Manatu mo le Aoaoina Mai ma le Aoao Atu mai le Konafesi Aoao

• Faalogo i le Agaga. O le suesueina o savali o le konafesi e valaaulia ai faaaliga. A o e suesue, ia gauai atu i manatu ma lagona mai le Agaga e tusa lava pe leai se mea e faia i le savali o le konafesi. O na lagona uunai atonu o mea tonu lava na e finagalo le Atua ia e iloa.

• Fai fesili ma vaavaai mo tali. Ia iloa se uiga loloto atu i se savali o le konafesi e ala i le faia o fesili e fesoasoani ia te oe e mafaufau loloto ai i mea o loo aoao mai e le savali. E mafai ona e faia ni fesili e pei o le “E faapefea e lenei savali ona faamalosia lo’u faatuatua ia Iesu Keriso?” po o le “E faapefea ona fesoasoani ia te au e avea ai ma se soo sili atu ona lelei?”

• Tusi faamaumau au uunaiga. E tele auala e tusifaamaumau ai ou uunaiga. Mo se faataitaiga, e mafai ona e tausia se api talaaga o ou malamalamaaga pe tusi ni faamatalaga i autafa o le savali o le konafesi.

• Faaaoga le savali ia te oe lava. E oo lava i le savali e sili ona musuia o le konafesi e faatapulaa lona taua pe afai tatou te le faaaogaina i o tatou olaga ma tuu atu ia taialaina ai o tatou mafaufauga ma faaiuga. O le a se mea o finagalo le Tama Faalelagi ia te au e fai ona o lenei savali?

• Su’e mau fefaasinoa’i. Ina ia faalolotoina lou malamalama i le savali a se failauga, su’e mau ma aoaoga faaperofeta o loo faasino i ai i le savali atoa ma faamatalaga faaiu.

• Su’e le… E tele mea e mafai ona e vaavaai i ai a o e suesueina savali o le konafesi aoao. A o e suesue, fuafua e vaavaai mo mea nei:

  • Iesu Keriso. Saili molimau i le Faaola ma faamatalaga o Lona soifuaga, Ana aoaoga, Lana Togiola, ma le mana e mafai ona Ia tuuina mai ia i latou o e mulimuli ia te Ia.

  • Upu musuia ma fasifuaitau Faailoga pe tusi i lalo ou manatu e uiga i upu ma fasifuaitau e musuia ai oe, lagona ai le taua ia te oe, pe faaosofia ai oe.

  • Mataupu faavae ma aoaoga faavae autu. Fesili ifo ia te oe lava, “O a mataupu faavae po o aoaoga faavae autu na aoaoina i lenei savali? O nisi taimi e ta’ua sao ai mataupu faavae ma aoaoga faavae autu , ma o nisi taimi e faapupula i se tala po o se faataitaiga.

  • Lisi. O nisi taimi o le a tuuina mai ai e se failauga se lisi o manatu, faaaogaaga, po o upumoni. Atonu foi e te lagona le uunaia e fatu sau lava lisi o mea o loo e aoaoina mai.

  • Valaaulia ma faamanuiaga. Saili ni valaaulia e faatino ma faamanuiaga ua folafola mai. Fuafua pe faapefea ona e faatinoina na valaaulia.

• Fausia ni sootaga. I le Potutusi o le Talalelei, e mafai ona e fatuina ai ni sootaga i le va o savali o le konafesi, tusitusiga paia, ma isi anotusi.

• Faavasega e ala i autu I le Potutusi o le Talalelei, e mafai ona e faavasegaina anotusi e ala i autu i le faaaogaina o “Faailoga” ma “Api o Tusigamanatu”. E mafai ona aoga lenei mea i se taimi mulimuli ane pe a e saunia se lauga po o se lesona.

• Faatulaga se faasologa I le Potutusi o le Talalelei, e mafai ona e fatuina se fuafuaga suesue e fesoasoani ia te oe e siaki ai lou alualu i luma i le suesueina o savali a o lei oo i le isi konafesi. E mafai foi ona e faatulaga ni faamanatu e fesoasoani ia te oe ia ausia ai au sini o suesuega.

• Faaali atu se upusii. Filifili se upusii e te iloa e anoa, ma tuu i luga i se mea o le a vaai i ai tagata o le aiga. E mafai foi ona e faasoa atu faaeletonika. E mafai e tagata o lou aiga ona feauauai i le filifilia o se fuaitau e tuu i luga. Atonu e te filifili e taulotoina e le aiga ni upusii.

• Fatu se mea. E ono fiafia tagata o lou aiga e fai se mea, e pei o se atatusi po o se faailogatusi, e musuia i se mea o loo aoao atu i se savali o le konafesi. E mafai e tagata uma ona fefaasoaa’i mea na latou faia.

• Toe iloilo tala. Sue tala i savali o le konafesi o le a fesoasoani i lou aiga e aoao ai mataupu faavae o le talalelei. E mafai ona feauauai tagata o lou aiga e faamatala tala e sili ona latou fiafia i ai, pe mafai foi ona outou faatinoina.

• Faaaoga aoaoga. A uma ona suesue faatasi se savali o le konafesi, talanoaina auala eseese e fesootai ai aoaoga i aafiaga o loo maua e lou aiga. Ona filifili lea o se aiga po o le a se mea o le a outou faia e ola ai i mea ua outou aoaoina.

• Faasoa atu aoaoga. E i ai aoga o le faitauina taitoatasi o savali o le konafesi ona o mai faatasi lea e faasoa mai ni malamalamaaga ma ni fuaitau musuia. E mafai ona avea lenei mea ma se auala sili e aoao ai mai le tasi i le isi.

• Fai fesili. Afai e i ai ni fesili a tagata o lou aiga e uiga i se autu o le talalelei, faaalu se taimi e saili ai mo tali i savali o le konafesi e uiga i lena autu (tagai i le faailoga “Autu” i le polokalama o le Potutusi o le Talalelei).

• Suesue i savali a le perofeta. Mafaufau faatasi o se aiga e suesue ni savali a le Peresitene o le Ekalesia (tagai i le faailoga “Failauga” i le polokalama Potutusi o le Talalelei).

Mo ni manatu patino mo aiga e i ai fanau laiti, tagai i le “Gaoioiga mo Tamaiti” (ChurchofJesusChrist.org).

• Valaaulia sauniuniga. E ono sili atu ona e faia se talanoaga anoa e uiga i se savali o le konafesi pe afai na muai suesueina e tagata o le ekalesia le savali. Saili ni auala e faailoa atu ai ia i latou mea o le a talanoaina. E mafai foi ona e tuuina atu ia i latou se fesili se tasi pe lua e mafaufau loloto i ai e fesoasoani ia i latou e saunia ai.

• Talanoa i vaega. O talanoaga a vaega toalaiti e faaaofia ai le toatele o tagata. Fuafua e vaevae tagata o le vasega i ni vaega toalaiti, ma tofi vaega taitasi e talanoa i se isi vaega o le savali o le konafesi. Ona mafai lea ona e fai atu i vaega taitasi e faasoa mai se upumoni sa latou aoaoina. Pe e mafai foi ona e faatulagaina ni vaega mai tagata o e na suesue i isi vaega ma tuu atu ia i latou e fefaasoaai i le tasi ma le isi mea sa latou aoaoina.

• Tali fesili. O le tuuina atu o fesili faapenei e mafai ona faatupuina ai ni talanoaga anoa e uiga i se savali o le konafesi: O a upumoni o le talalelei tatou te maua i lenei savali? E mafai faapefea ona tatou faaaogaina nei upumoni? O a valaaulia ma faamanuiaga folafolaina na tuuina atu? O le a se mea o aoao mai e lenei savali ia i tatou e uiga i le galuega o loo finagalo le Atua tatou te faia?

• Faasoa atu upusii. E mafai ona musuia le faalogo atu o le tasi i le isi o talanoa e uiga i le auala na ootia ai ma siitia ai i tatou e se savali o le konafesi. Fautua tagata o le ekalesia e faasoa mai ni fuaitau anoa mai se savali o le konafesi, ma fai atu ia i latou e mafaufau pe faapefea ona latou faasoa atu nei upusii e faamanuia ai se tasi latou te iloa.

• Faasoa se lesona faitino. Afai o loo e sailia se auala fatufatuai e talanoaina ai se savali o le konafesi, vave valaaulia ni nai tagata o le ekalesia e aumai ni mea faitino mai le aiga e mafai ona latou faaaogaina e aoao atu ai se mea mai le savali. Fai atu i tagata o le ekalesia e faamatala pe faapefea ona fesootai na mea faitino i vaega patino o le savali.

• Saunia se lesona e aoao atu i le fale. O se tasi lenei o auala e uunaia ai aiga e aoao mai savali o le konafesi i le fale: Fai atu i tagata o le ekalesia e galulue taitoalua e fuafua se lesona o le afiafi faaleaiga e faavae i se savali o le konafesi. E mafai faapefea ona tatou faatatauina lenei savali i o tatou aiga?

• Fefaasoaai aafiaga. O faamatalaga ma tala mai savali o le konafesi e mafai ona uunaia ai tagata o le ekalesia e faasoa mai o latou lava aafiaga po o faataitaiga e faatatau i ai mai tusitusiga paia. O nei faataitaiga e mafai ona faapupula pe faamalosia ai le aoaoga faavae autu o loo aoaoina i le savali o le konafesi.

• Aoao e uiga i se mau. O le tele o savali o le konafesi o loo i ai fuaitau o mau fesootai—i le savali lava ia po o faamatalaga faaiu. E mafai e tagata o le ekalesia ona faitau se mau o loo faasino i ai i le savali o le konafesi ma talanoaina pe faapefea e aoaoga o loo i le savali ona fesoasoani ia i latou ia malamalama lelei ai i fuaitau o mau.

• Sue se tali. O le a maua e tagata o le ekalesia se uiga loloto atu i savali o le konafesi pe afai e te faia ni fesili e uunaia ai le mafaufau loloto po o le faaaogaina o mataupu faavae o le talalelei o loo aoaoina ai i latou (mo se fesoasoani, tagai i le Aoao Atu i le Ala a le Faaola, 31–32). E mafai ona e fai atu i tagata o le ekalesia e filifili se fesili ma faaaoga le savali e tusi ai se tali. Valaaulia i latou e talanoaina a latou tali i ni vaega toalaiti.

• Ta le leo po o le vitio. O se tasi o auala sili e fesoasoani ai i tagata o le ekalesia ia lagonaina le agaga o se savali o le taina lea o se ata puupuu faalogologo po o se vitio o le savali.