Mau mana’o nō te ’apo ’e nō te hōro’a i te ha’api’ira’a mai roto mai i te ’āmuira’a rahi

• Faʼaroʼo i te Vārua. Nā te ha’api’ira’a i te ’āmuira’a e tītau i te heheura’a. ’A tai’o ai ’oe, ’a ha’apa’o maita’i i te mau mana’o e tae mai i te ferurira’a ’e i te ’ā’au nō ’ō mai i te Vārua, noa atu ē ’aita e tū’atira’a i te a’ora’a o te ’āmuira’a. Pēnei a’e ’o te reira mau te mau mea tā te Atua e hina’aro ia ’oe ’ia ’ite.

• Ui i te mau uira’a ’e ’imi i te mau pāhonora’a. Heheu i te aura’a hōhonu a’e o te hō’ē a’ora’a nō te ’āmuira’a maoti te uira’a i te mau uira’a ’o tē ha’aferuri ia ’oe e aha tā te a’ora’a e ha’api’i nei. E nehenehe e ui i te mau uira’a mai teie « Nāhea teie a’ora’a i te ha’apūai i tō’u fa’aro’o ia Iesu Mesia ? » ’aore rā, « Nāhea te reira ’ia tauturu iā’u ’ia riro mai ’ei pipi maita’i a’e ? »

• Pāpa’i i te mau mana’o e tae mai. E rave rahi rāve’a nō pāpa’i i te mau mana’o e tae mai. ’Ei hi’ora’a, e nehenehe e fa’aineine i te hō’ē buka tāmahana nō te mau mea tā ’oe i ’apo mai, ’aore rā e pāpa’i i te tahi mau fa’ata’ara’a i te hiti o te a’ora’a o te ’āmuira’a.

• Fa’a’ohipa i te a’ora’a i ni’a ia ’oe iho. Noa atu ē ’o te a’ora’a fa’auru roa a’e o te ’āmuira’a, e mea iti tō te reira faufa’a mai te mea ’aita tātou e fa’a’ohipa i te reira i ni’a i tō tātou orara’a, ma te arata’i te reira i tō tātou mau mana’o ’e tā tātou mau ferurira’a. E aha tā te Metua i te ao ra i hina’aro iā’u ’ia rave nā roto i teie a’ora’a ?

• ’Imi i te mau fa’ahorora’a. Nō te fa’ahōhonu i tō ’oe hāro’aro’ara’a i te a’ora’a a te hō’ē ta’ata a’o, ’a hi’o i te mau pāpa’ira’a mo’a ’e te mau ha’api’ira’a a te mau peropheta tei fa’ahitihia i roto i te mau a’ora’a ’e i roto i te mau fa’ata’ara’a.

• ’A ’imi… E rave rahi mea tā ’oe e nehenehe e ’imi ’a tai’o ai i te mau a’ora’a o te ’āmuira’a rahi. ’Ia tai’o ’oe, e nehenehe e hi’o i te mau mea i muri nei :

  • Iesu Mesia. ’A ’imi i te mau ’itera’a pāpū nō te Fa’aora ’e te mau fa’ata’ara’a nō tōna orara’a, tāna mau ha’api’ira’a, tāna tāra’ehara ’e te mana tāna e nehenehe e hōro’a i te feiā e pe’e iāna.

  • Te mau ta’o ’e te mau pereota fa’auru. ’A tāpa’o ’aore rā ’a pāpa’i i tō ’oe mau mana’o nō ni’a i te mau ta’o ’e te mau pereota ’o tē fa’auru ia ’oe, ’o te mea faufa’a rahi i tō ’oe mana’o ’e ’o tē fa’aitoito ia ’oe.

  • Te mau parau tumu ’e te mau ha’api’ira’a tumu. ’A ui ia ’oe iho : « E aha te mau parau tumu ’aore rā te mau ha’api’ira’a tumu tei ha’api’ihia i roto i teie a’ora’a ? » I te tahi taime e parau-’āfaro-hia mai te mau parau tumu ’e te mau ha’api’ira’a tumu, ’e ’i te tahi taime e fa’ahōho’ahia te reira nā roto i te hō’ē ’ā’amu ’aore rā te hō’ē hi’ora’a.

  • Te mau tāpura. I te tahi taime e hōro’a mai te ta’ata a’o i te hō’ē tāpura nō te mau mana’o, te mau fa’a’ohipara’a ’e te mau parau mau. Pēnei a’e e fa’auruhia ’oe ’ia ha’amau i tā ’oe iho tāpura nō te mau ha’api’ira’a tā ’oe i ’apo mai.

  • Te mau tītaura’a manihini ’e te mau ha’amaita’ira’a. ’A hi’o mai i te mau anira’a ’ia ’ohipa ’e te mau ha’amaita’ira’a tei parau-fafau-hia mai. ’A hi’o e nāhea ’oe ’ia ’ohipa i ni’a i te reira mau tītaura’a manihini.

• Hāmani te mau hono. I roto i te Vaira’a buka ’evanelia, e nehenehe ’oe e hāmani i te mau hono i rotopū i te mau a’ora’a o te ’āmuira’a, te mau pāpa’ira’a mo’a ’e te tahi atu mau mea e vai ra.

• Fa’anaho nā ni’a i te tumu parau. I roto i te Vaira’a buka ’evanelia, e nehenehe ’oe e fa’anaho i te mea e vai ra nā ni’a i te tumu parau ma te fa’a’ohipa i te mau « Fa’ahoro parau » ’e te « Buka fa’ata’ara’a. » Pēnei e tauturu te reira ’āraua’e nō te fa’aineine i te hō’ē a’ora’a ’aore rā te hō’ē ha’api’ira’a.

• Ha’amau i te hō’ē tārena. I roto i te Vaira’a buka ’evanelia, e nehenehe ’oe e ha’amau i te hō’ē tāpura tai’ora’a ’o tē tauturu ia ’oe ’ia hi’opo’a i tō ’oe nu’ura’a i mua hou te ’āmuira’a nō muri iho. E nehenehe ato’a ’oe e ha’amau i te fa’aha’amana’ora’a nō te tauturu ia ’oe ’ia fa’aoti i tā ’oe mau ’ōpuara’a tai’ora’a.

• Pia i te hō’ē fa’ahitira’a parau. ’A mā’iti i te hō’ē fa’ahitira’a parau rahi nō ’oe, ’a pia atu ai i te hō’ē vāhi e ’ite pinepine atu te mau melo o te ’utuāfare. E nehenehe ato’a e fa’a’ite tāireuira atu i te reira. E nehenehe te mau melo o tō ’oe ’utuāfare e fa’a’ohu nō te mā’iti i te hō’ē parau nō te pia. E nehenehe te ’utuāfare e tāmau ’ā’au i te mau fa’ahitira’a parau.

• Hāmani i te hō’ē mea. E au paha te mau melo o tō ’oe ’utuāfare ’ia hāmani i te hō’ē mea, mai te hō’ē hōho’a pāpa’i ’aore rā te hō’ē tāpa’o tai’ora’a, tei fa’auruhia e te hō’ē ha’api’ira’a i roto i te hō’ē a’ora’a o te ’āmuira’a. E nehenehe te ta’ata e fa’a’ite mai i tāna i hāmani.

• Hi’o i te mau ’ā’amu. ’A ’imi i te mau ’ā’amu i roto i te mau a’ora’a o te ’āmuira’a ’o tē tauturu i tō ’oe ’utuāfare ’ia ha’api’i i te mau parau tumu o te ’evanelia. E nehenehe te mau melo o tō ’oe ’utuāfare e fa’a’ohu nō te fa’ati’a mai i tā rātou mau ’ā’amu au roa a’e, ’aore rā e nehenehe tā rātou e ha’uti mai i te reira.

• Fa’a’ohipa i te mau ha’api’ira’a. I muri a’e i te tai’o-’āmui-ra’a i te hō’ē a’ora’a nō te ’āmuira’a, ’a ’āparau i te mau rāve’a ta’a ’ē e tū’ati ai te mau ha’api’ira’a i te mau ’ohipa e tupu ra nō te ’utuāfare. I muri iho, e fa’aoti te ’utuāfare e aha tā ’outou e rave nō te ora i te ha’api’ira’a tā ’outou i ’apo mai.

• Fa’a’ite i te mau ha’api’ira’a. Tē vai ra te ’āpī i roto i te tai’ora’a i te mau a’ora’a o te ’āmuira’a i tōna pae ’a haere ’āmui ai nō te fa’a’ite i te mea i ’apohia mai ’e i te tahi ’o te mau tuha’a fa’auru mau. E nehenehe te reira e riro ’ei rāve’a maita’i roa nō te ’apo i te ha’api’ira’a mai te tahi ’e te tahi.

• Ui i te mau uira’a. Mai te mea e uira’a tā te mau melo o tō ’oe ’utuāfare nō ni’a i te hō’ē tumu parau o te ’evanelia, ’a rave i te tahi taime nō te ’imi i te mau pāhonora’a i roto i te mau a’ora’a o te ’āmuira’a nō ni’a i terā tumu parau (hi’o i te ’api nō « Te mau tumu parau » i roto i te fa’aaura’a rorouira Vaira’a buka ’evanelia).

• Tai’o māite i te mau a’ora’a a te peropheta. E nehenehe ’outou te ’utuāfare e tai’o māite i te mau a’ora’a a te Peresideni o te ’Ēkālesia (hi’o i te ’api nō te mau « Ta’ata a’o » i roto i te fa’aaura’a rorouira Vaira’a buka ’evanelia).

Nō te mau mana’o ta’a ’ē nō te mau ’utuāfare e tamari’i ’āpī i roto, ’a hi’o « Activities for Children [’Ohipa fa’a’ana’anatae nā te tamari’i] » (ChurchofJesusChrist.org).

• Ani ’ia fa’aineine ia rātou. E mea pāpū a’e te ’āparaura’a manuia nō ni’a i te a’ora’a o te ’āmuira’a mai te mea ’ua tai’o te mau melo i te a’ora’a hou ’a haere mai ai. ’A ’imi i te rāve’a nō te fa’aara ia rātou i te mea e ’āparauhia. E nehenehe ato’a e hōro’a ia rātou i te hō’ē uira’a, ’aore rā e piti, nō te feruri, nō te tauturu ia rātou ’ia fa’aineine.

• Fa’atupu i te ’āparaura’a i roto i te pupu. E mea na’ina’i te pupu ’āparaura’a, e mea rahi atu ā te ta’ata e paraparau mai. E nehenehe e vāhi i te mau melo ’ei pupu na’ina’i ’e e hōro’a i te pupu tāta’itahi ’ia tai’o ’e ’ia ’āparau i te hō’ē tuha’a ta’a ’ē o te a’ora’a o te ’āmuira’a. I muri iho, e nehenehe e ani i te pupu tāta’itahi ’ia fa’a’ite mai i te hō’ē parau mau tā rātou i ’apo mai. ’Aore rā e nehenehe e hāmani i te mau pupu ’āpī mai roto mai i te mau pupu tei tai’o i terā tuha’a ’e terā tuha’a, ’ia fa’a’ite rātou te tahi i te tahi i te mea tā rātou i ’apo mai.

• Pāhono i te mau uira’a. E nehenehe te tu’ura’a i te mau uira’a mai teie te huru e fa’atupu i te mau ’āparaura’a faufa’a rahi nō ni’a i te hō’ē a’ora’a o te ’āmuira’a : E aha te mau parau mau o te ’evanelia tā tātou e ’ite nei i roto i teie a’ora’a ? Nāhea tātou i te fa’a’ohipa i teie mau parau mau ? E aha te mau tītaura’a manihini ’e te mau ha’amaita’ira’a i parau-fafau-hia mai ? E aha tā teie a’ora’a e ha’api’i nei ia tātou nō ni’a i te ’ohipa tā te Atua e hina’aro ia tātou ’ia rave ?

• Fa’a’ite i te mau fa’ahitira’a parau. E nehenehe te taime fa’auru mau e tupu ’ia fa’aro’o ana’e tātou i te tahi ’e te tahi ’ia parau mai nō ni’a i te huru te hō’ē a’ora’a o te ’āmuira’a i ha’aputapū ia tātou ’e i fa’aitoito ho’i. ’A fa’aitoito i te mau melo ’ia fa’a’ite mai i te mau tuha’a faufa’a rahi nō rātou i roto i te hō’ē a’ora’a o te ’āmuira’a, ’e ’a ani ia rātou e nāhea rātou e fa’a’ite ai i te reira mau fa’ahitira’a parau nō te ha’amaita’i i te ta’ata tā rātou i mātau.

• Hōro’a i te hō’ē ha’api’ira’a tao’a. Mai te mea tē ’imi ra ’oe i te hō’ē rāve’a ’āpī nō te ’āparau i te hō’ē a’ora’a o te ’āmuira’a, ’a ani a’ena i te tahi mau melo ’ia ’āfa’i mai i te tahi mau tao’a i te fare, ’o tā rātou e nehenehe e fa’a’ohipa nō te ha’api’i i te hō’ē mea i roto i te a’ora’a. ’A ani i te mau melo ’ia fa’ata’a mai e aha te tū’atira’a o teie mau tao’a ’e te mau tuha’a ta’a ’ē o te a’ora’a.

• Fa’aineine i te hō’ē ha’api’ira’a nō te ha’api’i i te fare. Teie te hō’ē rāve’a nō te fa’aitoito i te mau ’utuāfare ’ia ’apo mai i te ha’api’ira’a mai roto mai i te mau a’ora’a o te ’āmuira’a, i te fare : Ani i te mau melo ’ia ’ohipa ’āpitipiti nō te fa’aineine i te hō’ē ha’api’ira’a pō ’utuāfare tei niuhia i ni’a i te hō’ē a’ora’a o te ’āmuira’a. Nāhea tātou i te fa’ariro i te a’ora’a ’ei mea fa’ahiahia nō tō tātou ’utuāfare ?

• Fa’a’ite i te ’ohipa i tupu nō ’oe. E nehenehe te mau fa’ahitira’a parau ’e te mau ’ā’amu i roto i te mau a’ora’a o te ’āmuira’a e fa’auru i te mau melo ’ia fa’a’ite mai i te hō’ē ’ohipa mai te reira tei tupu nō rātou, ’aore rā i te tahi hi’ora’a nō roto mai i te mau pāpa’ira’a mo’a. E nehenehe teie mau hi’ora’a e fa’ahōho’a ’aore rā e ha’apūai i te ha’api’ira’a tumu i ha’api’ihia i roto i te a’ora’a o te ’āmuira’a.

• ’Apo i te ha’api’ira’a nō ni’a i te hō’ē ’īrava. I roto i te rahira’a o te mau a’ora’a o te ’āmuira’a, e mau ’īrava pāpa’ira’a mo’a e tū’ati i te reira—i roto i te a’ora’a iho ’aore rā i roto i te mau fa’ata’ara’a. E nehenehe te mau melo e tai’o i te hō’ē tuha’a pāpa’ira’a mo’a tei fa’ahitihia i roto i te a’ora’a o te ’āmuira’a ’a ’āparau ai e nāhea te mau ha’api’ira’a i roto i te a’ora’a i te tauturu ia rātou ’ia māramarama maita’i a’e i terā mau ’īrava pāpa’ira’a mo’a.

• ’Imi i te pāhonora’a. E ’ite mai te mau melo i te aura’a hōhonu a’e o te mau a’ora’a o te ’āmuira’a mai te mea e ui ’oe i te mau uira’a ’o tē tūra’i i te feruri-māite-ra’a ’aore rā i te fa’a’ohipara’a i te mau parau tumu o te ’evanelia tei ha’api’ihia i roto i te reira (nō te tauturu, hi’o Ha’api’ira’a mai tā te Fa’aora, 31–32). E nehenehe ’oe e ani i te mau melo ’ia mā’iti i te hō’ē uira’a ’e ’ia fa’a’ohipa i te a’ora’a nō te pāpa’i i te hō’ē pāhonora’a. E ani ia rātou ’ia ’āparau i tā rātou mau pāhonora’a ’ei pupu na’ina’i.

• Ha’uti i te rāve’a fa’aro’o ’aore rā video. Hō’ē o te mau rāve’a maita’i roa a’e nō te tauturu i te mau melo ’ia putapū i te vārua o te hō’ē a’ora’a, ’o te ha’utira’a ïa i te hō’ē tuha’a poto nō te rāve’a fa’aro’o ’aore rā te video o te a’ora’a.