Ngaahi Fakakaukau ki he Teuteu ke Kau Atu ki he Konifelenisi Lahí

ʻOku totonu ke tau fakaofi atu ki he konifelenisi lahí mo fakakaukau ki ha ngaahi fehuʻi. Naʻe akoʻi mai ʻe ʻEletā Tieta F. ʻUkitofa: “ʻE maʻu fakahangatonu ʻa e ngaahi tali ki haʻo ngaahi lotu pau mei ha lea pe mei ha kupuʻi lea pau. Taimi ʻe niʻihi ʻe maʻu ʻa e talí ʻi ha foʻi lea, kupuʻi lea, pe foʻi hiva ʻoku hangehangē ka ʻikai ke nau fekauʻakí. ʻE hanga ʻe ha loto ʻoku fonu ʻi he fakafetaʻi ko e ngaahi tāpuaki ʻo e moʻuí mo ha holi fakamātoato ke fanongo pea muimui ʻi he ngaahi faleʻí, ʻo teuteuʻi ha founga ke maʻu ai ʻa e fakahā fakatāutahá” (“Konifelenisi Lahí—ʻOku ʻIkai Ko Ha Tāpuaki Angamaheni Pē,” Liahona, Sepitema 2011, 5).

0:57

Ko ia ʻi hoʻo teuteu ki he konifelenisi lahí, fakakaukau ki ha ngaahi fehuʻi kuó ne fakamafasiaʻi ho ʻatamaí, hiki kinautolu, pea fakafanongo leva ki he ngaahi tali ʻe ʻoatu ʻe he ʻEikí ʻo fakafou ʻi Heʻene kau tamaioʻeikí lolotonga e konifelenisi lahí.

Makehe mei hono tali hoʻo ngaahi fehuʻí, mahalo ʻe maʻu ʻe he ʻEikí ha ngaahi meʻa kehe ʻokú Ne finangalo ke fakahā atu kiate koe. Mateuteu ki ha faʻahinga pōpoaki pē ʻokú Ne maʻu maʻau. Kapau te ke lotu kiate Ia mo kole tokoni fakamātoato ʻi hoʻo fanongo mo ʻiloʻi Hono leʻó, te Ne tokoniʻi koe ke ke maʻu ʻa e ngaahi pōpoaki ko iá naʻe fakataumuʻa kiate koe lolotonga ʻa e konifelenisi lahí. Ke fakatupulaki ʻa e vā fetuʻutaki mo e taukei ko ʻení, mamataʻi e founga ʻoku “fanongo [ai] kiate Ia” ʻa e ʻAposetolo takitaha ʻa e ʻEikí.

Ko e ʻuhinga ʻe taha ʻoku tau saiʻia lahi ai ʻi he konifelenisi lahí ko ʻene ʻomi kiate kitautolu ha faingamālie ke fanongo ki hono fai ʻe he kau ʻAposetolo ʻa e ʻEiki ko Sīsū Kalaisí ʻa e meʻa naʻe ui kinautolu ke nau faí—ko e fakahoko ʻenau fakamoʻoni ko ha kau fakamoʻoni makehe kiate Ia. ʻI hoʻo fanongo ki heʻenau ngaahi pōpoakí, fakafanongo tonu ki he meʻa ʻoku nau akoʻi fekauʻaki mo Sīsū Kalaisí. Lau ʻeni ko ha faingamālie ke fakaloloto ai hoʻo tui ki he Fakamoʻuí mo ʻEne ongoongoleleí.

Kapau ʻokú ke fie ako lahi ange fekauʻaki mo e kau fakamoʻoni makehe ko ʻeni ʻo Sīsū Kalaisí, ʻoku ʻi ai ha ngaahi maʻuʻanga tokoni lahi ʻi he uepisaiti ʻa e Siasí. Ko e ngaahi maʻuʻanga tokoni ko ʻení ko ha founga lelei ia ke ako ai fekauʻaki mo e kau taki ʻo e Siasí mo fakaloloto hoʻo fakamoʻoni ki honau ngaahi uiuiʻi makehé.

Hangē pē ko e ʻi ai ʻEne ngaahi pōpoaki maʻaú, ʻoku finangalo ʻa e ʻOtuá ke folofola ki Heʻene fānaú kotoa. Fakakaukau ki ha taha ʻokú ke ʻiloʻi ʻe ʻaonga ki ai ʻene fanongo ki he leʻo ʻo e ʻEikí lolotonga e konifelenisi lahí. ʻOku lahi ha ngaahi founga ke fakaafeʻi ai e niʻihi kehé ke nau aʻusia ʻa e konifelenisi lahí:

• Fakaafeʻi e ngaahi kaungāmeʻá mo e fāmilí ke mou kaungā mamataʻi e konifelenisí.

• Vahevahe ha ngaahi fakamatala ueʻi fakalaumālie, ngaahi meʻa mahuʻinga, mo ha ngaahi kupuʻi lea mei he konifelenisí ʻi he mītia fakasōsialé. ʻOku ʻoatu ʻe he Siasí ha ngaahi maʻuʻanga tokoni ʻi he ʻinitanetí ʻoku lava ke vahevahe.

• Tokoniʻi e fānau īkí mo e toʻu tupú ʻi he ngaahi ʻekitivitī fakamānako mo e ngaahi maʻuʻanga tokoni ʻoku maʻu ʻi he ʻinitanetí.

ʻE lava ke hoko ʻa e konifelenisi lahí ko ha kātoanga ʻo e ngaahi fakakaukau fakalaumālié mo e fakahaá. Ke tokoni ke ke manatuʻi ʻa e ngaahi aʻusia fakalaumālie naʻá ke maʻú, te ke lava ʻo hiki ʻi hoʻo tohinoá fekauʻaki mo e ngaahi fehuʻi kuó ke talí, ko e hā ha ngaahi lea naʻá ne ueʻi fakalaumālie koe, pea mo e ngaahi founga ʻokú ke fie fakalakalaka aí. Te ke lava foki ʻo vahevahe hoʻo ngaahi fakakaukaú mo kinautolu ʻokú ke ʻofa aí. Fakakaukau ki he founga kuo ʻomi ai koe ʻe he konifelenisí ke ke ofi ange kia Kalaisí pea mo e meʻa te ke fai ke hokohoko atu ai hoʻo muimui kiate Iá mo e ngaahi lea ʻa ʻEne kau palōfitá. Hangē ko e akonaki ʻa Palesiteni Henelī B. ʻAealingi ko e Tokoni Ua ʻi he Kau Palesitenisī ʻUluakí: “Ka ʻokú ke falala ki he ʻOtuá ke fakafanongo ki Heʻene pōpoakí ʻi he malanga, hiva, mo e lotu kotoa ʻi he konifelenisí ni, te ke maʻu ia. Pea ka ke toki ʻalu ʻo fai Hono finangaló, ʻe tupulaki ho mālohi ke falala kiate Iá, pea ʻe hokosia e taimi te ke fonu he fakafetaʻi ʻi hoʻo ʻilo kuó Ne falala kiate koe” (“Falala ki he ʻOtuá, Pea ʻAlu Leva ʻo Fakahoko,” Liahona, Nōvema 2010, 73).

Ko ha ngaahi maʻuʻanga tokoni kehe ʻeni ke fakalahi hoʻo aʻusia ʻi he konifelenisi lahí:

• Ako mei he Ngaahi Pōpoaki ʻo e Konifelenisi Lahí

• “5 Steps for Making Conference Stay with You”

• Hiva fakalaumālie mei he konifelenisi lahí mo ha ngaahi meʻa lahi ange

• Ngaahi ʻekitivitī mo e ngaahi talanoa lahi ange ʻo e konifelenisi lahí maʻá e fānaú

• “What is General Conference?”

Vakaiʻi ʻa e “Ngaahi Founga ke Mamataʻi pe Fanongo Fakahangatonu ai ki he Konifelenisi Lahí” ke ʻiloʻi e founga ke mamata pe fanongo aí.