Dagiti Dadduma pay a Resources
Dagiti Naespirituan a Sagut

Dagiti Naespirituan a Sagut

Dagiti naespirituan a sagut ket dagiti bendision wenno kabaelan a naited babaen ti pannakabalin ti Espiritu Santo. Mangted ti Dios iti uray maysa laeng kadagitoy a sagut iti tunggal napudno a miembro ti Simbaan. Bayat ti yaawatmo kadagitoy a sagut, papigsaen ken bendisionandakanto ken tulongandaka nga agserbi kadagiti dadduma. (Kitaen iti DkK 46:8–12.) Isuro dagiti nasantuan a kasuratan maipapan iti adu a sagut ti Espiritu:

  • Ti pannakaammo “a ni Jesucristo ti Anak ti Dios, ken nailansa iti krus para iti basol dagiti lubong” (DkK 46:13).

  • Ti kabaelan a mamati kadagiti balikas dagiti agpaneknek maipapan ken ni Cristo (kitaen iti DkK 46:14).

  • Ti pannakaammo maipapan “ti paggigidiatan ti panangimaton” (DkK 46:15; kitaen met iti 1 Taga Corinto 12:5). Mausar daytoy a sagut iti panangimaton ken panangidaulo iti Simbaan.

  • Ti pannakaammo maipapan “ti nagdudumaan ti panagipagna,” a mangtulong kadatayo a makarikna no naggapu iti Dios ti panangisuro wenno impluwensia wenno manipud iti sabali a nagtaudan (DkK 46:16; kitaen met iti 1 Taga Corinto 12:6–7).

  • Ti sagut “ti nainsiriban a balikas” (1 Taga Corinto 12:8; DkK 46:17). Saan a maitudo daytoy iti linteg nga ammotayo a kasti Word of Wisdom. Ketdi, daytoy ti sagut ti sirib—ti kabaelan a mangusar iti pannakaammo kadagiti nalinteg a wagas.

  • Ti sagut “ti balikas ti pannakaammo” (1 Taga Corinto 12:8; DkK 46:18).

  • Ti kabaelan a mangisuro babaen ti pannakabalin ti Espiritu Santo (kitaen iti Moroni 10:9–10; kitaen met iti DkK 46:18)

  • Ti sagut ti pammati (kitaen iti 1 Taga Corinto 12:9; Moroni 10:11).

  • Ti sagut ti “pammati a maagasan” (DkK 46:19).

  • Ti sagut “ti pammati a makaagas” (DkK 46:20; kitaen met iti 1 Taga Corinto 12:9; Moroni 10:11).

  • “Ti panagaramid kadagiti milagro” (1 Taga Corinto 12:10; DkK 46:21; kitaen met iti Moroni 10:12).

  • Ti sagut ti pammadto (kitaen iti 1 Taga Corinto 12:10; Moroni 10:13; DkK 46:22). Insuro ni Juan a Maipatpateg a “ti pammaneknek ken Jesus isu ti espiritu ti pammadto” (Apocalipsis 19:10).

  • “Ti panangimatang kadagiti anghel ken dagiti agpapaay nga espiritu” (Moroni 10:14).

  • “Panangilasin kadagiti espiritu” (1 Taga Corinto 12:10; DkK 46:23).

  • Ti sagut nga agsao iti nadumaduma a lengguahe, wenno pagsasao (kitaen iti 1 Taga Corinto 12:10; Moroni 10:15; DkK 46:24).

  • Ti sagut “ti panagipatarus kadagiti pagsasao” (1 Taga Corinto 12:10; DkK 46:25; kitaen met iti Moroni 10:16).

Dagitoy a naespirituan a sagut ken dadduma pay a nailista kadagiti nasantuan a kasuratan ket sumagmamano laeng a pagarigan ti adu a sagut ti Espiritu. Mabalinnaka a bendisionan ti Apo iti sabali a wagas nga agpannuray iti kinapudnom ken kadagiti kasapulam ken kasapulan dagiti pagserbiam. Binilinnatayo nga agtrabaho a sipapasnek tapno makaawattayo kadagiti naespirituan a sagut:

“Agannadkayo amangan ta maallilawkayo; ket tapno saankayo a maallilaw sapulenyo a sipapasnek dagiti kasayaatan a sagut, a kanayon a laglagipenyo ti gapu ti nakaitedanda;

“Ta pudno kunak kadakayo, naitedda a para iti pagimbagan dagiti mangayat kaniak ken mangtungpal kadagiti amin a bilinko, ken isu a mangsapul a mangaramid; tapno mairanud ti amin a mangsapul wenno agdawat kaniak” (DkK 46:8–9; kitaen met iti 46:26).