Ko Hono Fakamālohia ʻo e Kāingalotu Foʻoú mo Foki Maí: Fokotuʻutuʻu Fakaako ʻOku Fokotuʻu Atú

1. Fakaava ʻa e Gospel Library (ko e polokalamá pe peesi uepisaití) pea ʻalu ki he Ngaahi Tohi Tuʻutuʻuní mo e Ngaahi Uiuiʻí, pea ki he Ngaahi Uiuiʻi Fakauooti pe Fakakoló, pea ki he Fakamālohia ʻo e Kāingalotu Foʻoú mo Foki Maí. (ʻOku maʻu ʻa e naunau te ke fiemaʻu ki he ako ko ʻení ʻi he konga ko ʻení.) Fakaava pea toe vakaiʻi ʻa e “Ko Hono Tokoniʻi ʻo e Kāingalotu Foʻoú mo Foki Maí ke Nau Nofo Maʻu ʻi he Hala ʻo e Fuakavá (Helping New and Returning Members Stay on the Covenant Path).” Aleaʻi mo hoʻo hoá pe kulupú ʻa e:

   • Ko e hā ʻoku mahuʻinga ai e ngaahi aʻusia ko ʻení ki hono tokoniʻi ʻo e kakaí ke nau hū mo nofo maʻu ʻi he hala ʻo e fuakavá?

2. Mamata ʻi he ngaahi konga ʻo e vitiō “The Bush Family Story” (ʻi he konga ʻo e Ngaahi Vitiō ʻo e Fakamālohia ʻo e Kāingalotu Foʻoú (Strengthening New Members Videos)) pe ko e “The Battina and Sydney Story” mo e “The Lynette and Sean Story” (ʻi he konga ʻo e Ngaahi Vitiō ʻo e Fakamālohia ʻo e Kāingalotu Foʻoú (Strengthening Returning Members Videos)). ʻI hoʻo sio ʻi he ngaahi vitioó, kumi ʻa e founga naʻe fakaʻaongaʻi ai ʻi he talanoa takitaha ʻa e ngaahi meʻa ʻi he saati ʻi laló ʻi he “Kimuʻa e Papitaisó pe Toe Foki ki he Siasí (Before Baptism or Returning to Church),” “Hili pē ʻa e Papitaisó pe Toe Foki ki he Siasí (Soon after Baptism or Returning to Church),” mo e “ʻI he ʻUluaki Taʻú (Within the First Year).”

   

   7:12
   

   6:44

   Alēlea:

   • Ko e hā ʻoku tau fakahoko lelei ke tokoniʻi e kāingalotu foʻoú mo kinautolu ʻoku foki maí ke nau fakalakalaká?

   • Ko e hā ha tafaʻaki ʻe taha pe ua ʻoku tau ongoʻi te tau lava ʻo fakalakalaka ai?

3. Mamata ʻi he konga ʻo e vitiō “The Importance of Friendships.” Alēlea:

   • Ko e hā ʻoku hoko ai ʻa e feohi fakakaungāmeʻa moʻoni mo e kāingalotú ko e taha ʻo e ngaahi meʻa mālohi taha ʻi hono tokoniʻi ʻo e kāingalotu foʻoú mo kinautolu ʻoku foki maí ke nau hū mo nofo maʻu ʻi he hala ʻo e fuakavá?

   • Te tau lava fēfē ʻo tokoni ke fokotuʻu ha feohi fakakaungāmeʻa moʻoni ʻi he vave taha ʻe lavá? Te tau lava fēfē nai ʻo pukepuke ʻa e ngaahi vā fakakaungāmeʻa ko ʻení?

4. Mamata ʻi he konga ʻo e vitiō “Working Together.” Alēlea:

   • Naʻe ngāue fakataha fēfē ʻa e kāingalotú mo e kau faifekaú ke feau e ngaahi fiemaʻu ʻa e fāmili Puseí?

   • Ko e hā ʻe lava ke toe lelei ange ʻi hotau ʻiunití ke ngāue fakataha lelei ange ai ʻa e kāingalotú mo e kau faifekaú ʻi he ngaahi ngāue ko ʻení?

5. Mamata ʻi he konga ʻo e vitiō ko e “Blessing New and Returning Members Through Councils.”

   

   5:25

   Alēlea:

   • Naʻe ngāue fēfē ʻa e kau pīsopelikí, fakataha alēlea fakauōtí, mo e ngaahi fakataha fakafekauʻaki ʻo e ngāue fakafaifekaú ʻi hono tokoniʻi ʻo Salavatoa ke fakalakalaká?

   • Naʻe tokoni fēfē ʻa e meʻangāue Fakalakalaka ʻi he Hala ʻo e Fuakavá ki he kau takí?

   • Ko e hā ʻe lava ke fakaleleiʻi ʻi hotau ʻiunití ke feau lelei ange ai ʻe he ngaahi fakataha alēlea mo e ngaahi fakataha ko ʻení ʻa e ngaahi fiemaʻu ʻa e kāingalotu foʻoú mo foki maí?

6. ʻI he konga tatau pē ʻi he Fakamālohia ʻo e Kāingalotu Foʻoú mo Foki Maí ʻi he Gospel Library, fakaava ʻa e Ko Hoku Hala ʻo e Fuakavá pea ʻalu ki he talateu “Ko Hoku Hala ʻo e Fuakavá.” Lau fakataha ʻa e peesi ko ʻení pea aleaʻi ʻa e founga ʻe lava ke fakaʻaongaʻi ai ʻa e Ko Hoku Hala ʻo e Fuakavá ke tokoniʻi ʻa e kāingalotu foʻoú mo foki maí. Toe vakaiʻi ha aʻusia ʻe ua pe lahi ange ʻi he Ko Hoku Hala ʻo e Fuakavá. Alēlea:

   • ʻE lava fēfē ke ngāue fakataha ʻa e kau tangata mo e kau fafine mo e kau faifekau ngāue fakaetauhí ke tokoniʻi ʻa e kāingalotu foʻoú pe foki maí?

   • ʻE tokoniʻi fēfē ʻe he ngaahi aʻusia ko ʻení ʻa e kāingalotu foʻou mo foki maí ke nau ako ʻa e ongoongoleleí, ongoʻi ʻa e Laumālié, mo langaki ha feohi fakakaungāmeʻa tuʻuloa mo e kāingalotu kehé?

7. Palani ʻa e founga te ke tokoniʻi ai ʻa e kāingalotu foʻou mo foki mai ʻokú ke ngāue fakaetauhi ki aí ke nau lava ʻo hū ki he Ko Hoku Hala ʻo e Fuakavá. Kapau ʻoku nau fakaʻaongaʻi ha meʻangāue Android, te nau lava ʻo download ʻa e polokalama Gospel Library mei he Google Play store ʻi heni. Kapau ʻoku nau fakaʻaongaʻi ha meʻangāue iOS, te nau lava ʻo download ʻa e polokalama Gospel Library mei he Apple App Store ʻi heni. Te ke lava foki ʻo ʻoange ha tatau kuo paaki. (Fakatokangaʻi ange: ʻE lava ke maʻu ʻe he kau mēmipa foʻoú mo foki maí ʻa e Ko Hoku Hala ʻo e Fuakavá ʻaki ʻenau ʻalu ki he Kakai Lalahí pea ki he Kau Mēmipa Foʻoú pe Toe Foki Maí ʻi he Gospel Library.)

ʻOku fakaʻaongaʻi e lipooti Fakalakalaka ʻi he Hala ʻo e Fuakavá ke tokoni ki he kau mēmipa foʻoú mo e mēmipa foki maí ke muimuiʻi ʻenau fakalakalaka ʻi he hala ʻo e fuakavá lolotonga e fuofua taʻu ʻe ua ʻenau mēmipa ʻi he Siasí pe ko e foki ki he ʻekitivitī ʻa e Siasí. ʻOku fakaʻaongaʻi foki ia ke tokoniʻi e kakai ʻoku akoʻi ʻe he kau faifekaú. ʻOku ʻatā ia ki he kau taki fakalotofonuá ʻi he lisi ʻo e Ngaahi Lipōtí ʻi he polokalama ʻo e Ngaahi Meʻangāue ʻa e Mēmipá mo e LCR.

ʻOku fakatahaʻi ʻa e lipooti Fakalakalaka ʻi he Hala ʻo e Fuakavá mo e polokalama Malanga ʻAki ʻEku Ongoongoleleí ʻa ia ʻoku fakaʻaongaʻi ʻe he kau faifekau taimi kakató. ʻI he taimi ʻoku liliu ai ha fakamatala ʻi ha taha ʻiate kinaua, ʻoku liliu ai pē ʻi he taimi ko iá mo e fakamatala ʻi he polokalama ʻe tahá. ʻOku totonu ke fakaʻaongaʻi ʻa e lipōtí ʻe he kau taki fakalotofonuá ko ha meʻangāue fakafekauʻaki mahuʻinga. ʻOku totonu ke nau fakaava mo toe vakaiʻi maʻu pē ia, fakakau ia ko ha konga ʻo e fakataha alēlea fakauōtí, ngaahi fakataha fakafekauʻakí, pea mo ʻenau fakataha mo e kau faifekau taimi-kakató.

ʻE lava ke hū mo fakatonutonu ʻe he kau taki ko ʻení ʻa e fakalakalaka ʻa ha mēmipa foʻou pe foki mai ʻo fakafou ʻi he Fakalakalaka ʻi he Hala ʻo e Fuakavá:

• Mēmipa foʻoú (kau ai e mātuʻa ʻa e fānaú)

• Pīsopelikí (kau ai ʻa e kau kalaké mo e sekelitalí)

• Kau palesitenisī ʻo e kōlomu ʻo e Kaumātuʻá (kau ai ʻa e kau sekelitalí)

• Kau palesitenisī ʻo e Fineʻofá (kau ai ʻa e kau sekelitalí)

• Taki ngāue fakafaifekau fakauōtí (kau ai e tokoni taki ngāue fakafaifekau fakauōtí)

• Kau faifekau fakauōtí

8. Ke hū ki he lipōtí, fakaava ʻa e polokalama Member Tools (pe Maʻuʻanga Tokoni ki he Takí mo e Kalaké [LCR] ʻi he ʻinitanetí), ʻalu ki he Ngaahi Lipōtí, pea fili leva ʻa e Fakalakalaka ʻi he Hala ʻo e Fuakavá. Te ke lava ʻo fili ha taha ʻo e ngaahi konga ʻe tolú: Kau Mēmipa Foʻoú, Foki Maí, mo e Kakai ʻOku Akoʻí. ʻOku ʻasi ʻi he konga takitaha ha tefitoʻi fakamatala fekauʻaki mo kinautolu kuo papitaiso ʻi loto he taʻu ʻe ua kuohilí pea nofo ʻi hoʻo ʻiunití pea mo kinautolu ʻoku lolotonga akoʻi ʻe he kau faifekaú. ʻI he taimi ʻoku mamataʻi ai ʻa e konga ʻo e Kāingalotu Foki Maí, ʻoku lava ʻa e kau taki ko ʻení ʻo hū ke tānaki ha mēmipa ʻoku foki mai hili haʻane maʻu ha ngofua mei he mēmipa kuo foki maí ke tānaki ia:

   • Pīsopelikí (kau ai ʻa e kau kalaké mo e sekelitalí)

   • Kau palesitenisī ʻo e kōlomu ʻo e Kaumātuʻá

   • Kau palesitenisī ʻo e Fineʻofá

   • Taki ngāue fakafaifekau fakauōtí (kau ai e tokoni taki ngāue fakafaifekau fakauōtí)

   Toe vakaiʻi ʻa e lisi ʻo e kāingalotu foʻoú pe foki maí pea aleaʻi e founga ʻoku nau fakalakalaka aí.

9. Fili ʻa e hingoa ʻo ha mēmipa foʻou pe foki mai (pe fili ʻa e Mamata ki he Ngaahi Fakaikiikí ʻi he LCR mo e iOS). ʻOku ʻasi mai ha fakamatala lahi ange fekauʻaki mo e fakalakalaka ʻa e fakafoʻituituí. Alēlea:

   • Ko e hā ʻa e fekauʻaki ʻa e fakamatala ko ʻení mo e Ko Hoku Hala ʻo e Fuakavá?

   • Ko e hā ʻoku fiemaʻu ke hoko ke tokoni ki he fakalakalaka ʻa e kāingalotu foʻoú pe foki maí?

10. ʻE lava ʻe kinautolu ʻoku lava ʻo hū ke fai ha fakatonutonú ʻo:

    • Lekooti ʻa e Maʻulotu Sākalamēnití (Fakatokangaʻi ange: Kapau ʻoku ʻikai lava ʻa e mēmipa foʻoú pe foki maí ʻo ʻalu ki he houalotu sākalamēnití koeʻuhí ko ha ngaahi ʻuhinga fakaemoʻui lelei, fakaʻilongaʻi ʻoku nau maʻulotu kapau kuo lava ʻa e mēmipa foʻoú ʻo maʻu ʻa e sākalamēnití ʻi ʻapi pe maʻu houalotu sākalamēniti ʻi ha ngaahi founga mamaʻo.)

    • Tānaki e hingoa ʻo ha kaungāmeʻa ki he fakamatala ʻo e mēmipa foʻoú pe foki maí.

    • Fakatonutonu e ngaahi tefitoʻi moʻoni naʻe akoʻí (ngaahi lēsoni ʻa e kau faifekaú ʻi he hili ʻa e papitaisó).

    • Fakapapauʻi ʻoku tonu ʻa e fakamatala fekauʻaki mo e kau tangata mo e kau fafine ngāue fakaetauhí.

11. ʻE ʻasi mai ha ngaahi fanongonongo ʻi he polokalamá ʻi he taimi ʻoku fokotuʻu mai ai ʻe he Fakalakalaka ʻi he Hala ʻo e Fuakava ʻa e fakafoʻituituí ʻoku siʻisiʻi ange ʻene kau mai ki he ʻekitivitī ʻa e Siasí.

12. ʻE lava foki ʻe he kāingalotu foʻoú mo kinautolu ʻoku foki maí ʻo fakatonutonu ʻenau fakalakalaká. ʻAi ke kumi ʻe he mēmipa foʻoú ʻenau fakamatala puipuituʻá mei he tohi tuʻasila ʻi he Member Tools. Hokó, ʻai ʻa e mēmipá ke lomiʻi ʻi he Fakalakalaka ʻi he Hala ʻo e Fuakavá.

13. ʻOku fatongia ʻaki ʻe he palesiteni ʻo e kōlomu ʻo e Kaumātuʻá mo e Fineʻofá hono fakapapauʻi ʻoku fakatonutonu taimi totonu ʻa e fakamatala ki he mēmipá. Te nau lava ʻo vahe ʻa e fatongiá ni. Aleaʻi pe ko hai te ne fakatonutonu ʻa e fakamatala ki he mēmipá, tuʻo lahi hono fakatonutonú (sai tahá ke fakauike), mo e founga ʻe fakaʻaongaʻi ai ʻa e Fakalakalaka ʻi he Hala ʻo e Fuakavá ʻi he fakataha alēlea fakauōtí mo e ngaahi fakataha fakafekauʻaki fakauiké.

14. Huluʻi e konga vitiō “How Temples and Family History Strengthen New Members.”

    

    5:13

    Aleaʻi ʻa e founga ʻe lava ke tokoni ai hoʻo ngaahi ngāué ki he kāingalotu foʻou mo foki maí ke nau nofo maʻu ʻi he hala ʻo e fuakavá (vakai, Sione 15:16) pea iku ʻo maʻu ʻa e ngaahi ouau kotoa ʻo e fakamoʻuí mo e hakeakiʻí. Palani ʻa e meʻa ʻe fai ʻe homou ʻiunití ke tanumaki ʻaki e kāingalotu foʻoú mo foki maí pea pehē kiate kinautolu ʻoku akoʻi ʻe he kau faifekau ʻi homou haʻofangá.