Ngaahi Fakakaukau ki hono Ako mo Akoʻi mei he Konifelenisi Lahí

• Fakafanongo ki he Laumālié. ʻOku fakaafeʻi ʻe hono ako e ngaahi pōpoaki ʻo e konifelenisí, ʻa e fakahaá. ʻI hoʻo akó, tokanga ki he ngaahi fakakaukau mo e ngaahi ongo mei he Laumālié neongo kapau ʻoku ʻikai haʻanau kaunga ki he pōpoaki ʻo e konifelenisí. ʻE lava ke hoko e ngaahi ongo ko iá ko e meʻa ʻoku finangalo ʻa e ʻOtuá ke ke ʻiloʻí.

• ʻEke ha ngaahi fehuʻi pea fekumi ki he ngaahi talí. Vakaiʻi e ʻuhinga loloto ange ʻi ha pōpoaki konifelenisi ʻaki hoʻo fai ha ngaahi fehuʻi ʻe tokoni ke ke fakalaulauloto ai ki he meʻa ʻoku akoʻi mai ʻe he pōpoakí. ʻE malava ke ke fai ha ngaahi fehuʻi hangē ko e “ʻOku fakamālohia fēfē nai ʻe he pōpoaki ko ʻení ʻa ʻeku tui kia Sīsū Kalaisí?” pe “ʻE tokoni fēfē nai ia kiate au ke u hoko ko ha ākonga lelei ange?”

• Lekooti ʻa e ngaahi ongo ʻokú ke maʻú. ʻOku lahi ha ngaahi founga ke lekooti ai hoʻo ngaahi ongó. Hangē ko ʻení, te ke lava ʻo tauhi ha tohinoa ʻo hoʻo ngaahi fakakaukaú pe hiki ha fakamatala ʻi he tafaʻaki ʻo e pōpoaki konifelenisí.

• Fakaʻaongaʻi ʻa e pōpoakí ki hoʻo moʻuí. Naʻa mo e pōpoaki fakalaumālie tahá ʻoku siʻisiʻi pē hono mahuʻingá kapau he ʻikai ke tau fakaʻaongaʻi ia ʻi heʻetau moʻuí pea tuku ke ne tataki ʻetau ngaahi fakakaukaú mo ʻetau ngaahi filí. Ko e hā ʻoku finangalo e Tamai Hēvaní ke u fakahoko koeʻuhi ko e pōpoaki ko ʻení?

• Kumi ha ngaahi maʻuʻanga fakamatala. Ke fakaloloto hoʻo mahino ki he pōpoaki ʻa ha tokotaha lea, kumi ʻa e ʻū potufolofolá mo e ngaahi akonaki fakaepalōfita ʻoku hā ʻi he pōpoakí pea mo e ngaahi maʻuʻanga fakamatalá.

• Fekumi ki he … ʻOku lahi ha ngaahi meʻa te ke lava ʻo fekumi ki ai ʻi hoʻo ako e ngaahi pōpoaki ʻo e konifelenisi lahí. ʻI hoʻo akó, fakakaukau ke ke fekumi ki he ngaahi pōpoaki fekauʻaki mo e ngaahi meʻá ni:

  • Sīsū Kalaisi. Fekumi ki ha ngaahi fakamoʻoni ki he Fakamoʻuí mo hono fakamatalaʻi ʻo ʻEne moʻuí, ko ʻEne ngaahi akonakí, ko ʻEne Fakaleleí, pea mo e mālohi ʻokú Ne lava ʻo foaki maʻanautolu ʻoku muimui kiate Iá.

  • Ngaahi foʻi lea mo e ngaahi kupuʻi lea fakalaumālie. Fakaʻilongaʻi pe hiki hoʻo ngaahi fakakaukau fekauʻaki mo e ngaahi foʻi lea mo e kupuʻi lea ʻokú ne ueʻi fakalaumālie koé, ongoʻi mahuʻinga kiate koe, pe fakaʻaiʻai koé.

  • Ngaahi tefitoʻi moʻoní mo e ngaahi tokāteliné. Fehuʻi kiate koe, “Ko e hā ha ngaahi tefitoʻi moʻoni pe ngaahi tokāteline naʻe akoʻi ʻi he pōpoaki ko ʻení?” Ko e taimi ʻe niʻihi, ʻoku fakamatalaʻi hangatonu mai ʻa e ngaahi tefitoʻi moʻoní mo e ngaahi tokāteliné, pea ko e taimi ʻe niʻihi ʻoku fakamatalaʻi kinautolu ʻaki ha foʻi talanoa pe sīpinga.

  • Ngaahi lisí. Taimi ʻe niʻihi, ʻe ʻomi ʻe he tokotaha leá ha lisi ʻo ha ngaahi fakakaukau, ngaahi founga ngāue, pe ngaahi moʻoniʻi meʻa. Te ke ala ongoʻi māfana foki ke faʻu haʻo lisi pē ʻaʻau, ʻo e ngaahi meʻa ʻokú ke akó.

  • Ngaahi fakaafé mo e ngaahi tāpuakí. Kumi ha ngaahi fakaafe ke ngāue mo e ngaahi tāpuaki ʻoku talaʻofa maí. Fakapapauʻi e founga te ke ngāueʻi ai e ngaahi fakaafe ko iá.

• Faʻu ha ngaahi fehokotakiʻanga. ʻI he Gospel Library, te ke lava ʻo faʻu ha ngaahi fehokotakiʻanga ʻi he vahaʻa ʻo e ngaahi pōpoaki konifelenisí, ngaahi potufolofolá, mo ha ngaahi meʻa kehe.

• Fokotuʻutuʻu fakatatau mo e tefitó. ʻI he Gospel Library, te ke lava ʻo fokotuʻutuʻu e ngaahi fakamatalá ʻo fakatatau mo honau ngaahi tefitó ʻaki hoʻo fakaʻaongaʻi e “Tags (Ngaahi Fakaʻilongá)” mo e “Notebooks(Ngaahi Fakamatalá).” ʻE ʻaonga eni ʻamui ange ʻi he taimi ʻokú ke teuteu ai ha lea pe ko ha lēsoni.

• Fokotuʻu ha taimi-tēpile. ʻI he Gospel Library, te ke lava ʻo faʻu ha palani ako ʻoku tokoni ke ke muimuiʻi hoʻo fakalakalaka ʻi hono ako e ngaahi pōpoakí, kimuʻa ʻi he konifelenisi hokó. Te ke lava foki ʻo fokotuʻu ha ngaahi fakamanatu ke tokoni atu ke ke lavaʻi hoʻo ngaahi taumuʻa akó.

• Fakaʻaliʻali ha kupuʻi lea. Fili ha kupuʻi lea ʻokú ke pehē ʻoku mahuʻingamālié, pea fokotuʻu ia ʻi ha feituʻu ʻe lava e kau mēmipa ʻo e fāmilí ʻo mamata ki ai. Te ke lava foki ʻo vahevahe fakaʻilekitulōnika ia. ʻE lava ke taufetongi e kau mēmipa hoʻo fāmilí ʻi hono fili ha kupuʻi lea ke fokotuʻu haké. Mahalo te ke fili ke ako maʻuloto fakafāmili ʻa e ngaahi kupuʻi leá.

• Faʻu ha meʻa. ʻE lava ke fiefia hoʻo fāmilí ʻi hono faʻu ha meʻa, hangē ko ha tā fakatātā pe ko ha fakaʻilonga tohi, ʻa ia naʻe ueʻi fakalaumālie ʻe ha meʻa ne akoʻi ʻi ha pōpoaki konifelenisi. ʻE lava ke vahevahe ʻe he tokotaha kotoa ʻa e meʻa naʻa nau faʻú.

• Toe vakaiʻi ʻa e ngaahi talanoá. Kumi ha ngaahi talanoa ʻi he ngaahi pōpoaki konifelenisí ʻe tokoni ke ako ai ʻe hoʻo fāmilí ʻa e ngaahi tefitoʻi moʻoni ʻo e ongoongoleleí. ʻE lava ke taufetongi e kau mēmipa hoʻo fāmilí ʻi hono fai e ngaahi talanoa ʻoku nau saiʻia taha aí, pe ko haʻo fakatātaaʻi kinautolu.

• Fakaʻaongaʻi e ngaahi akonakí. Hili hono ako fakataha ha pōpoaki konifelenisi, aleaʻi ha ngaahi founga kehekehe ʻoku fekauʻaki ai e ngaahi akonakí mo e ngaahi aʻusia ʻoku maʻu ʻe homou fāmilí. Hili iá, mou fili fakafāmili ʻa e meʻa te mou fai ke mou moʻui ʻaki ai ʻa e meʻa kuo mou akó.

• Vahevahe ʻa e ngaahi akonakí. ʻOku ʻi ai e ngaahi lelei ʻi hono lau fakafoʻituitui e ngaahi pōpoaki ʻo e konifelenisí pea mou fakataha mai leva ke vahevahe ha ngaahi fakakaukau mo ha ngaahi potufolofola fakalaumālie. ʻE lava ke hoko ʻeni ko ha founga lelei ke mou feakoʻaki ai.

• ʻEke ha ngaahi fehuʻi. Kapau ʻoku ʻi ai ha ngaahi fehuʻi ʻa e kau mēmipa hoʻo fāmilí fekauʻaki mo ha tefito ʻo e ongoongoleleí, tuku ha taimi ke kumi e ngaahi talí ʻi he ngaahi pōpoaki konifelenisi fekauʻaki mo e tefito ko iá (vakai ki he tab ʻo e “Ngaahi Tefitó” ʻi he polokalama Gospel Library).

• Ako e ngaahi pōpoaki ʻa e palōfitá. Fakakaukau ke mou ako fakafāmili ha ngaahi pōpoaki mei he Palesiteni ʻo e Siasí (vakai ki he tab ʻo e “Kau Leá” ʻi he polokalama Gospel Library).

Ki ha ngaahi fakakaukau makehe maʻá e ngaahi fāmili ʻoku ʻi ai hanau fānau īkí, vakai ki he “Ngaahi ʻEkitivitī maʻá e Fānaú (Activities for Children)” (ChurchofJesusChrist.org).

• Fakaafeʻi ʻa e teuteú. ʻOku ngalingali te ke fai ha fealēleaʻaki mahuʻingamālie fekauʻaki mo ha pōpoaki konifelenisi kapau kuo ʻosi ako kimuʻa ʻe he kāingalotú ʻa e pōpoakí. Kumi ha ngaahi founga ke fakahā ai kiate kinautolu ʻa e meʻa ʻe aleaʻí. Mahalo te ke ʻoange kiate kinautolu ha fehuʻi ʻe taha pe ua ke nau fakalaulauloto ki ai ke tokoni ke nau teuteu.

• Aleaʻi fakakulupu. ʻOku ʻai ʻe he ngaahi fealēleaʻaki ʻi he ngaahi kulupu iiki angé ke tokolahi ange ʻa e kakai ʻoku kau ki aí. Fakakaukau ke vahevahe ʻa e kau mēmipá ki ha fanga kiʻi kulupu iiki pea vahe ki he kulupu takitaha ke nau lau mo aleaʻi ha konga kehe ʻo e pōpoaki konifelenisí. Te ke lava leva ʻo kole ki he kulupu takitaha ke nau vahevahe ha moʻoni ne nau ako. Pe ko hoʻo faʻu ha ngaahi kulupu foʻou ʻaki ha niʻihi ne nau ako ha ngaahi konga kehekehe ʻo e pōpoakí pea tuku ke nau fevahevaheʻaki e meʻa ne nau akó.

• Tali ʻa e ngaahi fehuʻí. ʻE lava ke fakatupu ʻe hono ʻomi ha ngaahi fehuʻi pehení ha ngaahi fealēleaʻaki mahuʻingamālie fekauʻaki mo ha pōpoaki konifelenisi: Ko e hā ha ngaahi moʻoni ʻo e ongoongoleleí ʻoku tau maʻu ʻi he pōpoaki ko ʻení? Te tau fakaʻaongaʻi fēfē nai ʻa e ngaahi moʻoni ko ʻení? Ko e hā ha ngaahi fakaafe mo ha ngaahi tāpuaki kuo talaʻofa mai? Ko e hā ʻoku akoʻi mai ʻe he pōpoaki ko ʻení fekauʻaki mo e ngāue ʻoku finangalo ʻa e ʻOtuá ke tau fakahokó?

• Vahevahe ha ngaahi kupuʻi lea. ʻE lava ke ongo fakalaumālie ʻetau fefanongoʻaki fekauʻaki mo e founga naʻe ongo mo langaki hake ai kitautolu ʻe ha pōpoaki konifelenisi. Poupouʻi e kau mēmipá ke nau vahevahe ha ngaahi potufolofola mahuʻingamālie mei ha pōpoaki konifelenisi, pea kole ange ke nau fakakaukau ki he founga te nau lava ai ʻo vahevahe ʻa e ngaahi kupuʻi lea ko ʻení ke tāpuekina ha taha ʻoku nau ʻilo.

• Vahevahe ha lēsoni fakataumuʻa. Kapau ʻokú ke fekumi ki ha founga lelei ke aleaʻi ai ha pōpoaki konifelenisi, fakaafeʻi ha kāingalotu ʻe niʻihi kimuʻa ke nau ʻomi ha ngaahi meʻa mei ʻapi te nau lava ʻo fakaʻaongaʻi ke akoʻi ʻaki ha meʻa mei he pōpoakí. Kole ki he kau mēmipá ke nau fakamatalaʻi e founga ʻoku fekauʻaki ai e ngaahi meʻa ko iá mo e ngaahi konga pau ʻo e pōpoakí.

• Teuteuʻi ha lēsoni ke akoʻi ʻi ʻapi. Ko e founga eni ʻe taha ke tau poupouʻi ʻaki e ngaahi fāmilí ke nau ako mei he ngaahi pōpoaki konifelenisí, ʻi ʻapi: Kole ki he kau mēmipá ke nau ngāue tautau tokoua ke palani ha lēsoni efiafi fakafāmili ʻi ʻapi ʻo fakatefito ʻi he pōpoaki konifelenisí. ʻE founga fēfē haʻatau lava ʻo ʻai ke mahuʻinga ʻa e ngaahi akonakí ki hotau ngaahi fāmilí?

• Vahevahe e ngaahi aʻusiá. ʻE lava ke ueʻi ʻe he ngaahi fakamatala mo e ngaahi talanoa mei he ngaahi pōpoaki konifelenisí, ke vahevahe ʻe he kau mēmipá ʻa ʻenau ngaahi aʻusia tatau pe ngaahi sīpinga mei he folofolá. ʻE lava ke fakatātaaʻi pe fakamālohia ʻe he ngaahi sīpinga ko ʻení ʻa e tokāteline ʻoku akoʻi ʻi he pōpoaki ʻo e konifelenisí.

• Ako ki ha potufolofola. Ko e lahi taha ʻo e ngaahi pōpoaki konifelenisí ʻoku ʻi ai ha ngaahi potufolofola ʻoku fekauʻaki mo ia—ʻi he pōpoakí tonu pe ʻi he ngaahi maʻuʻanga fakamatalá. ʻE lava ke lau ʻe he kau mēmipá ha potufolofola ʻoku fakamoʻoniʻi ʻi he pōpoaki konifelenisí pea aleaʻi ʻa e founga ʻoku tokoniʻi ai kinautolu ʻe he ngaahi akonaki ʻi he pōpoakí ke mahino lelei ange ʻa e ngaahi potufolofolá.

• Kumi ha tali. ʻE maʻu ʻe he kau mēmipá ha ʻuhinga loloto ange ʻi he ngaahi pōpoaki konifelenisí kapau te ke fai ha ngaahi fehuʻi ʻokú ne ueʻi ʻa e fakalaulaulotó pe fakaʻaongaʻi e ngaahi tefitoʻi moʻoni ʻo e ongoongoleleí ʻoku akoʻi ʻiate kinautolú (ki ha tokoni, vakai ki he Ko e Faiako ʻi he Founga ʻa e Fakamoʻuí, 31–32). Te ke lava ʻo kole ki he kau mēmipá ke nau fili ha fehuʻi pea fakaʻaongaʻi ʻa e pōpoakí ke nau tohi ha tali. Fakaafeʻi kinautolu ke nau aleaʻi ʻenau ngaahi talí ʻi ha fanga kiʻi kulupu iiki.

• Tā ha lea pe hulu ha vitiō. Ko e taha ʻo e ngaahi founga lelei taha ke tokoniʻi ai ʻa e kau mēmipá ke nau ongoʻi ʻa e laumālie ʻo ha pōpoakí, ko hano tā ha kiʻi konga lea nounou pe hulu ha foʻi vitiō ʻo e pōpoakí.