Tabangi ang mga tigkat-on nga makaila sa gugma, gahom, ug kalooy sa Ginoo diha sa ilang kinabuhi.

Adunay gahom nga moabot kon atong ikonektar ang atong mga paningkamot sa pagsunod sa mga baroganan sa ebanghelyo ngadto sa atong Manluluwas si Jesukristo. Paggahin og panahon diha sa inyong pagpangandam sa pagpamalandong kon unsa ang mga baroganan sa ebanghelyo diha sa hut-ong sa kasulatan nga makatabang kanimo nga masayod ug makasabot mahitungod ni Jesukristo. Dayon mainampingon nga maghimo og mga pangutana nga makadapit sa mga estudyante sa pagkonsiderar kon unsa ang ilang makat-onan mahitungod sa Iyang gugma, gahom, ug kalooy gikan sa mga kamatuoran nga gitudlo. Agi og dugang sa pagtabang sa mga estudyante nga masabtan ang doktrina, kining mga matang sa mga pangutana makatabang usab kanila nga makita kon sa unsa nga paagi nga ang pagsunod niana nga doktrina makatabang nila nga makasinati sa Iyang gugma, gahom, ug kalooy, ingon man ang pagkahimong mas sama Kaniya. Kining mga matang sa mga pangutana mahimo usab nga makatabang sa mga estudyante nga mokonsiderar kon sa unsang paagi si Jesukristo motabang kanila nga masunod kana nga doktrina.

Imbis mangutana kon …

• Nganong importante man ang pagsunod sa balaod sa ikapulo?

• Nganong kinahanglan man kitang maghinulsol sa matag adlaw?

Sulayi hinoon sa pagpangutana …

• Unsa ang natudlo sa pagsunod sa balaod sa ikapulo diha ninyo mahitungod sa inyong Langitnong Amahan ug ni Jesukristo?

• Unsa ang inyong nakat-onan mahitungod sa kalooy sa Manluluwas pinaagi sa matag adlaw nga paghinulsol?

Iklik dinhi aron makakita og bidyo niini nga modelo.

1:23

Pagpraktis pinaagi sa pag-usab sa mosunod nga mga pangutana sa paagi nga makatabang sa mga estudyante nga makakonektar sa gugma, gahom, ug kalooy sa Ginoo ngadto sa mga kamatuoran nga gitudlo.

Imbis mangutana kon …

• Nganong importante ang pagtuon sa mga kasulatan sa matag adlaw?

• Unsa ang gahom nga moabot gikan sa pagtambong sa templo?

Sulayi hinoon sa pagpangutana …

• Sa unsang paagi kamo nakakat-on sa pagsiguro nga ang mga baroganan sa doktrina mahimong mas makahuluganon samtang kamo mokonektar niini ngadto sa gugma, gahom, ug kalooy sa Ginoo?

• Sa unsang paagi kini makatabang sa atong mga estudyante nga mas makasabot ug mosalig diha sa mga pagtulon-an ug sa Pag-ula ni Jesukristo?

Tan-awa ang inyong sunod nga plano sa leksiyon. Paggahin og 10 ka minutos sa pag-usab sa mga pangutana aron matabangan ang mga estudyante sa pagkonektar sa gugma, gahom, ug kalooy sa Ginoo ngadto sa mga kamatuoran nga gitudlo.

• Chad H Webb, “Kami Naghisgot kang Kristo, Kami Nalipay diha kang Kristo” (Tinuig nga sibya sa pagbansay sa Seminaries and Institutes of Religion, Hunyo 12, 2018), broadcasts.ChurchofJesusChrist.org

• Chad H. Webb, “Empatiya” (Tinuig nga Sibya sa Pagbansay sa Seminaries and Institutes of Religion, Ene. 26, 2021), broadcasts.ChurchofJesusChrist.org