Ako fekauʻaki mo e ʻOfá, Vahevahé, mo e Fakaafé
Naʻe fakahinohinoʻi ʻe he ʻEiki toetuʻú ʻa ʻEne kau ʻAposetoló, “Mou ʻalu ki māmani kotoa pē, ʻo malanga ʻaki ʻa e ongoongoleleí ki he kakai fulipē” (Maʻake 16:15). ʻOku ʻatautolu ʻa e fatongia tatau he kuongá ni. ʻI he Tokāteline mo e Ngaahi Fuakavá, ʻoku fakaafeʻi kitautolu ʻe he Fakamoʻuí ke “fakaava [hotau] ngutú ke fakahā ʻa ʻeku ongoongoleleí” (Tokāteline mo e Ngaahi Fuakava 30:5).
ʻOku fakamanatu mai ʻe ʻEletā Keuli E. Sitīvenisoni, “ko e fekau maʻongoʻonga ʻa e Fakamoʻuí ʻo fakafou ʻi he ngaahi tefitoʻi moʻoni faingofua, mo mahinongofua kuo akoʻi kiate kitautolu takitaha talu mei heʻetau kei īkí, ʻa ia ko e: ʻofá, vahevahé, mo e fakaafé” (“ʻOfa, Vahevahe, Fakaafe,” Liahona, Mē 2022, 85). Ko e ngaahi tefitoʻi moʻoni ko ʻení ko ha ngaahi founga mālohi mo fakatahataha ia ʻe lava ke ke vahevahe ʻaki ʻa e ongoongoleleí mo e kakaí ʻi ha founga angamaheni mo fakanatula. ʻOku ʻikai ke fiemaʻu ki ai ha pine pe ko ha tohi uiuiʻi [ngāue fakafaifekau]. ʻOku ʻikai fiemaʻu ia ke fai hano uiuiʻi.
ʻOfá: “ʻOku fakahaaʻi mahino lelei ʻi he ʻofa ki he niʻihi kehé ʻa e fekau lahi hono ua ke ʻofa ki hotau kaungāʻapí; ʻoku hā ai ʻa e founga fakamaʻa ʻoku fai ʻe he Laumālie Māʻoniʻoní ki hotau ngaahi lotó. ʻI hono fakahaaʻi ʻo e ʻofa ʻa Kalaisí ki he niʻihi kehé, te tau lava ke ueʻi kinautolu ʻoku mamata ki heʻetau ngāue leleí ke ‘fakamālōʻia [ʻetau] Tamai ʻa ia ʻoku ʻi he langí’ [Mātiu 5:16]” (Gary E. Stevenson, “ʻOfa, Vahevahe, Fakaafe,” 85).
Vahevahe: “ʻOku tau vahevahe kotoa ha ngaahi meʻa mo e niʻihi kehé. ʻOku tau faʻa fai ia. ʻOku tau vahevahe ʻa e ngaahi heleʻuhila mo e meʻatokoni ʻoku tau saiʻia aí, ngaahi meʻa fakaoli ʻoku tau sio aí, ngaahi feituʻu ʻoku tau ʻaʻahi ki aí, ʻaati ʻoku tau houngaʻia aí, mo e ngaahi kupuʻi lea ʻokú ne ueʻi hotau lotó. ʻE anga fēfē haʻatau tānaki atu ki he lisi ʻo e ngaahi meʻa kuo tau ʻosi vahevahe fekauʻaki mo e meʻa ʻoku tau saiʻia ai ʻi he ongoongolelei ʻo Sīsū Kalaisí?” (Gary E. Stevenson, “ʻOfa, Vahevahe, Fakaafe,” 86).
Fakaafeʻi: “ʻOku laungeau ʻa e ngaahi fakaafe te tau lava ke fakaaʻu atu ki he niʻihi kehé. Te tau lava ʻo fakaafeʻi ʻa e niʻihi kehé ke nau ōmai ʻo mamata” ʻi ha houalotu sākalamēniti, ʻi ha ʻekitivitī fakauooti, pe ha vitiō ʻi he ʻinitanetí ʻokú ne fakamatalaʻi ʻa e ongoongolelei ʻo Sīsū Kalaisí. ʻE lava ke hoko ʻa e omi ʻo mamatá’ ko ha fakaafe ke lau ʻa e Tohi ʻa Molomoná pe ʻaʻahi ki ha temipale foʻou lolotonga ʻa e oupeni hausi kimuʻa pea fakatapuí” (Gary E. Stevenson, “ʻOfa, Vahevahe, Fakaafe,” 86).
Lotua ha ngaahi faingamālie ke vahevahe ai ʻa e ongoongoleleí. ʻE tataki koe ʻe he Tamai Hēvaní ke ke ʻiloʻi ʻa e kakai ʻoku mou feohi ʻoku mateuteu atú pea mo e fakaafe ke ke fakahokó.
ʻOua te ke hohaʻa ka ʻikai tali ʻe ha taha ha fakaafe. “ʻOku ʻikai makatuʻunga hoʻo lavameʻá ʻi he fili ʻa ha niʻihi ke tali koe, pe tali hoʻo ngaahi fakaafé, pe ki heʻenau meʻa ʻoku fai ʻi hoʻo ngaahi tōʻonga ʻofa fakamātoató. … Ko e meʻa ʻoku fiemaʻu ʻe he ʻEikí ko hoʻo lelei taha pē ʻaʻaú—ke ke ‘tauhi kiate ia ʻaki e kotoa ho lotó, iví, ʻatamaí mo e mālohí’ (Tokāteline mo e Ngaahi Fuakava 4:2; tānaki atu hono fakamamafaʻí)” (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 13).
ʻI hoʻo moʻui ʻaki ho tuí mo muimui ki he ngaahi ueʻi fakalaumālie ke vahevahe ʻa e ongoongoleleí, te ke lava ʻo aʻusia ʻa e fiefia ʻoku maʻu mei hono tokoniʻi e kakaí ke nau haʻu kia Kalaisi he ʻaho kotoá. “ʻOku hanga ʻe hono vahevahe ʻo e ongoongoleleí ʻo ʻomi ʻa e fiefia mo e ʻamanaki lelei ki he laumālie ʻo e tokotaha vahevahé mo e tokotaha ʻokú ne talí fakatouʻosi. Ko hono moʻoní, ‘hono ʻikai ke lahi pehē fau ʻa [hoʻo fiefiá’ [Tokāteline mo e Ngaahi Fuakava 18:15] ʻi hoʻo vahevahe ʻa e ongoongoleleí!” (Marcus B. Nash, “Hiki Hake Hoʻomou Māmá,” Liahona, Nōvema 2021, 71).