Nakat-osob’tesiik xb’aan li Dios sa’ xk’ab’a’eb’ li k’ojob’anb’il k’anjel ut li sumwank

Laa Choxahil Yuwa’ naraj aatzolb’al ut aawosob’tesinkil. Naxb’aanu a’an rik’ineb’ li k’ojob’anb’il k’anjel jo’ li kub’iha’, li k’ojob’aak choq’ komon, ut li loq’laj wa’ak. Rik’ineb’ li k’ojob’anb’il k’anjel a’in, noko’ok sa’ sumwank, malaj noko’ok sa’ aatin, rik’in li Dios. Xpaab’ankil laa sumwank naxk’e chi nimank lix wankil li Dios sa’ laa yu’am ut nakatxkawresi choq’ re li junelik yu’am. Jo’kan ut naq jwal loq’eb’ li k’ojob’anb’il k’anjel ut li sumwank sa’ li qayu’am—xb’aan naq nokohe’xlaq’ab’ chi kaw rik’in li qaChoxahil Yuwa’ ut li qaKolonel, ut nokohe’xtenq’a chi wulak jo’ chanruheb’ a’an.

Li junelikil yaal

Eb’ li k’ojob’anb’il k’anjel nokohe’xjayali rik’in li Jesukristo. Jun k’ojob’anb’il k’anjel a’an jun santil k’anjel wankeb’ wi’ eetalil li neke’k’utuk chirix li Jesukristo. Li loq’laj wa’ak maawa’ yal kaxlan wa ut ha’. Naxjultika b’an qe li Kolonel.

Li sumwank nareetali lix rahom ut li rajom li Dios. Li sumwank naxkawob’resi li qasumwanjik rik’in li Dios. Li ok sa’ sumwank naxk’ut xyaalal naq nakara li Dios ut nakawaj xtaaqenkil. Naru nakapaab’ li Dios, ut a’an naru naxnaw naq taataaqe. Naq k’eek’o wi’chik laa ch’ool chiru li Dios, naru taawoksi xkomon chik xwankil ut xtenq’ a’an naq yookat chixpaab’ankil laa sumwank.

Nakat-ok sa’ sumwank rik’in li Dios naq nakub’e aaha’, nakatk’ojob’aak choq’ komon, ut naq nakak’ul li loq’laj wa’ak. Naq nakub’e aaha’, nakaye naq taak’ul lix k’ab’a’ li Jesukristo sa’ aab’een, naq tatk’anjelaq chiru, ut naq taapaab’ lix taqlahom chiru laa yu’am. Naq nakak’ul li loq’laj wa’ak, nakaye ajwi’ naq junelik taajultiko’aq a’an aawe. A’an a’in li nakaye naq taab’aanu. Naq wanq aach’ool chixb’aanunkil li nakaye, li Dios naxye naq tixk’e li Santil Musiq’ej chawochb’eeninkil rajlal.

Li b’oqok

Oxloq’i li loq’laj wa’ak jo’ jun santil maatan. K’ut naq k’eek’o aach’ool chiru li Jesukristo rik’in xkawresinkil aawib’ re xk’ulb’al li loq’laj wa’ak rik’in santilal. Tz’il rix sa’ aak’a’uxl k’a’ru naru taab’aanu re naq taanimanq xsantilal li k’ojob’anb’il k’anjel a’in rajlal xamaan.

Sik’ li Kolonel sa’eb’ li k’ojob’anb’il k’anjel. Naq nakawil malaj nakak’ul jun k’ojob’anb’il k’anjel, patz’ aawib’, “K’a’ru nintzol chirix li Jesukristo rik’in li k’anjel a’in?” malaj “Chan ru naq li k’anjel a’in nikinxnach’ob’resi rik’in li Kristo?” K’e reetal li naxk’ut li Musiq’ej chawu.

Kanab’ laa sumwank chixk’amb’al laa b’e. Sa’ chixjunil li nakab’aanu, chijultiko’q aawe laa sumwanjik rik’in li Dios. Paab’ajelaqat chiru a’an. Patz’ aawib’: A’in, ma naxk’am rib’ rik’in lin sumwank? Ma ninra ut nintenq’aheb’ li was wiitz’in, ma nink’ojob’ xch’ool li ani ra wan, ut ma xaqxookin chixch’olob’ankil xyaalal li Kristo—sa’ chixjunil na’ajej ut chixjunil hoonal?

Li Kristo naxkawresi li loq’laj wa’ak choq’ reheb’ laj Nefita

Li osob’tesink yeechi’inb’ileb’

Naru nakak’ul li wankilal re numtaak sa’ xb’een li aaleek, li maak, ut li yalb’a-ix re li yu’am. Xpaab’ankil laa sumwank naxk’e xwankil li Dios sa’ laa yu’am. Rik’in li wankilal a’an, yalaq k’a’ru naru nakak’ul chi kaw aach’ool. Li Jesukristo a’an laa kawilal!

Naru tatch’aje’q ut naru taakuye’q aamaak. Naq nakapaab’ laa sumwank re li kub’iha’, li Dios naxye naq taa’isiiq laa maak. A’an naraj naxye naq rik’in xjalb’al aak’a’uxl ut xb’aanunkil li nakaye re li Dios, a’an tixkuy aamaak ut tatxtenq’a chi chaab’ilo’k.

Li Santil Musiq’ej naru nawan aawik’in junelik. Jo’kan ajwi’, naq taakub’eeq aaha’ ut taak’ul li loq’laj wa’ak, li Santil Musiq’ej naru tatrochb’eeni rajlal ut eb’ li anjel naru te’k’anjelaq chawu. Maajo’q’e taanumsi li ch’a’ajkilal aajunes aawib’. Li Dios maajun wa tixkanab’eb’ li ralal xk’ajol re li sumwank—tz’aqal yaal a’an.

Naru tattenq’aaq xb’aan lix tenamit li Dios re li sumwank. Komonat sa’ li tenamit re li sumwank sa’ lix Iglees li Kolonel. Naqawaklesi qib’ chiqib’il qib’. Nokoyaab’ak ut nasaho’ qach’ool sa’ komonil. Naqak’am li qiiq chiqib’il qib’. Laa junkab’al, laa obiisp, eb’ laj jolominel ut eb’ li komon sa’ li Iglees neke’raj aatenq’ankil, ut laa’at naru nakatenq’aheb’ a’an.

Li patz’ok ut li sumenk

Ma naru nintaaqe li Jesukristo wi ink’a’ nink’uleb’ li k’ojob’anb’il k’anjel ut ink’a’ nin’ok sa’ sumwank? Naab’aleb’ li chaab’il kristiaan neke’xtaaqe li Jesukristo chi anchal xch’ooleb’, us ta moko kub’enaqeb’ ta xha’ chi moko wulajenaqeb’ sa’ li santil ochoch. A’b’anan, li qaChoxahil Yuwa’ naraj naq chixjunileb’ li ralal xk’ajol te’xk’uleb’ lix k’ojob’anb’il k’anjel ut te’ok sa’ sumwank rik’in a’an, re naq te’ruuq chixk’ulb’al xkomon chik lix tenq’, li rusilal, ut xmetz’ew. Choq’ re a’in naq li Jesukristo kixk’ojob’ wi’chik lix Iglees! Eb’ li ralal xk’ajol li Dios, chixjunjunqaleb’ te’ruuq—sa’ li yu’am a’in malaj sa’ li chalel—chixk’ulb’aleb’ li k’ojob’anb’il k’anjel ut li sumwank li ajb’ileb’ ru re xk’ulb’al li junelik yu’am.

Wankeb’ hoonal naq ink’a’ xinpaab’ lin sumwank. Ma sachsookin chi junajwa? Ink’a’! Lix evangelio li Jesukristo a’an jun evangelio re yo’onink ut re ak’ob’resiik! Xb’aan a’in naq naqak’ul li loq’laj wa’ak rajlal xamaan. Li qaChoxahil Yuwa’ kixnaw naq toopaalt’oq ut naq taqaj ak’ob’resiik. Li Kolonel kixq’axtesi lix yu’am re naq tatruuq chi sutq’iik. Naq nakapaab’ li Jesukristo ut nakajal aak’a’uxl, naru nakak’ul wi’chik lix wankil li Dios.

Chi’ilmanq 1 Korintios 11:23–26 (xk’ulb’al li loq’laj wa’ak naxk’ut xyaalal naq naqapaab’ li Jesukristo ut lix tojb’al rix li maak xb’aanu); Mosiah 18:10, 13 (li sumwank re li kub’iha’); Tzol’leb’ ut Sumwank 13 (li Tijonelil re Arron naxk’ameb’ li laaw re li jalb’a-k’a’uxlej, li kub’iha’, ut lix k’anjeleb’ li anjel); 20:37 (li na’ajman ru re xk’ulb’al li kub’iha’); 20:77, 79 (eb’ li tij re li loq’laj wa’ak).

Li patz’om re li recomendacion re li santil ochoch

Ma nakayal aaq’e chiroxloq’inkil xsantilal li hilob’aal kutan, sa’ kab’l jo’ ajwi’ sa’ iglees, chi wulak sa’eb’ laa ch’utam, chixkawresinkil aawib’ ut chixk’ulb’al chi tiik li loq’laj wa’ak, ut chi wank sa’ laa yu’am jo’ chanru neke’xye li chaq’rab’ ut li taqlahom re li evangelio?