Me Baleti ira na Lalai—iDusidusi ni Gauna ni Lagasere kei na Nodra Vakaitavi na Gone ena Soqoni ni Sakaramede

Ena veidusimaki ni bisopi, na nodra vakaitavi na gone ena soqoni ni sakaramede ena dau vakayacori tiko enai kava ni vulatolu ni yabaki. O iratou na mataveiliutaki ni Lalai kei na iliuliu ni sere, mera cakacaka vata kei daunivakasala ena matabisopi e raica raraba na Lalai me tuvalaka na soqoni ni sakaramede.

Na vakaitavi e dodonu me vakatarai ira na gone mera vakaraitaka na ka era sa vulica mai na Veiyalayalati Makawa vata kei na nodra matavuvale e vale kei na Lalai, oka kina na sere ni Lalai era lagata ena loma ni yabaki. Nio tuvanaka na vakaitavi, vakasamataka na sala eso e rawa ni vukea na ivavakoso me vakanamata vua na iVakabula kei na Nona ivakavuvuli.

Sa rawa ni navuca na tabanilotu era lewe lailai kina na gone na sala eso era na rawa ni vakaitavi kina na lewe ni matavuvale kei na luvedra. Sa rawa ni vakacavara na soqoni e dua na lewe ni matabisopi ena so nai tukutuku lekaleka.

Nio vakarautaka na vakaitavi, nanuma na dusidusi eso oqo:

• Na vakatovotovo e sega ni dodonu me veicoqacoqa kei na gauna ni kalasi ni Lalai se gauna vakamatavuvale.

• Na iyalotalo se itaba, isulu ni vakatasuasua se vidio e sega ni veiganiti kei na soqoni ni sakaramede.

Raica na iVoladusidusi Raraba: Veiqaravi ena Lotu i Jisu Karisito ni Yalododonu Edaidai, 12.2.1.2, Valenivola Vakosipeli.

5 na miniti (mataveiliutaki ni Lalai): iDolamasu, ivolanikalou se yavu ni vakabauta, kei na dua na vosa

20 na miniti (liuliu ni sereivakatagi): Gauna ni Lagasere

Ena digitaka na sere ni veivula yadua na mataveiliutaki ni Lalai kei na iliuliu ni sereivakatagi me vaqaqacotaka na ivakavuvuli eso era sa vulica tiko na gone ena nodra kalasi vakakina e vale. E dua na lisi ni sere e vaqaqacotaka na veivakavuvuli oqo e okati tiko ena idusidusi oqo.

Nio vakavulica na sere eso vei ira na gone, sureti ira mera wasea na veika era sa kila tiko me baleta na italanoa kei na ivakavuvuli vakaivunau era vakavulici ena sere. Sureti ira na gone me wasea na nodra vakasama kei na nanuma me baleta na dina era kunei ena sere.

Na iVolanisere ni Gonelalai sa yavu ni ivurevure me baleta na sereivakatagi ena Lalai. Na sere ni lotu kei na sere era tiko ena iTokani era yaga talega. E rawa talega nio vakayagataka na sere mai na Hymns—For Home and Church. Na vakayagataki ni dua tale na mataqali sereivakatagi ena Lalai e dodonu me ratou vakadonuya na matabisopi (raica na iVoladusidusi Rararaba, 12.3.4).

Na gauna ni lagalagasere e kena inaki me vukei ira na gone mera vulica na dina ni kosipeli. Na veivakasama oqo sa rawa ni vakauqeti iko nio tuvana na sala eso me vakavulici kina na ivakavuvuli ni kosipeli era kunei ena serenilotu kei na nodra sere na Lalai.

Wilika na ivolanikalou veisemati. E vuqa na sere mai na iVolanisere ni Gonelalai kei na serenilotu, era cavuti kina na tiki ni ivolanikalou veisemati. Vukei ira na gone mera wilika eso na tikina oqo, ka veitalanoataka se semati vakacava na ivolanikalou kina sere. Sa rawa talega mo vola e vica na tiki ni ivolanikalou ena papa ni volavola ka sureta na gone me ra vakasotara vata na veitikina yadua kina dua na sere se qaqa ni dua na sere.

Vakalewena na vanua lala Vola e dua na qaqa ni sere ena papa ni volavola ka yali tiko kina e vica na vosa bibi. Qai kerei ira na gone mera lagata na sere, ka vakarorogo kina vosa mena vakatawana na vanua lala. Ni ra vakalewena tiko na vanua lala yadua, veitalanoataka na ivakavuvuli cava ni kosipeli o sa vulica mai na vosa me vakaleweni.

Vakadinadinataka. Vakadinadinataka vakalekaleka vei ira na gone na dina ni kosipeli era kune ena sere ni Lalai. Vukea mera kila vakamatata na gone ni lagasere e dua na sala era rawa ni wasea kina na nodra ivakadinadina ka vakila na Yalotabu.

Tucake vaka e dua na ivakadinadina Sureti ira na gone me ra veivukevuke ni tucake ka wasea na veika era sa vulica mai na sere era lagata se na veika era vakila me baleta na dina e vakavulici tiko ena sere. Tarogi ira ena veika era vakila nira lagata na sere, ka vukei ira mera raica rawa na veiyavalati ni Yalo Tabu.

Vakayagataka na iyaloyalo. Kerei ira na gone mera vukei iko ni raica se cakava nai yaloyalo era sala vata na vosa se malanivosa bibi eso ena sere. Sureti ira mera wasea na sala era semati kina kina sere nai yaloyalo kei na ka e vakavulica na sere. Me kena ivakaraitaki, kevaka o vakavulica tiko na sere “Ena Lesu Tale Beka Mai” (iVolanisere ni Gonelalai,, 46), o rawa ni biuta na iyaloyalo ena loma ni rumu era vakatakarakarataka na vosa bibi mai na sere (me vakataka na agilosi, uca cevata, kei na kalokalo). Kerea mera kumuna na iyaloyalo na gone ka tauri ira cake tu ena kena ituvatuva dodonu ni dou lagata vata tiko na sere.

Wasea e dua na lesoni ivakaraitaki. Sa rawa mo vakayagataka e dua na iyaya me vakauqeta na veivosakitaki ni dua na sere. Me kena ivakaraitaki, ni lagati na sere “Rogoca na Sere ni Manumanu,” (iVolanisere ni Gonelalai, 16), e rawa nio vakaraitaka vei ira na gone e dua na iyaloyalo ni veika me vaka na manumanu vuka, na uca, se senikau. Oqo ena rawa ni veimuataki kina dua na veivosaki me baleta na sala eda rawa ni kunea kina na ivakatakilakila ni loloma ni Tamada Vakalomalagi e vakavolivoliti keda tu.

Sureta me veiwaseitaki na veika eda sotava yadua. Vukei ira gone mera semata na ivakavuvuli era vakavulici ena sere kina veika era sa sotava kei na veivakavuvuli oya. Me ivakaraitaki, ni bera ni lagati na “Raica na Valetabu,” (iVolanisere ni Gonelalai, 99), o rawa ni kerei ira na gone mera lave liga kevaka era sa raica oti e dua na valetabu. Sureti ira, nira lagasere tiko, mera vakananuma na ka era vakila nira raica na valetabu.

Dau taro. E tu e vuqa sara na taro ona rawa ni taroga nio lagasere tiko. Me ivakaraitaki, o rawa ni tarogi ira na gone ena ka era sa vulica mai na qaqa ni sere yadua. Sa rawa talega nio kerea mera vakasamataka na taro eso ka saumi mai na sere. Oqo e rawa ni veimuataki kina veivosakitaki ni veidina eso e vakavulici tu ena sere.

Vakayagataka nai moimoi ni liga rawarawa. Sureti ira na gone mera vakasamataka eso nai moimoi ni liga rawarawa me vukei ira mera nanuma na vosa kei na itukutuku eso ni dua na sere. Me ivakaraitaki, nio lagata na “Vaqaqara ka Masu,” (iVolanisere ni Gonelalai, 66), sa rawa mo sureti ira na gone mera dusia na matadra nira seretaka tiko na vaqaqara ena ivolanikalou, dusia na uludra nira seretaka tiko na vakasama vakatitobu, ka roqo liga nira seretaka tiko na masu.