Ko e Palani ʻa e ʻOtuá mo Ho Tufakanga ʻi Heʻene Ngāue ʻo e Fakamoʻuí mo e Hakeakiʻí

Kuo uiui‘i koe ke ke ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Fakamālō atu ʻi hoʻo ngāué. Te ke tāpuakiʻi ha ngaahi moʻui mo aʻusia ha fiefia ʻi hoʻo ngāue faivelengá.

ʻE tokoni atu e tohi tuʻutuʻuni ko ʻení ke ke ʻilo e ngaahi tefitoʻi moʻoni ʻo e ngāue faka-Kalaisí mo mahino ho ngaahi fatongiá. Te ke ngāue lelei taha ʻi he taimi te ke fakafenāpasi ai hoʻo ngāue ʻi he Siasí mo e ngāue ʻa e ʻOtua ko e Tamaí mo Hono ʻAlo ko Sīsū Kalaisí. ʻE tokoni atu ʻa e vahé ni ke ke maʻu ai ha vīsone ki he:

• Palani ʻa e ʻOtuá ki he fiefiá.

• Ngāue ʻa e ʻOtuá ki he fakamoʻuí mo e hakeakiʻí.

• Taumuʻa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe ʻomi ʻe he Tamai Hēvaní ʻa e palani ʻo e fiefiá ke tau lava ai ʻo maʻu ʻEne ngaahi tāpuakí kotoa. Ko ʻEne ngāué mo Hono nāunaú ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). Ko e moʻui taʻe-faʻa-maté ke moʻui ʻo lauikuonga ʻi ha sino kuo toetuʻu. Ko e moʻui taʻengatá, pe hakeakiʻí, ko e hoko ʻo tatau mo e ʻOtuá pea nofo ʻi Hono ʻaó ʻo taʻengata ko ha ngaahi fāmili.

ʻOku mahuʻinga ʻa Sīsū Kalaisi ki he palani ʻa e ʻOtuá. Tuʻunga ʻi he ʻofa taʻe-fakangatangata ʻa e Tamai Hēvaní kiate kitautolú, naʻá Ne fekau mai Hono ʻAló ke huhuʻi kitautolu mei he angahalá mo e maté ʻo fakafou ʻi Heʻene feilaulau fakaleleí (vakai, Sione 3:16). ʻOku fakapapauʻi ʻe Sīsū Kalaisi, ʻo fakafou ʻi Heʻene Fakaleleí, ko kitautolu kotoa ʻoku fanauʻi mai ki he māmaní te tau toetuʻu mo maʻu ʻa e moʻui taʻe-faʻa-maté.

Ke maʻu ʻa e moʻui taʻengatá, kuo pau ke tau “haʻu kia Kalaisi” (Molonai 10:32). ʻOku hanga ʻe he Fakalelei ʻa e Fakamoʻuí ʻo ʻai ke lava ʻo fufulu ʻa kitautolu mei he angahalá pea liliu hotau lotó ke tau lava ʻo maʻu ʻa e moʻui taʻengatá mo e kakato ʻo e fiefiá.

ʻOku finangalo e Tamai Hēvaní ke hoko kotoa ʻEne fānaú ʻo hangē ko Iá pea foki hake ʻo nofo mo Ia. ʻOku toki malava foki pē ʻeni ʻo fakafou mai ʻi Hono ʻAlo, ko Sīsū Kalaisí (vakai, Sione 14:6). ʻI he fili ke haʻu kia Kalaisi mo tokoniʻi ʻa e niʻihi kehé ke nau haʻu kiate Iá, ʻoku tau kau ai ʻi he ngāue ʻa e ʻOtuá ki he fakamoʻuí mo e hakeakiʻí. ʻOku tataki e ngāué ni ʻe ha ongo fekau maʻongoʻonga ʻe ua ke ʻofa ki he ʻOtuá pea mo ʻofa ki hotau kaungāʻapí (vakai, Mātiu 22:37–39

ʻOku tau haʻu kia Sīsū Kalaisi ʻaki hono fakaʻaongaʻi e tui kiate Iá, ʻo fakatomala, pea fakahoko mo tauhi e ngaahi fuakava toputapú (vakai, 3.5). ʻI hono fai iá ʻoku tau fokotuʻu ai ha vā fetuʻutaki fakafuakava mo e ʻOtuá ʻoku fakaʻatā ai kitautolu ke tau ʻunu ʻo ofi ange kiate Ia mo maʻu ʻEne ʻaloʻofá, fakamolemolé, mo e mālohi ʻoku lahi ange (vakai, ʻEkesōtosi 19:5; 3 Nīfai 20:25–26). ʻOku tokoni hono tauhi ʻetau ngaahi fuakava mo e ʻOtuá ke tau hoko ai ʻo hangē ko Iá pea teuteuʻi ai kitautolu ke nofo mo Ia ʻo taʻengata.

ʻOku mahuʻinga e ngaahi fuakavá ki he ngāue ʻa e ʻOtuá ki he fakamoʻuí mo e hakeakiʻí.

ʻI he palani ʻa e Tamai Hēvaní, ʻoku tau fai ha ngaahi fuakava ʻi heʻetau maʻu e ngaahi ouau ʻo e lakanga fakataulaʻeikí ʻa ia ʻoku fiemaʻu ki he fakamoʻuí mo e hakeakiʻí. Ko e ngaahi ouau ko ʻení ko e:

• Papitaiso.

• Hilifakinimá mo e me‘afoaki ʻo e Laumālie Māʻoniʻoní.

• Foaki ʻo e Lakanga Taulaʻeiki Faka-Melekisētekí pea fakanofo ki ha tuʻunga (houʻeiki tangatá)

• ʻEnitaumeni temipalé.

• Sila ʻi he temipalé.

ʻI heʻetau tauhi e ngaahi fuakava ʻoku kaunga ki he ngaahi ouau ko ʻení, ʻoku tau hoko ai ʻo hangē ange ko e ʻOtuá mo maʻu e ngaahi tāpuaki ʻo e moʻui taʻengatá (vakai, Tokāteline mo e Ngaahi Fuakava 84:19–22; vakai foki, 3.5.3 ʻi he tohi tuʻutuʻuni ko ʻení).

ʻOku kau ʻi he ngāue ʻa e ʻOtuá ki he fakamoʻuí mo e hakeakiʻí ha ngaahi fatongia ʻe fā kuo fokotuʻu fakalangi. ʻOku tokoni e kau mai ki he ngaahi fatongiá ni ki hono tauhi ʻetau ngaahi fuakava mo e ʻOtuá. ʻOku tau toe tokoniʻi foki e niʻihi kehé ʻi heʻenau fakahoko mo tauhi ʻa e ngaahi fuakava toputapú. ʻOku fakamatalaʻi atu e ngaahi fatongiá ni ʻi lalo.

1.4.1

Ko Hono Moʻui ʻaki ʻa e Ongoongolelei ʻo Sīsū Kalaisí

ʻOku kau ʻi hono moʻui ʻaki ʻa e ongoongolelei ʻo Sīsū Kalaisí ʻa e:

• Fakaʻaongaʻi e tui kia Kalaisí, fakatomala fakaʻaho, fai ha ngaahi fuakava mo e ʻOtuá ʻi heʻetau maʻu ʻa e ngaahi ouau ʻo e fakamoʻuí mo e hakeakiʻí, pea kātaki ki he ngataʻangá ʻaki hono tauhi ʻa e ngaahi fuakava ko iá (vakai, 1.2; 3.5.3).

• Ako mo akoʻi e ongoongolelei ʻo Sīsū Kalaisí ʻi ʻapi pea ʻi he lotú.

• Hoko ʻo moʻui fakafalala pē kiate kita ʻi hano tokonaki maʻatautolu pea mo hotau ngaahi fāmilí, fakalaumālie mo fakatuʻasino fakatouʻosi.

Naʻe fokotuʻu ʻe Sīsū Kalaisi Hono Siasí ke fakaaʻu e ngaahi tāpuaki ʻo e moʻui taʻengatá ki he taha kotoa pē ʻo fakafou ʻi he ngaahi ouau mo e fuakava toputapú. ʻOku fakafou atu ʻi Hono Siasí ʻa ʻEne ʻai ke lava ʻa e fakafoʻituituí mo e ngaahi fāmilí ʻo maʻu e ngaahi tāpuaki ko ʻení ke tokoni ki he ʻOtuá ʻi hono fakahoko ʻEne ngāue ki he fakamoʻuí mo e hakeakiʻí (vakai, ʻEfesō 4:11–13; vakai foki, 2.2 ʻi he tohi tuʻutuʻuni ko ʻení). Ke tokoni ke fakahoko ʻa e taumuʻa fakalangi ko ʻení, ʻoku ʻoatu ai ʻe Sīsū Kalaisi ʻo fakafou ʻi Hono Siasí mo hono kau takí ʻa e:

• Mafai mo e ngaahi kī ʻo e lakanga fakataulaʻeikí.

• Fakahinohino fakaepalōfita.

• Ngaahi folofola.

• Tokoni ʻi hono ako mo akoʻi ʻo e ongoongoleleí.

• Ngaahi faingamālie ngāue tokoni mo e tuʻunga fakatakimuʻa.

• Kakai ko ha kāinga Maʻoniʻoni.

1.5.1

Mafai mo e Ngaahi Kī ʻo e Lakanga Fakataulaʻeikí

ʻOku fakahoko ʻe he ʻOtuá ʻa ʻEne ngāue ʻo e fakamoʻuí mo e hakeakiʻí ʻo fakafou ʻi he lakanga fakataulaʻeikí. Naʻe fakafoki mai ʻa e mafai mo e ngaahi kī ʻo e lakanga fakataulaʻeikí naʻe fiemaʻu ki hono foaki mai ʻo e ngaahi ouaú mo e ngaahi fuakavá pea mo hono tataki e ngāue ʻa e ʻOtuá ʻi māmaní, ki he Palōfita ko Siosefa Sāmitá (vakai, Tokāteline mo e Ngaahi Fuakava 110:11–16; 112:30; vakai foki, 3.1 ʻi he tohi tuʻutuʻuni ko ʻení). ʻOku maʻu ʻa e mafai mo e ngaahi kī ko ʻení ʻe he kau taki ʻo e Siasí ʻi he ʻahó ni. ʻOku ui mo fakamafaiʻi ʻe he kau taki ko ʻení ha niʻihi kehe ke nau tokoni ʻi he ngāue ʻa e ʻOtuá (vakai, Tokāteline mo e Ngaahi Fuakava 107:8, 65–67

1.5.2

Fakahinohino Fakaepalōfita

ʻOku fakahā ʻe he ʻOtuá ʻa e moʻoní mo ʻomi ha fakahinohino mo ha ngaahi fakatokanga fakalaumālie ʻo fakafou ʻi Heʻene kau palōfita kuo filí (vakai, ‘Āmosi 3:7; Tokāteline mo e Ngaahi Fuakava 1:4). ʻOku tokoni ʻa e fakahinohino ko ʻení ke tau hū mo nofo maʻu ai ʻi he hala ʻoku fakatau ki he moʻui taʻengatá.

1.5.3

Ngaahi Folofolá

ʻI he malumalu ʻo e fakahinohino ʻa e kau palōfita mo e kau ʻaposetolo ʻa e ʻEikí, ʻoku ʻomi ai ʻe he Siasí mo fakatolonga ʻa e folofola ʻa e ʻOtuá ʻo hangē ko ia ʻoku maʻu ʻi he ngaahi folofola māʻoniʻoní. ʻOku fakamoʻoni ʻa e ngaahi folofolá kia Kalaisi, akoʻi ʻEne ongoongoleleí, mo tokoni ke tau tui kiate Ia (vakai, Sēkope 7:10–11; Hilamani 15:7).

1.5.4

Ko e Tokoni ki Hono Ako mo Akoʻi ʻo e Ongoongoleleí

ʻOku pououʻi ʻe he Siasí ʻa e fakafoʻituituí mo e ngaahi fāmilí ʻi honau fatongia ke ako e ngaahi moʻoni ʻo e ongoongoleleí mo akoʻi e ngaahi moʻoni ko ʻení ki he kau mēmipa ʻo e fāmilí mo ha niʻihi kehe (vakai, Tokāteline mo e Ngaahi Fuakava 88:77–78, 118; vakai foki, 2.2.3 ʻi he tohi tuʻutuʻuni ko ʻení).

1.5.5

Ngaahi Faingamālie Ngāue Tokoní mo e Tuʻunga Fakatakimuʻá

ʻOku ʻomi ʻe he ʻOtuá ha ngaahi faingamālie ki he kāingalotú ke nau ngāue mo taki, ʻo fakafou ʻi ha ngaahi uiuiʻi mo ha ngaahi ngāue ʻi he Siasí. ʻOku ʻomi ʻe he Siasí ha faʻunga ke tokoni ʻi hono tokangaʻi ʻo e kāingalotu faingataʻaʻiá pea mo fakahoko ha tokoni ʻofa fakaetangata ki he niʻihi kehé (vakai, Mōsaia 18:27–29).

1.5.6

Ko ha Haʻofanga ʻo ha Kakai Māʻoniʻoni

ʻI he hoko ʻa e kāingalotu ʻo e Siasí ko ha haʻofanga ʻo ha Kakai Māʻoniʻoní, ʻoku nau faʻa fakataha maʻu pē ai ke lotu ki he ʻOtuá pea mo manatuʻi ʻa e Fakamoʻuí ʻaki ʻenau maʻu ʻa e sākalamēnití (vakai, Molonai 6:4–6; Tokāteline mo e Ngaahi Fuakava 20:77). ʻOku toe fetokoniʻaki mo fetauhiʻaki foki ʻa e kāingalotú ʻiate kinautolu (vakai, ʻEfesō 2:19).

ʻI hoʻo hoko ko e taki ʻi he Siasí, kuo ui ai koe ke ke faiako mo poupouʻi ʻa kinautolu ʻokú ke tokoniʻí ʻi heʻenau tokoni ki he ʻOtuá ʻi Heʻene ngāue ʻo e fakamoʻuí mo e hakeakiʻí (vakai, 1.2). ʻE tokoni haʻo maʻu ha mahino kakato ki he ngāue ʻa e ʻOtuá, ko e meʻa ʻokú Ne fakaafeʻi koe ke ke faí, mo e taumuʻa ʻo Hono Siasí, ke tukutaha ai hoʻo tokangá ki hono ʻomi ʻa e ngaahi laumālié kia Kalaisí.

Feinga ʻi he faʻa lotu ke ke ʻilo ʻa e founga te ke lava ai ʻo ʻomi e ngaahi taumuʻa ʻa e ʻOtuá ki he moʻui ʻa kinautolu ʻokú ke tokoniʻí. ʻE tataki koe ʻe he ʻOtuá ʻo fakafou ʻi he ngaahi ueʻi ʻa e Laumālie Māʻoniʻoní (vakai, 2 Nīfai 32:5). ʻE hanga ʻe he ngāue fakataha mo e ʻEikí ʻi Heʻene ngoue vainé ʻo ʻomi kiate koe ha fiefia lahi (vakai, Sēkope 5:70–72).