Vahevahe ʻa e Tohi ʻa Molomoná
Vahevahe ʻa e app ʻo e Tohi ʻa Molomoná
ʻOku ʻomi ʻe he Tohi ʻa Molomoná ha ʻamanaki lelei, fakamālohia ʻa e tui kia Sīsū Kalaisí, mo fakaʻatā ki he Laumālié ke ne ʻomi ki he kakaí ʻa e nonga mo e fakahinohino ʻi he ngaahi tafaʻaki kotoa pē ʻo ʻenau moʻuí. Naʻe akoʻi mai ʻe Palesiteni Lāsolo M. Nalesoni, ko e taimi ʻoku tau vahevahe ai ʻa e Tohi ʻa Molomoná, ʻoku tau vahevahe ʻa e “ mālohi ke fakamoʻui, fakanonga, fakafoki, tokoniʻi, fakamālohia, fakafiemālieʻi, mo fakafiefiaʻi hotau laumālié.” Naʻá Ne palōmesi mai, “ʻi hoʻo ako [ʻi he faʻa lotu] ʻa e Tohi ʻa Molomoná ʻi he ʻaho kotoa peé, ʻe toe lelei ange ai hoʻo fai tuʻutuʻuní—ʻi he ʻaho kotoa pē. … ʻI hoʻo fakalaulauloto ki he meʻa ʻokú ke akó, ʻe fakaava mai e ngaahi matapā ʻo e langí, pea te ke maʻu e tali ki hoʻo ngaahi fehuʻí mo e tataki ki hoʻo moʻuí.”
“ʻOku [akoʻi ʻe he Tohi ʻa Molomoná ʻa] e tokāteline ʻo Kalaisí. … [‘Okú ne ʻomi] e mahino kakato mo taupotu taha ki he Fakalelei ʻa Sīsū Kalaisí, he ʻikai ke toe maʻu ia mei ha feituʻu kehe. … ʻOku tau maʻu e mālohi kakato ʻo e ongoongolelei ʻo Sīsū kalaisí ʻi he Tohi ʻa Molomoná” (“Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema. 2017, 62–63).
ʻOku lahi ha ngaahi founga te ke lava ai ʻo vahevahe ʻa e Tohi ʻa Molomoná mo e niʻihi kehé. Te ke lava ʻo talanoa ki he kakaí fekauʻaki mo ha akonaki naʻá ke ako mei ai. Te ke lava ʻo vahevahe ha veesi mo hoʻo ngaahi kaungāmeʻá, ʻa ia ʻoku fekauʻaki mo ʻenau moʻuí. Te ke lava ʻo fakamatalaʻi ʻa e founga kuo tokoni ai ʻa e tohí ke ke ʻiloʻi ʻa e ʻamanaki lelei mo e fakamoʻui ʻoku ʻomi ʻe Sīsū Kalaisí pea tag ʻa e @thebookofmormon ʻi hoʻo vahevahe ʻi he initanetí.
Fakaafeʻi ha taha ke ne mamataʻi ha vitiō Tohi ʻa Molomona pe lau ha tohi fakatātā ʻo e talanoa ʻi he Tohi ʻa Molomoná. ʻAve ki ha taha ʻa e polokalama ʻo e Tohi ʻa Molomoná ʻi honau lea fakafonuá pea fakaʻaliʻali ange ʻa e founga ʻokú ne tali ai ʻa e ngaahi fehuʻi ʻo e lotó. Fengāueʻaki mo e peesi mītia fakasōsiale ʻa e Siasí ki he Tohi ʻa Molomoná, pe hū ki he ngaahi kulupu ʻoku nau tokanga taha ki hono ako mo vahevahe ʻo e ngaahi fakakaukau mei he Tohi ʻa Molomoná.
ʻI hoʻo lotua ha fakahinohino ki he founga ke vahevahe ai mo e niʻihi kehé ʻa e ngaahi akonaki mo e mālohi ʻo e Tohi ʻa Molomoná, ʻe tataki koe ʻe he Laumālie Māʻoniʻoní.