Manatu e Tapena ai e Auai i le Konafesi Aoao

E tatau ona tatou mafaufau i le konafesi aoao ma ni fesili i le mafaufau Na aoao mai Elder Dieter F. Uchtdorf: “O tali i au tatalo patino e ono oo sa’o mai lava i se saunoaga faapitoa po o se fasifuaitau patino. O nisi taimi e ono oo mai ai ni tali i ni upu e foliga e le fesootai, se fasi fuaitau, po o se pese. O se loto e faatumulia i le agaga faafetai mo faamanuiaga o le olaga ma se naunautaiga faamaoni e faalogo ma mulimuli i upu o fautuaga o le a saunia ai le ala mo faaaliga patino.(“General Conference—No Ordinary Blessing,” Liahona, Setema 2011, 5).

0:57

A o e tapenapena mo le konafesi aoao, mafaufau i fesili sa mamafa i lou mafaufau, tusi i lalo, ona faalogologo lea mo tali o le a auina atu e le Alii ia te oe e ala i Ana auauna i le taimi o le konafesi aoao.

E le gata i le taliina o au fesili, atonu e i ai foi isi mea e finagalo le Alii e ta’u atu ia te oe. Ia tatala atu i soo se savali atonu o ia te Ia mo oe. Afai e te tatalo ia te Ia ma ole atu ma le faamaoni mo se fesoasoani i le faalogo ma le iloaina o Lona siufofoga, o le a Ia fesoasoani ia te oe ia maua na savali e faatatau mo oe i le taimi o le konafesi aoao. Ina ia atiina ae lenei sootaga ma le tomai, matau le auala e “faalogo ai Aposetolo taitoatasi a le Alii ia te Ia.”

O se tasi o mafuaaga tatou te fiafia tele ai i konafesi aoao ona e aumaia ai ia i tatou se avanoa e faalogologo ai i Aposetolo a le Alii o Iesu Keriso o faia le mea na valaauina i latou e fai—tuuina atu a latou molimau o ni molimau faapitoa ia te Ia. A o e faalogologo i a latou savali, faalogologo patino mo mea o loo latou aoao mai e uiga ia Iesu Keriso. Vaai i lenei mea o se avanoa e faaloloto ai lou faatuatua i le Faaola ma Lana talalelei.

Afai e te fia aoao atili e uiga i nei molimau faapitoa a Iesu Keriso, o loo i ai punaoa maoae i le uepisaite a le Ekalesia. O nei punaoa o se auala sili lea e aoao ai e uiga i taitai o le Ekalesia ma faalolotoina ai lau molimau i o latou valaauga faapitoa.

E pei lava ona i ai Ana savali mo oe, e finagalo foi le Atua e fetalai atu i Ana fanau uma. Mafaufau i se tasi e te iloa o le a faamanuiaina mai le faalogo i le siufofoga o le Alii i le taimi o le konafesi aoao. E tele auala e valaaulia ai isi ia maua aafiaga i le konafesi aoao:

• Valaaulia uo ma aiga tou te matamata faatasi i le konafesi.

• Faasoa atu anotusi musuia, mea e faamamafa, ma upusii mai le konafesi i luga o ala o faasalalauga faaagafesootai. E saunia e le Ekalesia punaoa e mafai ona fefaasoaa’i i luga o le initoneti.

• Fesoasoani e saunia tamaiti laiti ma le autalavou i gaoioiga ma punaoa e fiafia i ai o loo maua i le initoneti.

O le konafesi aoao e mafai ona avea o se taumafataga o malamalamaaga faaleagaga ma faaaliga. Ina ia fesoasoani ia te oe e manatua aafiaga faaleagaga na e maua, e mafai ona e tusia i lau api talaaga po o a fesili na e taliina, po o a lauga na musuia ai oe, ma po o a auala e te manao e faaleleia atili ai. E mafai foi ona e faasoa atu ou manatu ia i latou e te alofa i ai. Mafaufau pe na faapefea ona e latalata atili atu ia Keriso i le konafesi ma le mea o le a e faia e faaauau ai pea ona mulimuli ia te Ia ma upu a Ana perofeta. E pei ona aoao mai Peresitene Henry B. Eyring, Fesoasoani Lua i le Au Peresitene Sili: “Afai e lava lou faatuatuaina o le Atua e faalogo ai mo Lana savali i lauga, pese, ma tatalo uma i lenei konafesi, o le a e mauaina. Ma afai la e te alu ma fai le mea e finagalo o Ia e te faia, o le a tuputupu a’e lou mana e faatuatuaina ai o Ia, ma i se taimi o le a lofituina ai oe i le agaga faafetai i le iloaina ua afio mai o Ia e faatuatuaina oe” (“Faalagolago i le Atua, Ona Alu lea ma Fai,” le Liahona, Novema 2010, 73).

O punaoa faaopoopo nei e faateleina ai lou aafiaga i le konafesi aoao:

• Aoaoina mai i Savali o le Konafesi Aoao

• “O Auala e 5 e Nofomau ai ia te Oe le Konafesi”

• Musika musuia mai konafesi aoao ma isi mea

• Gaoioiga ma tala faaopoopo o le konafesi aoao mo tamaiti

• “O Le A le Konafesi Aoao?”

Siaki le “Auala e Matamata ai pe Faalogologo Tuusao ai i le Konafesi Aoao” ina ia iloa ai le auala e matamata ma faalogologo ai.