Karolo ea 52
Ts’enolo e fanoeng ka Moporofeta Joseph Smith ho baholo ba Kereke, Kirtland, Ohio, ka la 6 Phuptjane 1831. Ho bile le seboka se ts’oareloang Kirtland, ho qala ka la 3 ’me sa koaloa ka la 6 Phuptjane. Sebokeng sena peho tsa matsoho tsa pele tse khethehileng ho ofisi ea boruti bo boholo li ile tsa etsoa, ’me liponahatso tse itseng tsa bohata le meea ea thetso li ile tsa lemoheha ’me tsa khalengoa.
1–2, Seboka se latelang se behetsoe ho ts’oareloa Missouri; 3–8, Likhetho tsa baholo ba itseng tsa ho eta hammoho lia etsoa; 9–11, Baholo ba lokela ho ruta seo baapostola le baporofeta ba se ngotseng; 12–21, Ba chabiselitsoeng ke Moea ba tlisa litholoana tsa thoriso le bohlale; 22–44, Baholo ba fapaneng ba khetheloa ho tsamaea ba ntse ba ruta evangeli ha ba ntse ba etela Missouri bakeng sa seboka.
1 Bonang, ho rialo Morena ho baholo bao a ba bitsitseng le ho ba khetha matsatsing ana a ho qetela, ka lentsoe la Moea oa hae—
2 A re: ’Na, Morena, ke tla etsa ho tsebahale ho lona seo ke se batlang seo le tlang ho se etsa ho tloha nakong ena ho fihla sebokeng se hlahlamang, se tlang ho ts’oareloa Missouri, holim’a lefats’e leo ke tlang ho le nyehela ho sechaba sa ka, seo e leng karolo e setseng ea Jakobo, ’me le bao e leng majalefa ho latela selekane.
3 Ka baka leo, kannete ke re ho lona, etsang hore bahlanka ba ka Joseph Smith, le Sidney Rigdon ba nke leeto la bona kapele kamoo litokiso li ka entsoang ho siea mahae a bona, ’me ba etele lefats’eng la Missouri.
4 ’Me ha feela ba ts’epahala ho ’na, ho tla tsebahatsoa ho bona seo ba tlang ho se etsa;
5 ’Me hape, ha feela ba ts’epahala, ho tla etsoa hore ho tsebahale ho bona lefats’e la bojalefa ba lona.
6 ’Me ha feela ba sa ts’epahale, ba tla khaoloa, esita le joaloka ha ke batla, joaloka ha ho bonahala ho le molemo ho ’na.
7 ’Me hape, kannete ke re ho lona, etsang hore mohlanka oa ka Lyman Wight le mohlanka oa ka John Corrill ba nke leeto la bona ka potlako;
8 ’Me hape mohlanka oa ka John Murdock, le mohlanka oa ka Hyrum Smith, ba nke leeto la bona sebakeng se ts’oanang ka tsela ea Detroit.
9 ’Me etsang hore ba ete ho tloha moo ’me ba rute lentsoe tseleng, ba se bolele lintho tse ling ntle le tsane tseo baporofeta le baapostola ba li ngotseng, le tseo ba li rutiloeng ke Mots’elisi ka thapelo ea tumelo.
10 Etsang hore ba tsamaee ka bobeli, ’me ke joana le etsang hore ba rute tseleng phuthehong e ’ngoe le e ’ngoe, ba kolobetsa ka metsi, le ka peho ea matsoho ka thoko ho metsi ao.
11 Hobane ke joana ho rialo Morena, ke tla khutsufatsa mosebetsi oa ka ka ho loka, hobane matsatsi a tla ao ke tlang ho romela kahlolo e isang tlholong.
12 ’Me etsang hore mohlanka oa ka Lyman Wight a ele hloko, hobane Satane o lakatsa ho mo hlokola joaloka litlhoka.
13 ’Me bonang, ea ts’epahalang o tla etsoa ’musi holim’a lintho tse ngata.
14 ’Me hape, ke tla fana ho lona moralo linthong tsohle, hore le ke le seke la thetsoa; hobane Satane o hohle lefats’eng, ’me o tsamaea a thetsa lichaba—
15 Ka baka leo ea rapelang, eo moea oa hae o soabileng, ea joalo u amoheloa ke ’na haeba a mamela lits’ebeletso tsa ka.
16 Ea buang, eo moea oa hae o soabileng, eo puo ea hae e leng pelo-nolo ’me e matlafatsa moeeng, ea joalo ke oa Molimo haeba a mamela lits’ebeletso tsa ka.
17 ’Me hape, ea thothomelang tlas’a matla a ka o tla etsoa ea matla, ’me o tla tlisa litholoana tsa thoriso le bohlale, ho latela ts’enolo le linnete tseo ke le fileng tsona.
18 ’Me hape, ea hlotsoeng ’me a sitoa ho tlisa litholoana, esita le ho latela moralo oona, ha se oa ka.
19 Ka baka leo, ka moralo oona le tla tseba meea maemong ’ohle a ka tlas’a maholimo.
20 ’Me matsatsi a fihlile, ho latela tumelo ea batho ho tla etsahala ho bona.
21 Bonang, taelo ena e fanoe ho baholo bohle bao ke ba khethileng.
22 ’Me hape, kannete ke re ho lona, etsang hore mohlanka oa ka Thomas B. Marsh le mohlanka oa ka Ezra Thayre ba nke leeto la bona le bona, ba ntse ba ruta lentsoe tseleng lefats’eng lena le ts’oanang.
23 ’Me hape, etsang hore mohlanka oa ka Isaac Morley le mohlanka oa ka Ezra Booth ba nke leeto la bona, le bona ba ntse ba ruta tseleng lefats’eng lena le ts’oanang.
24 ’Me hape, etsang hore bahlanka ba ka Edward Patridge le Martin Harris ba nke leeto la bona le bahlanka ba ka Sidney Rigdon le Joseph Smith.
25 Etsang hore bahlanka ba ka David Whitmer le Harvey Whitlock le bona ba nke leeto la bona, ’me ba ntse ba ruta tseleng lefats’eng lena le ts’oanang.
26 ’Me etsang hore bahlanka ba ka Parley P. Pratt le Orson Pratt ba nke leeto la bona, ’me ba ntse ba ruta tseleng, esita le lefats’eng lena le ts’oanang.
27 ’Me etsang hore bahlanka ba ka Solomon Hancock le Simeon Carter le bona ba nke leeto la bona lefats’eng lena le ts’oanang, ’me ba ntse ba ruta tseleng.
28 Etsang hore bahlanka ba ka Edson Fuller le Jacob Scott le bona ba nke leeto la bona.
29 Etsang hore bahlanka ba ka Levi W. Hancock le Zebedee Coltrin le bona ba nke leeto la bona.
30 Etsang hore bahlanka ba ka Reynolds Cahoon le Samuel H. Smith le bona ba nke leeto la bona.
31 Etsang hore bahlanka ba ka Wheeler Baldwin le William Carter le bona ba nke leeto la bona.
32 ’Me etsang hore bahlanka ba ka Newel Knight le Selah J. Griffin ka bobeli ba behoe matsoho, ’me le bona ba nke leeto la bona.
33 Ee, kannete ke re, etsang hore bana bohle ba nke leeto la bona ho ea sebakeng se le seng, ka litsela tsa bona tse fapaneng, ’me motho a le mong a ke ke a aha holim’a motheo oa e mong, leha e le ho tsamaea tseleng ea e mong.
34 Ea ts’epahalang, ea joalo o tla bolokoa le ho hlohonolofatsoa ka litholoana tse ngata.
35 ’Me hape, ke re ho lona, etsang hore bahlanka ba ka Joseph Wakefield le Solomon Humphrey ba nke leeto la bona ho ea mafats’eng a ka bochabela;
36 Etsang hore ba sebetse le malapa a bona, ba phatlalatsa lintho tse ling haese feela tsa baporofeta le baapostola, tsane tseo ba li boneng le ho li utloa le ruri ho li lumela ka ho fetisisa, hore boporofeta bo ke bo phethahale.
37 E le litlamorao tsa tlolo, etsang hore sane seo se neng se abetsoe holim’a Heman Basset se nkoe ho eena, ’me se behoe holim’a hlooho ea Simons Ryder.
38 ’Me hape, kannete ke re ho lona, etsang hore Jared Carter a behoe matsoho ho ba moprista, le hape George James a behoe matsoho ho ba moprista.
39 Etsang hore baholo ba setseng ba alose likereke, ’me ba phatlalatse lentsoe litikolohong tse ba pota-potileng; ’me le etse hore ba sebetse ka matsoho a bona hore ho seke ha eba le bohetene leha e le bokhopo bo etsoang.
40 ’Me hopolang linthong tsohle mafutsana le bahloki, bakulang le ba mahlomoleng, hobane ea sa etseng lintho tsena, ea joalo ha se morutuoa oa ka.
41 ’Me hape, etsang hore bahlanka ba ka Joseph Smith, le Sidney Rigdon le Edward Patridge ba nke tokomane ea tokelo e tsoang kerekeng. ’Me etsang hore ho be le e ’ngoe e fanoang bakeng sa mohlanka oa ka Oliver Cowdery le eena.
42 ’Me joana, esita le joaloka ha ke buile, haeba le ts’epahala le tla ipokella hammoho ho thaba holim’a lefats’e la Missouri, lefats’e leo la bojalefa ba lona, leo joale e leng lefats’e la lira tsa lona.
43 Empa, bonang, ’na, Morena, ke tla potlakisa motse oo ka nako ea teng, ’me ke tla roesa ba ts’epahalang moqhaka oa nyakallo le oa thabo.
44 Bonang, ke ’na Jesu Kreste, Mor’a Molimo, ’me ke tla ba phahamisa ka letsatsi la ho qetela. Esita le joalo. Amen.