Mga Ordinansa sa Templo alang sa mga Katigulangan

Ang mga miyembro kinsa anaa sa saktong edad ug adunay rekomend nga adunay limitasyon ang paggamit mahimong moapil sa mga bunyag ug mga kompirmasyon alang sa mga patay (tan-awa sa 26.4.3). Ang natugahan nga mga miyembro nga adunay balido nga rekomend sa templo mahimong moapil sa tanan nga mga ordinansa alang sa mga patay (tan-awa sa 26.5).

Ang mga miyembro nga adunay mga kakulangan mahimong mohimo og buhat sa templo alang sa mga patay kon sila:

• Adunay igong intelektuwal nga kapasidad sa pagsabot sa ordinansa.

• Makaatiman sa ilang kaugalingon o gikuyogan sa mga kabanay o mga higala kinsa adunay rekomend sa templo ug makahatag og tabang kon gikinahanglan.

Ang organisado nga mga grupo, sama sa mga pamilya, mga ward, ug mga stake, kinsa magtinguha nga moapil sa mga ordinansa diha sa bunyaganan kasagaran makigsabut pag-una sa templo. Usa o daghang mga hamtong kinahanglan mouban sa organisado nga mga grupo, mosiguro nga adunay resonable nga gidaghanon sa mga lider nga magrepresentar sa matag gender diha sa grupo. Kini nga mga hamtong kinahanglang adunay balido nga mga rekomend sa templo.

Ang mga lalaki ug mga babaye kinsa moabag sa bunyaganan dili kinahanglan nga i-set apart isip mga trabahante sa mga ordinansa sa templo. Ang natugahan nga mga lalaki, wala matugahi nga mga naghupot sa Melchizedek nga pagkapari, ug ang mga priest diha sa Aaronic nga Pagkapari mahimong mopahigayon sa mga bunyag.

Ang natugahan lamang nga mga lalaki ang mopahigayon sa mga kompirmasyon ug moserbisyo isip tigrekord diha sa bunyaganan o sa kwarto sa kompirmasyon.

Bisan kinsa nga miyembro nga naghupot og balido nga rekomend sa templo, lakip na ang rekomend nga adunay limitasyon ang paggamit, mahimong moserbisyo isip usa ka saksi sa usa ka proxy [puli] nga bunyag. Kini nga mga hamtong ug kabatan-onan mahimo usab motabang sa mga buluhaton diha sa bunyaganan sama sa pagtabang sa mga patron, pag-apud-apod sa sinina ug mga toalya, ug, kon posible, morekord sa mga ordinansa sa bunyag ug kompirmasyon diha sa sistema sa computer.

Walay labot sa usa ka tuig nga panahon sa paghulat alang sa proxy nga mga ordinansa sa templo ang namatay nga takos nga mga miyembro nga makaadto unta sa templo apan napugngan sa pag-adto samtang buhi pa tungod sa mga rason nga dili nila kapugngan. Mahimong maglakip kini sa mga bata nga nag-edad og 8 ug pataas ug mga batan-on nga takos sa panahon sa pagkamatay apan wala makadawat sa ilang tuga tungod kay wala sila makaabot sa tukma nga pangidaron (tan-awa usab sa 28.3.4). Ang maong kabataan ug kabatan-onan dili ilubong gamit ang sinina alang sa templo.

Aron mapahigayon ang ordinansa, ang mga sakop sa pamilya kinahanglan gayod nga adunay rekomend sa templo sa namatay nga tawo nga balido nianang higayona sa pagkamatay o usa ka sulat gikan sa bishop sa namatay nga tawo nga nagmatuod sa katakos sa tawo. Ang rekomend sa templo o sulat kinahanglang ipakita sa templo sa dili pa ipahigayon ang ordinansa.

Kon ang takos nga miyembro mamatay nga wala pay tuig human mabunyagi ug makompirmahi, ang mga ordinansa sa templo mahimong kompletohon kon molabay na ang usa ka tuig gikan sa petsa nga siya nakompirmahan (tan-awa sa 28.3.1).

Ang mga ordinansa sa templo wala kinahanglana alang sa mga bata kinsa namatay sa wala pa matawo. Wala kini magwagtang sa posibilidad nga ang usa ka bata mahimong kabahin sa pamilya sa kahangtoran. Ang mga ginikanan giawhag sa pagsalig sa Ginoo ug sa pagtinguha sa Iyang kahupayan. Alang sa dugang nga impormasyon, tan-awa sa 38.7.3.

Walay bunyag o pagtuga ang ipahigayon alang sa bata nga namatay nga wala pa mag-edad og 8. Ang mga pagsilyo lamang ngadto sa mga ginikanan ang ipahigayon alang sa maong mga bata. Kon ang bata nasilyo sa mga ginikanan samtang siya buhi pa, o kon ang bata natawo diha sa pakigsaad, walay puli nga mga ordinansa ang ipahigayon.

Ang mga ordinansa sa templo ipahigayon alang sa mosunod nga mga tawo nga namatay na kinsa adunay intelektuwal nga mga kakulangan:

• Mga tawo kinsa nahibaloan nga adunay pagka-maytulubagon (tan-awa sa Doktrina ug mga Pakigsaad 20:71)

• Mga tawo kansang pagka-maytulubagon wala mahibaloi

Kon klaro nga nahibaloan nga ang usa ka tawo nga namatay na adunay intelektuwal nga mga kakulangan ug walay tulubagon, ang ordinansa nga mapahigayon lamang mao ang pagsilyo ngadto sa mga ginikanan kon ang tawo wala matawo diha sa pakigsaad. Ang ubang mga ordinansa sa templo dili kinahanglanon o ipahigayon bisan kon ang tawo nabuhi sa edad nga 8 o pataas (tan-awa sa Doktrina ug mga Pakigsaad 137:10).

Ang mga ordinansa sa templo mahimong mapahigayon alang sa usa ka tawo nga gituohan nga patay na human molabay ang 10 ka tuig sukad sa panahon nga gituohan o gideklarar ang kamatayon. Kini nga polisiya magamit ngadto sa (1) mga tawo nga nawala sa panggubatan, nawala sa dagat, o gideklarar nga patay na sa legal nga paagi, ug (2) mga tawo nga nawala ubos sa mga kahimtang diin ang kamatayon klaro apan walay lawas nga nakuha.

Sa tanang laing mga sitwasyon sa nawala nga mga tawo, ang mga ordinansa sa templo dili mahimong mapahigayon hangtud molabay ang 110 ka tuig gikan sa pagkahimugso sa maong tawo.

Ang mga tawo nga mihunos sa ilang kaugalingong kinabuhi mahimong mapahigayonan og mga ordinansa sa templo alang kanila usa ka tuig o sobra pa human sa petsa sa kamatayon.

Ang pagtugot sa Unang Kapangulohan gikinahanglan sa pagpahigayon sa mga ordinansa sa templo alang sa namatay nga mga tawo kinsa, sa panahon sa ilang kamatayon, nabakwian sa pagkamiyembro o nakaluwat sa pagkamiyembro sa Simbahan. Ang usa ka sakop sa pamilya kinahanglang mosulat ngadto sa Buhatan sa Unang Kapangulohan. Walay gikinahanglan nga porma. Ang bishop o ang presidente sa stake mahimong moabag niini nga hangyo kon gikinahanglan.