Mga Ideya sa Pagpangandam sa Pag-apil sa Kinatibuk-ang Komperensiya

Kinahanglan nga atong paaboton ang kinatibuk-ang komperensiya nga adunay mga pangutana sa hunahuna. Si Elder Dieter F. Uchtdorf mitudlo: Ang mga tubag sa inyong piho nga mga pag-ampo mahimong direktang moabot gikan sa usa ka partikular nga pakigpulong o gikan sa piho nga hugpong sa mga pulong. Sa laing mga higayon ang mga tubag mahimong moabot gikan sa mura og walay kalabotan nga pulong, hugpong sa mga pulong, o awit. Ang kasingkasing nga napuno sa pasalamat alang sa mga panalangin sa kinabuhi ug ang dakong tinguha sa pagpaminaw ug pagsunod sa mga pulong sa tambag moandam og agianan alang sa personal nga pagpadayag” (“Kinatibuk-ang Komperensiya—Dili Ordinaryo nga Panalangin,” Liahona, Septiyembre 2011, 5).

0:57

Samtang mangandam kamo alang sa kinatibuk-ang komperensiya, hunahunaa ang mga pangutana nga nakapabug-at sa inyong hunahuna, isulat kini, ug dayon paminaw alang sa mga tubag nga ipadala sa Ginoo kaninyo pinaagi sa Iyang mga sulugoon atol sa kinatibuk-ang komperensiya.

Agi og dugang sa pagtubag sa inyong mga pangutana, ang Ginoo tingali adunay laing mga butang nga gusto Niya nga isulti kaninyo. Pag-andam sa bisan unsa nga mga mensahe nga Iyang ihatag kaninyo. Kon mag-ampo kamo ngadto Kaniya ug tinud-anay nga mangayo og panabang sa pagpaminaw ug pag-ila sa Iyang tingog, motabang Siya ninyo sa pagpangita niadtong mga mensahe nga alang gayod kaninyo atol sa kinatibuk-ang komperensiya. Sa pagpalambo niini nga relasyon ug kahanas, tan-awa sa unsa nga paagi nga ang indibidwal nga Apostol sa Ginoo “naminaw Kaniya.”

Usa ka rason nga ganahan kaayo kita sa kinatibuk-ang komperensiya mao nga kini naghatag nato og oportunidad sa pagpaminaw sa Apostoles ni Ginoong Jesukristo nga mohimo unsa ang gitawag nila nga ilang himoon—sa paghatag sa ilang mga pagpamatuod isip Iyang espesyal nga mga saksi. Samtang maminaw mo sa ilang mga mensahe, paminaw pag-ayo unsay ilang gitudlo mahitungod ni Jesukristo. Himoa kini nga oportunidad sa pagpalawom sa inyong hugot nga pagtuo diha sa Manluluwas ug sa Iyang ebanghelyo.

Kon gusto mo nga makat-on pa og dugang mahitungod niining espesyal nga mga saksi ni Jesukristo, adunay daghang kapanguhaan sa website sa Simbahan. Kini nga mga kapanguhaan usa ka dakong paagi sa pagkat-on mahitungod sa mga lider sa Simbahan ug sa pagpalawom sa inyong pagpamatuod sa ilang espesyal nga mga calling.

Sama nga Siya adunay mga mensahe kaninyo, ang Dios gusto nga mosulti ngadto sa Iyang tanang anak. Paghunahuna og tawo nga inyong nailhan kinsa makabenepisyo sa pagpaminaw sa tingog sa Ginoo atol sa kinatibuk-ang komperensiya. Adunay daghang paagi sa pagdapit sa uban nga makasinati sa kinatibuk-ang komperensiya:

• Dapita ang mga higala ug pamilya sa pagtan-aw sa komperensiya uban ninyo.

• Pagpakigbahin sa makadasig nga mga mensahe, mga highlight, ug mga kinutlo gikan sa komperensiya diha sa social media. Ang Simbahan naghatag og mahimong ipakigbahin nga mga kapanguhaan sa online.

• Tabangi pag-andam ang gagmay nga mga bata ug kabatan-onan sa pag-apil sa mga kalihokan ug mga kapanguhaan nga anaa sa online.

Ang kinatibuk-ang komperensiya usa ka pagbusog sa espirituwal nga mga panabot ug pagpadayag. Aron sa pagtabang ninyo nga mahinumdom sa espirituwal nga mga kasinatian nga inyong nasinati, makasulat kamo sa inyong journal mahitungod sa unsa nga mga pangutana ang inyong natubag, unsa nga mga pakigpulong ang nakadasig ninyo, ug sa unsa nga paagi nga kamo gusto nga molambo. Mahimo usab nga mopakigbahin kamo sa inyong mga hunahuna ngadto sa inyong gimahal. Hunahunaa kon sa unsang paagi nga ang komperensiya nakapaduol ninyo ngadto ni Kristo ug unsa ang inyong buhaton sa pagpadayon sa pagsunod Kaniya ug sa mga pulong sa Iyang mga propeta. Sama sa gitudlo ni Presidente Henry B. Eyring, Ikaduhang Magtatambag sa Unang Kapangulohan: “Kon kamo igo nga mosalig sa Dios sa pagpaminaw sa Iyang mensahe sa matag pagpamulong, awit, ug pag-ampo dinhi niini nga komperensiya, makaplagan ninyo kini. Ug kon kamo moadto ug mobuhat dayon sa unsay gusto Niyang ipabuhat kaninyo, ang inyong gahom sa pagsalig Kaniya motubo, ug moabot ang panahon diin kamo mapuno sa pagpasalamat nga masayod nga Siya misalig kaninyo” (“Salig sa Dios, Dayon Lakaw ug Buhata,” Liahona, Nobiyembre 2010, 73).

Ania ang dugang nga mga kapanguhaan aron madugangan ang inyong kasinatian sa kinatibuk-ang komperensiya:

• Pagkat-on gikan sa mga Mensahe sa Kinatibuk-ang Komperensiya

• “5 ka Lakang aron Mahimo nga ang Komperensiya Magpabilin diha Kanimo”

• Makadasig nga musika gikan sa kinatibuk-ang komperensiya ug daghan pa

• Dugang nga mga kalihokan ug mga istorya sa kinatibuk-ang komperensiya alang sa mga bata

• “Unsa ang Kinatibuk-ang Komperensiya?”

Susiha ang “Mga Paagi sa Pagtan-aw o Pagpaminaw nga Buhi sa Kinatibuk-ang Komperensiya” aron makahibalo unsaon sa pagtan-aw o pagpaminaw niini.