Awhaga ang mga tigkat-on sa pagpaambit sa mga kamatuoran nga ilang nakat-onan.

Ang Ginoo nagsugo sa kabatan-onan ug sa mga young adult sa pagtabang sa pagpundok sa Israel. Ang pagpaambit sa ilang mga gituohan ug mga pagpamatuod ngadto sa uban makadapit og dugang nga pagkat-on ug mapalawom ang ilang pagkakabig ngadto sa Manluluwas ug sa Iyang ebanghelyo. Ang uban nga mga estudyante nanglimbasog sa pagkahibalo kon unsaon sa pagsugod niining panag-istorya bahin sa ebanghelyo. Ang mga estudyante makasugod og panag-istorya bahin sa ebanghelyo ngadto sa uban pinaagi sa (1) pagkonsiderar kon unsa ang ilang nakat-onan mahitungod ni Jesukristo ug sa Iyang ebanghelyo, (2) pagpamalandong kon si kinsa ang makabenepisyo gikan sa panaghisgotan, ug (3) pagdesisyon kon unsaon nila sa pag-aghat og usa ka panaghisgotan uban niana nga indibidwal. Mahimo kini pinaagi sa nagkadaiya nga mga pamaagi, sama sa pagtudlo og usa ka leksiyon sa Dali, Sunod Kanako, mopasiugda og panaghisgotan sa klase, magsulat og mubo nga sulat, magpadala og usa ka mensahe sa text, o mopaambit og usa ka artikulo mahitungod sa Simbahan. Ang katuyoan dili ang pagpaambit sa gituohan o kasinatian apan sa pagpasiugda hinoon og usa ka panag-istoryahanay bahin sa ebanghelyo. Ang pagbuhat sa ingon makadapit sa uban sa pagpangutana ug pag-awhag og dugang nga panag-istorya sa umaabot.

Pahinumdom: Kon ikaw adunay mga estudyante kinsa mahadlokon sa pagbuhat niini, ikonsiderar kon unsaon nimo sa pagtabang kanila nga mokonektar ngadto ni Jesukristo. Siya motabang kanila samtang sila moabli sa ilang mga baba sa pagpaambit sa Iyang kamatuoran.

Dapit sa hinapos sa klase, dapita ang imong mga estudyante sa pagpamalandong kon si kinsa ang ilang gusto nga mapaambitan og usa ka butang. Dapita sila sa pagsulat og gamayng mubo nga sulat o mopadala og text nga makahatag og kahigayonan nga sila makabaton og panag-istoryahanay bahin sa ebanghelyo niana nga tawo kon sila magkita sa usag usa. Sama pananglit, ang mga estudyante maka-text nga:

• “Naghisgot mi og butang sa seminary karon diin nakahunahuna ko nimo. Pahinumdomi ko sa pagsulti nimo bahin niini kon magkita ta sa sunod.”

• “Oy, naghunahuna ko bahin sa abilidad sa Manluluwas sa pagpasaylo. Makatabang ka ba nako nga maghunahuna og mga butang bahin Kaniya? Kon mao, kanus-a kaha ang maayong higayon nga mag-istorya?”

Iklik dinhi aron makakita og bidyo niini nga modelo.

1:37

Paghimo og tulo pa ka hugpong sa mga pulong nga imong magamit isip ehemplo sa pagtabang sa mga estudyante nga makita kon unsaon sa pagsugod og panag-istoryahanay bahin sa ebanghelyo.

• Unsa ang imong nakat-onan mahitungod sa pagtabang sa mga tigkat-on nga makahimo o makasugod og panag-istoryahanay bahin sa ebanghelyo?

• Sa unsang paagi ang pagtabang sa mga tigkat-on sa pagpaambit sa ilang mga gituohan ug mga pagpamatuod uban sa ilang pamilya makatabang sa ilang kasinatian sa seminary o institute nga mahimong usa ka tinuod nga kasinatian nga nakasentro sa panimalay?

Ipaambit sa imong mga estudyante ang pipila ka mga ehemplo bahin sa unsa ang ilang masulat aron makasugod og usa ka panag-istoryahanay bahin sa ebanghelyo, ug dayon magpraktis sa pagpaambit niini diha sa klase. Hangyoa ang ubang mga estudyante nga motabang nila nga molambo. Dapita sila sa pagsugod og panag-istoryahanay kon sila andam na.

• Russell M. Nelson, “How to Share the Gospel,” New Era, Hulyo 2011, 48

• “Pagpaambit sa Ebanghelyo,”ChurchofJesusChrist.org