba sa ikitlaetseng ho boloka litaelo tsa ka.
23 Empa ho ea bolokang litaelo tsa ka, ke tla mo fa liphiri tsa ’muso oa ka, ’me ea joalo ho tla ba le seliba sa metsi a phelang kahare ho eena, se kopotsang ho isa bophelong bo sa feleng.
24 ’Me joale, bonang, ena ke thato ea Morena Molimo oa lona, malebana le bahalaleli ba hae, hore ba lokela ho bokana hammoho lefats’eng la Sione, e seng ka lepotlapotla, esere ha eba le pherekano, e tlisang seoa.
25 Bonang, lefats’e la Sione—’na, Morena, ke le ts’oere matsohong a ka;
26 Leha ho le joalo, Nna, Morena, ke busetsa ho Sesare lintho tseo e leng tsa Sesare.
27 Ka baka leo, ’na Morena ke rata hore le reke mobu, e le hore le be le monyetla oa lefats’e le tle le be le tokelo lefats’eng, e le hore ba se ke ba hlohlelletsoa khalefong.
28 Hobane Satane o e beha ka lipelong tsa bona ho le halefela, le ho ts’olla mali.
29 Ka baka leo, lefats’e la Sione le ke ke la fumanoa haese ka theko kapa ka mali, ho seng joalo ha ho lefa bakeng sa lona.
30 ’Me ha eba ke ka theko, bonang le lehlohonolo;
31 ’Me ha eba ke ka mali, joaloka ha le thibetsoe ho ts’olla mali, bonang, lira tsa lona li holima lona, ’me le tla hlorisoa ho tloha motseng hoea motseng, le ho tloha senagogeng ho ea senagogeng, ’me ba fokolang ba tla ema ho amohela lefa.
32 ’Na, Morena, ke halefetse ba khopo; Ke thibetse Moea oa ka ho baahi ba lefats’e.
33 Ke hlapantse khalefong ea ka, ’me ke laela lintoa holima sefahleho sa lefats’e, ’me ba khopo ba tla bolaea, ’me ts’abo e tla fihla ho motho e mong le e mong;
34 ’Me ba halalelang le bona ba tla phonyoha ka thata; leha ho le joalo, ’na, Morena, ke na le bona, ’me ke tla theoha leholimong ho tloha ponts’eng ea Ntate, ’me ke timetse ba khopo ka mollo o sa timeng.
35 ’Me bonang, sena ha se e-so etsahale, empa se haufi.
36 Ka baka leo, ka ho bona hore ’na, Morena, ke laetse lintho tsena tsohle holim’a sefahleho sa lefats’e, ke rata hore bahalaleli ba ka ba bokane lefats’eng la Sione;
37 ’Me e mong le e mong a nke ho loka matsohong a hae, le bots’epehi lethekeng la hae, ’me a phahamise lentsoe la temoso ho baahi ba lefats’e; a phatlalatse ka lentsoe le ka ho baleha hore timetso e tla tla holim’a ba khopo.
38 Ka baka leo, etsang hore barutuoa ba ka ba Kirtland ba hlophise litaba tsa bona tsa lefats’e, bao ba lulang polasing ena.
39 Etsang hore mohlanka oa ka, Titus Billings, ea hlokomelang sebaka seo, a rekise sets’a seo, e le hore a be a itokisitse selemong se tlang ho nka leeto la hae ho ea lefats’eng la Sione, le ba lulang ho sona, ntle le bao ke tlang ho ipolokela bona, ba ke keng ba ea ho fihlela ke ba laela.
40 ’Me etsang hore chelete eohle e ka bolokoang, ha ho natsehe ho ’na hore na e nyenyane kapa e ngata, e romeloe naheng ea Sione, ho bao ke ba khethileng ho e amohela.
41 Bonang, ’Na, Morena, ke tla neha mohlanka oa ka Joseph Smith, matla hore a tsebe ho lemoha ka Moea ba tlang ho nyolohela lefats’eng la Sione, le barutuoa ba ka ba tlang ho sala.
42 Etsang hore mohlanka oa ka Newel K. Whitney a boloke lebenkele la hae, kapa ka mantsoe a mang, lebenkele, empa nakoana feela.
43 Leha ho le joalo, etsang hore a fane ka chelete eohle eo a ka fanang ka eona, hore e romeloe lefats’eng la Sione.
44 Bonang, lintho tsena li matsohong a hae, ha a ke a etse ka bohlale.
45 Kannete ke re, a ke a behoe matsoho e le moemeli ho barutuoa bao ba tlang ho sala, ’me a ke a behoe matsoho matleng ana;
46 ’Me joale kapele etela likereke, u hlalose lintho tsena ho bona, le mohlanka oa ka Oliver Cowdery. Bona, sena ke thato ea ka, ho amohela lichelete le joalo ka ha ke laetse.
47 Eena eo ea ts’epahalang ’me a mamella o tla hlola lefats’e.
48 Ea romellang maruo lefats’eng la Sione o tla fumana lefa lefats’eng lena, ’me mesebetsi ea hae e tla molatela, hape le moputso lefats’eng le tlang ho tla.
49 Ee, ’me ba lehlohonolo ke bafu ba shoelang Moreneng ho tloha joale, ha Morena a tla, ’me lintho tsa khale li tla feta, ’me lintho tsohle li tla nchafala, ba tla tsoha bafung ’me ba ke ke ba shoa hape, ’me ba tla fumana lefa ka pele ho Morena, motseng o halalelang.
50 ’Me ea phelang ha Morena a tla, ’me a bolokile tumelo, eo o lehlohonolo; le ha hole joalo, ho behiloe ho eena ho shoa ka nako ea lilemo tsa motho.
51 Ka baka leo, bana ba tla hola ho fihlela ba e ba baholo; batho ba baholo ba tla shoa; empa ba ke ke ba robala leroleng, empa ba tla fetoloa ka hopanya ha leihlo.
52 Ka baka leo, ke ka hona barutuoa ba ileng ba ruta lefats’e ka tsoho ea bafu.
53 Lintho tsena ke lintho tseo le tlamehang ho libatla; ’me, le buoa ka tsela ea Morena, li atametse joale ’me li haufi, ’me ka nako ea ho tla, esita le ka letsatsi la ho tla ha Mor’a Motho.
54 ’Me hofihlela hora eo, ho tla ba le baroetsana ba maoatla har’a ba bohlale; ’me ka hora eo ho tla tla karohano e felletseng ea ba lokileng le ba khopo; ’me ka letsatsi leo ke tla romela mangeloi a ka ho tla motsula ba khopo le ho ba lahlela mollong o sa timeng.
55 ’Me joale bonang, kannete kere ho lona, ’na, Morena, ha kea thabela mohlanka oa ka Sidney Rigdon; o iphahamisitse ka pelong ea hae, ’me a se ke a amohela keletso, empa a soabisa Moea;
56 Ka baka leo mongolo oa hae ha o amohelehe ho Morena, ’me o tla etsa o mong; ’me haeba Morena a ke keng a o amohela, bona ha a sa eme ofising eo ke mo beileng ho eona.
57 ’Me hape, kannete ke re ho lona, ba lakatsang ka lipelong tsa bona, ka boikokobetso, ho lemosa baetsalibe ho ea pakong, ba ke ba behoe matsoho matleng ana.
58 Hobane lena ke letsatsi la temoso, ’me hase letsatsi la mantsoe a mangata. Hobane, ’Na, Morena, ha kena ho nyefoloa matsatsing a ho qetela.
59 Bonang, ke tsoa ka holimo, ’me matla a ka a lutse ka tlase. Ke ka holimo ho tsohle, ke ho tsohle, ke ka hare ho tsohle, ’me ke batlisisa lintho tsohle, ’me letsatsi lea tla leo ka lona lintho tsohle li tla ba ka tlas’a taolo ea ka.
60 Bonang, Ke ’na Alfa le Omega, esita le Jesu Christ.
61 Ka baka leo, etsang hore batho bohle ba lemohe kamoo ba nkang lebitso la ka melomong ea bona—
62 Hobane bonang, kannete ke re, hore ba teng ba bangata ba leng tlas’a kahlolo ena, ba sebelisang lebitso la Morena, ’me ba le sebelisetsa lefeela, ba se na tokelo.
63 Ka baka leo, etsang hore kereke e bake libeng tsa eona, ’me ’na, Morena, ke tla ba amohela; ho seng joalo, ba tla khaoloa.
64 Hopolang hore seo se tsoang holimo ke se halalelang, ’me se tlameha ho boleloa ka hlokolosi le ka tataiso ea Moea; ’me tabeng ena ha ho kahlolo, ’me le amohela Moea ka thapelo; ka baka leo, ntle le sena ho sala kahlolo.
65 Etsang hore bahlanka baka, Joseph Smith le Sidney Rigdon, ba batlele lehae, joaloka ha ba rutoa ka thapelo ke Moea.
66 Lintho tsena ho sala hore li hlole ka mamello, e le hore ba joalo ba fumane boima ba bosafeleng ba khanya e fetisisang haholo; ho seng joalo, kahlolo e kholo le ho feta. Amen.