Karolo ea 57
Ts’enolo e fanoeng ka moporofeta Joseph Smith, Zion, Jackson County, Missouri, ka la 20 Phupu 1831. Ka ho latela taelo ea Morena ea ho etela Missouri, moo a neng a tla senola “lefats’e la lefa la lona” (karolo ea 52), baholo ba ne ba ile ba nka leeto ho tloha Ohio ho ea moeling o ka bophirima ho Missouri. Joseph Smith o ile a nahana ka boemo ba Ba-Lamane ’me a ipotsa: “Ke neng ha lefeelleng ho tla thunya joaloka palesa? Ke neng ha Sione e tla ahoa ka khanya ea eona, ’me ke hokae moo tempele ea hau e tlang ho ema, eo lichaba tsohle li tlang ho tla ho eona matsatsing a ho qetela?” Kamorao ho moo, o ile a amohela ts’enolo ena.
1–3, Independence, Missouri, ke sebaka sa Motse oa Sione le tempele; 4–7, Bahalaleli ba lokela ho reka mafats’e le ho amohela bojalefa sebakeng seo; 8–16, Sidney Gilbert o lokela ho theha lebenkele, William W. Phelps o lokela ho ba mohatisi, ’me Oliver Cowdery o lokela ho hlophisa lingoliloeng bakeng sa phatlalatso.
1 Mamelang, oho lona baholo ba kereke ea ka, ho rialo Morena Molimo oa lona, ba neng ba ipokantse hammoho, ho latela litaelo tsa ka, lefats’eng lena, e leng lefats’e la Missouri, e leng lefats’e leo ke le khethileng le ho le halaletsa bakeng sa pokello ea bahalaleli.
2 Ka baka leo, lena ke lefats’e la pallo, le sebaka sa motse oa Sione.
3 ’Me joana ho rialo Morena Molimo oa lona, haeba le tla amohela bohlale, bohlale ke bona. Bonang, sebaka seo hajoale se bitsoang Independence ke sebaka se khubung; ’me sebaka sa tempele se lutse ka bophirima, holim’a sebaka se seng hole le ntlo ea lekhotla.
4 Ka baka leo, ke bohlale hore lefats’e leo le rekoe ke bahalaleli, hape le karolo e ’ngoe le e ’ngoe ea mobu o lutseng ka bophirima, ho isa moeling o mathang ka kotloloho pakeng tsa Mo-Juda le Molichaba;
5 ’Me hape karolo e ’ngoe le e ’ngoe ea mobu e moeling oa makhulo, ha feela barutuoa ba lumelloa ho reka mafats’e. Bonang, hona ke bohlale, hore ba ka le fumana e le lefa ka ho sa feleng.
6 ’Me mohlanka oa ka Sidney Gilbert a eme ofising eo ke mo khethetseng eona, ho amohela lichelete, ho ba moemeli oa kereke, le ho reka lefats’e tikolohong tsohle tse pota-potileng, ha feela li ka etsoa ka ho loka ’me joaloka ha bohlale bo tla tataisa.
7 ’Me etsang hore mohlanka oa ka Edward Partridge a eme ofising eo ke mo khethetseng eona, ’me a arolele bahalaleli lefa la bona, joaloka ha ke laetse; le bao a ba khethileng ho mo thusa.
8 ’Me hape, kannete ke re ho lona, etsang hore mohlanka oa ka Sidney Gilbert a itlhome sebakeng sena, ’me a thehe lebenkele, hore a ke a rekise thepa ntle le bomenemene, hore a fumane chelete ho reka mafats’e molemong oa bahalaleli, le hore a fumane lintho life kapa life tseo barutuoa ba ka ba ka li hlokang hore a ba hlome lefeng la bona.
9 ’Me hape, etsang hore mohlanka oa ka Sidney Gilbert a ke a fumane lakesense—bonang, bohlale ke bona, ’me mang kapa mang ea balang etsang hore a utloisise—hore a ke a boele a romelle thepa ho batho, esita le bao e leng li litlelereke tseo a tlang ho li hira bosebeletsing ba hae;
10 ’Me joana, hlokomela bahalaleli ba ka, hore evangeli ea ka e ke e rutoe ho ba lutseng lefifing le tikolohong le moriting oa lefu.
11 ’Me hape, kannete ke re ho lona, etsang hore mohlanka oa ka William W. Phelps a ke a hlongoe sebakeng sena, ’me a thehoe e le mohatisi oa kereke.
12 ’Me bonang, haeba lefats’e le amohela lingoliloeng tsa hae—bonang bohlale ke bona—a ke a fumane eng kapa eng eo a ka e fumanang ka ho loka, molemong oa bahalaleli.
13 ’Me etsang hore mohlanka oa ka Oliver Cowdery a mo thuse, esita le joaloka ha ke laetse, sebakeng sefe kapa sefe seo ke tla mo khethela sona, ho qopitsa, ho lokisa, le ho khetha, hore lintho tsohle li ke li loke ka pele ho ’na, joaloka ha li tla netefatsoa ke Moea ka eena.
14 ’Me joana etsang hore bao ke buileng ka bona ba hlongoe lefats’eng la Sione, ka potlako kamoo ho ka etsehang, le malapa a bona, ho etsa lintho tseo esita le joaloka ha ke li buile.
15 ’Me joale malebana le pokello—etsang hore mobishopo le moemeli ba etse litlhophiso bakeng sa malapa ao a laetsoeng ho tla lefats’eng lena, kapele ka moo ho ka etsehang, ’me ba ba hlome lefeng la bona.
16 ’Me ho karolo e setseng, bobeli ea baholo le litho, litaelo ho ea pele li tla fanoa kamorao ho mona. Esita le joalo. Amen.