“Ko Hoku Hala ʻo e Fuakavá,” Ko Hoku Hala ʻo e Fuakavá (2020)
“Ko Hoku Hala ʻo e Fuakavá,” Ko Hoku Hala ʻo e Fuakavá
Ko Hoku Hala ʻo e Fuakavá
ʻOku Talitali Lelei Koe ki he fāmili ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní! ʻOkú ke ʻi ha hala fononga te ne ʻomi kiate koe ha ngaahi aʻusia foʻou lahi. ʻI heʻemau hoko ko hoʻo ngaahi tokoua/tuongaʻane/tuofāfine, pea mo hoʻo kaungāmeʻá, ʻoku mau loto ke tokoni atu ʻi hoʻo ʻi he hala fonongá ni ke ke nofo maʻu ai ʻi hoʻo tui kia Sīsū Kalaisí mo ongoʻi lata ʻi he Siasí.
ʻOku mau ʻiloʻi ʻe makehe ʻa e muimui ki he hala ʻo e fuakava ʻa e ʻEikí kiate koe, ka kuo mau lisi atu heni ha ngaahi aʻusia mahuʻinga ʻoku ʻamanaki ke ke aʻusia, ke ke kamata ai. Kapau ko ha mēmipa foʻou koe, te ke lava ʻo meimei maʻu kotoa ʻa e ngaahi aʻusia ʻoku hiki atu ʻi he fakahinohino ko ʻení ʻi loto ʻi ha taʻu ʻe taha ʻo hoʻo papitaisó mo e hilifakinimá. ʻE lava ke hoko hono maʻu ho ʻenitaumení mo e sila ki ho fāmilí ʻi he konga kimuʻa ʻo e taʻu hono ua ʻo hoʻo kau ki he Siasí.
Kapau kuó ke hoko ko ha mēmipa ʻo lōloa ange ʻi he taʻu ʻe tahá, te ke lava ʻo fiefia ʻi he ngaahi aʻusia kotoa ko ʻení ʻi he vave tahá ʻi he taimi te ke maau aí. Mahalo kuó ke ʻosi kamata maʻu ha niʻihi ʻo e ngaahi aʻusia ko ʻení; kapau ʻoku pehē, ʻe tokoni atu ʻa e fakahinohino ko ʻení ke ke fakaleleiʻi ʻa e meʻa ʻokú ke fai ʻi he taimi ní. Manatuʻi, ʻoku totonu ke makatuʻunga ʻa e fokotuʻutuʻu mo e vave hoʻo muimui ki aí ʻi ho ngaahi tūkunga fakafoʻituituí, mateuteú mo hoʻo loto-holí.
ʻI hoʻo vakai ki he fakahinohino ko ʻení, te ke fakatokangaʻi ʻoku kau ʻi he fakamatala ʻo e aʻusia takitaha ha ngaahi meʻa ke fai ki ai ha ngāue mo ha lisi ʻo e ngaahi maʻuʻanga tokoni te ke lava ʻo akó. ʻE lava ke tokoni lahi ʻa e ngaahi ngāue ke faí mo e ngaahi maʻuʻanga tokoni ko ʻení kiate koe ʻi hoʻo laka ki muʻa ʻi ho halá.
Tau kamata leva!
Ki he kau tangata mo e kau fafine ngāue fakaetauhí mo e kau faifekaú:
Ko ho fatongia ʻi hono tokoniʻi ʻo e kāingalotu foʻou pe foki mai ʻo e Siasí, ʻoku faingofua ka ʻoku fuʻu mahuʻinga ʻaupito. Ko ho faingamālie mahuʻinga tahá ke hoko ko honau kaungāmeʻa moʻoni. Te ke hoko foki ko ha faifakahinohino mo ha tataki kiate kinautolu lolotonga ʻa e ʻuluaki taʻu ʻe ua ʻo e mēmipasipí.
ʻE tokoniʻi koe ʻe he maʻuʻanga tokoni ko ʻení ʻi he fatongia mahuʻinga ko ʻení. Lau fakafoʻituitui ʻa e aʻusia takitaha ʻi he maʻuʻanga tokoni ko ʻení mo e kāingalotu foʻoú pe foki maí, pea tokoniʻi kinautolu ʻi hono fakakakato ʻo e ngaahi ngāué. Ki he ngaahi ngāue ʻoku kamata ʻaki ʻa e “Ako fekauʻaki mo e,” te ke toe vakaiʻi mo aleaʻi ʻa e ngaahi maʻuʻanga tokoni ʻoku lisi atú mo e mēmipa foʻoú pe foki maí. Fai ʻa e meʻa kotoa pē te ke lavá ke tokoniʻi ia ke ne ongoʻi ʻa e ʻofa ʻa e ʻOtuá, ongoʻi hoʻo ʻofá, pea nofo maʻu ʻi he hala ʻo e fuakavá.