Me Baleti Ira na iTubutubu—Vakarautaki Ira na Luvemu ki na Bula Taucoko ena Salatu ni Veiyalayalati ni Kalou

Ea vakatavulica o Nifai ni “matamata e dodonu [meda] na curuma kina” na salatu ni veiyalayalati “sai koya na veivutuni kei na papitaiso ena wai” (2 Nifai 31:17). Na nomu sasaga mo vukei ira na luvemu mera vakavakarau kina papitaiso kei na veivakadeitaki e rawa ni vakotora dei na yavadra ena salatu oya. Na veisasaga oqo e tekivu ena ivakavuvuli me baleta na vakabauti Jisu Karisito kei na veivutuni. Era oka talega kina na ivakavuvuli baleta na sala eda vakavouya kina na noda veiyalayalati ni papitaiso ena noda vakaivotavota ena sakaramede e veimacawa.

Oqo eso na ivurevure e rawa ni vukei iko: 2 Nifai 31; edua na ilavelave ni mekasini na iTokani baleta na papitaiso; Ulutaga kei na Taro, “Baptism,” Gospel Library.

• Ena veigauna taucoko o sotava kina na veika ka na vakaqaqacotaka na nomu vakabauta na Tamada Vakalomalagi kei Jisu Karisito, vakaraitaka vei luvemu. Vukei ira mera kila ni vakabauta edua na ka e rawa ni tubu me kaukauwa cake tikoga ena gauna taucoko ni bula. Na cava eso na ka e rawa ni cakava na luvemu me vakatorocaketaka kina na nona vakabauti Karisito ni se bera ni papitaiso?

• Ni digidigi cala na luvemu, tukuna ena reki na isolisoli ni veivutuni. Nio digidigi cala, wasea na reki e yaco mai ena siga yadua.nio veivutunitaka na nomu ivalavala ca Vakadinadinataka ni nona sa mai vakararawataki ka mate o Jisu Karisito ena vuku ni noda ivalavala ca, sa rawa kina nida veivutuni e veisiga, vosoti, ka ciqoma na kaukauwa meda veisau kina. Ni gadreva nomu veivosoti na luvemu, vosoti koya ena yalo galala kei na reki.

• Tukuna vua na luvemu me baleta na nomu papitaiso. Vakaraitaka na iyaloyalo ka wasea na nomu ivakananumi. Talanoataka na veika oa vakila, na sala e vukei iko kina na nomu veiyalayalati ni papitaiso mo kilai Jisu Karisito vakavinaka cake kina, kei na sala era vakalougatataka tiko ga kina na nomu bula na nomu veiyalayalati. Vakayaloqaqataka na luvemu me dau taro.

• Ni yaco edua na papitaiso ena nomu matavuvale se ena nomu tabanalevu, kauta na luvemu me laki raica. Veitalanoataka vata kei na luvemu na veika drau a raica ka vakila. Kevaka e rawa, veitalanoa kei koya e papitaiso ka taroga na taro vakaoqo: “O a cakava vakacava na vakatulewa oqo? O a vakavakarau vakacava?”

• Na gauna o raica kina ni cakava tiko na luvemu edua na ka a yalataka me cakava, vakacaucautaki koya. Dusimaka ni maroroi ni yalayala ena vukea na noda vakavakarau meda maroroya na veiyalayalati eda vakayacora ena gauna eda papitaiso kina. Na cava eda yalataka vua na Kalou nida papitaiso? Na cava e yalataka vei keda o Koya? (Raica na Mosaia 18:8–10, 13.)

• Talanoataka na sala e sa vakalougatataki iko kina na nomu sa vakadeitaki ka yaco mo lewena Na Lotu i Jisu Karisito ni Yalododonu Edaidai. Kena ivakaraitaki, o toro voleka vakacava vua na Tamada Vakalomalagi kei Jisu Karisito ena nomu qaravi ira na tani kei na nodra qaravi iko na tani? Vukea na luvemu me vakasamataka na sala eso me veiqaravi ka vakaqaqacotaki ira kina na tani me vaka edua na lewe ni Lotu. Vukei ira talega mera vakayacora ka kila na reki e yaco mai ena veiqaravi.

• Nio sotava vata kei na luvemu edua na gauna tabu (me vaka ena lotu, nio wilika tiko na ivolanikalou, se nio veiqaravi tiko vua edua), tukuna vua me baleta na veika vakayalo o vakila se vakauqeti kina. Sureta na luvemu me wasea na veika era vakila. Raica na veimataqali sala e rawa ni vosa kina na Yalotabu vei ira na tamata, oka kina na sala e vosa kina o Koya ki vei iko. Vukea na luvemu me kila ka wasea vei iko na veigauna ena dau sotava tiko beka kina o koya na veivakauqeti ni Yalo Tabu.

• Drau sarava vata e vica na vidio ena ikumuni ni vidio ena Valenivola Vakosipeli ka kena ulutaga na “Hear Him!” Veitalanoataka vata na duidui ni sala era rogoca kina na domo ni Turaga na Nona italai. Sureta na luvemu me droinitaka edua na itaba se cakava edua na iyaloyalo me baleta na sala e rogoca kina na domo ni iVakabula.

• Cakava na sakaramede me dua na soqo tabu ka rekitaki ena nomu matavuvale. Wasea vua na luvemu na sala o vakanamata kina vei Jisu Karisito ena gauna ni sakaramede. Vukea na luvemu me cakava edua na ituvatuva me vakaraitaka ni sa ka tabu vei ira na sakaramede. Me kena ivakaraitaki, noda rogoca tiko na qaqa ni masu ni sakaramede e rawa ni vakananuma vei keda na noda veiyalayalati ni papitaiso.

• E vuqa na ilavelave ni mekasini ni iTokani e tu kina na itukutuku, italanoa, kei na itaviqaravi me vukei ira na gone mera vakavakarau ki na papitaiso kei na veivakadeitaki. Laiva na luvemu me digitaka eso me wilika ka marautaka vata kei iko. (Raica talega na ikumuni ni “Preparing for Baptism” ena iwasewase ni gone ena Gospel Library.)

Na matabete sa ikoya na lewa kei na kaukauwa ni Kalou ka dau vakalougatataki Ira kina na luvena. Sa tiko e vuravura nikua na matabete ni Kalou e Na Lotu i Jisu Karisito ni Yalododonu Edaidai. “O ira kece na lewe ni Lotu era maroroya na nodra veiyalayalati—marama, turaga, kei na gone—era sa vakalougatataki ena kaukauwa ni matabete ni Kalou ena nodra veivale mera vakaqaqacotaki kina kei na nodra matavuvale” (iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 3.6, Valenivola Vakosipeli). Na kaukauwa oqo ena vukei ira na lewenilotu ena nodra vakayacora na cakacaka ni veivakabulai kei na bula vakacerecerei ni Kalou ena nodra bula yadua kei na matavuvale (raica na iVoladusidusi Raraba, 2.2).

Nira veiqaravi na tagane kei na yalewa ena veikacivi ni Lotu, era na vakayacora vakakina ena lewa ni matabete, ena nodra veidusimaki na taura tu na idola ni matabete. O ira taucoko na luvena na Tamada Vakalomalagi—na Luvena tagane kei na yalewa—era na vakalougataki nira yaco mera kila vakavinaka cake na matabete.

Eda ciqoma na cakacaka vakalotu ena lewa ni matabete. “O ira na lewe ni Lotu tagane bula kilikili era ciqoma na lewa ni matabete ena veivakatikori ni matabete kei na veitabaki ki na itutu ni matabete eso” (iVoladusidusi Raraba, 3.4). O ira era vakaitutu ena matabete e rawa nira vakadonui mai vua edua e taura tu na idola ni matabete mera qarava na cakacaka vakalotu ni matabete.

Me vulici eso tale na ka me baleta na matabete, raica na Russell M. Nelson,“iYau Vakayalo,” Liaona, Nove. 2019, 76–79; Russell M. Nelson, “Na Vua ni Kaukauwa Vakamatabete,” Liaona, Me 2016, 66–69; “iVakavuvuli ni Matabete,” Wase 3 ena iVoladusidusi Raraba.

• Cakava na cakacaka vakalotu ni matabete me tiki tudei ni nomu bula vakamatavuvale. Me kena ivakaraitaki, vukea na luvemu me vakavakarau vakayalo ki na sakaramede e veimacawa. Vakauqeta na luvemu me vakasaqara na veivakalougatataki ni matabete ena gauna e tauvimate se gadreva kina na veivakacegui se veidusimaki. Vakamatautaki iko mo dau dusia na veisala eso e vakalougatataka tiko kina na Turaga na nomu matavuvale ena Nona kaukauwa.

• Nio ni wilika vata na ivolanikalou, vakaraica na veimadigi eso mo dou veitalanoataka kina na sala e vakalougatataki ira kina na tamata na Kalou ena Nona kaukauwa. Wasea na veika o vakila nio sotava na gauna e vakalougatataki iko kina na Kalou ena Nona matabete. Me baleta na ivakaraitaki ni veivakalougatataki eda ciqoma mai vua na Kalou ena matabete, raica na iVoladusidusi Raraba, 3.2, 3.5.

• Vakavulica vua na luvemu ni gauna e papitaiso oti kina, sa na rawa me ciqoma na kaukauwa ni matabete ni maroroya na veiyalayalati ni papitaiso. Railesuva vata na itukutuku nei Peresitedi Russell M. Nelson “iYau Vakayalo” (Liaona, Nove. 2019, 76–79). Tukuna vua na luvemu na sala e sa kauta mai kina na kaukauwa ni Kalou ki na nomu bula na cakacaka vakalotu ni matabete. Me baleta e dua na lisi ni so na sala eda sa vakalougatataki kina ena kaukauwa ni Kalou, raica na iVoladusidusi Raraba, 3.5.

• Veitalanoataka na taro “E vakaevei tu beka edua na italai ni Turaga?” Wilika vata na Vunau kei na Veiyalayalati 121:36–42, ka vakasaqara na kena isau. Ena veigauna taucoko o raica kina na luvemu (se dua tale) ni vakayagataka tiko edua na ivakavuvuli se ivakarau ni bula ena veitikina oqo, tukuna cake sara.

• Nio vakayagataka o iko se o luvemu na ki mo dolava kina edua na katuba se me yavalati kina na idini ni motoka, tu mada vakadua ka vakatauvatana na ki oqori kina idola era taura tu na iliuliu ni matabete. (Me baleta na ivakamacala ni idola ni matabete, raica na iVoladusidusi Raraba, 3.4.1). Na cava e “dolava” se “tekivutaka” vei keda na idola ni matabete? Raica talega na Gary E. Stevenson, “Evei na Ki kei na Lewa ni Matabete?,” Liaona, Me 2016, 29–32; “Sa Evei na Ki?” (vidio), Valenivola Vakosipeli.

  

  2:51

Na valetabu era sa tiki tudei tu mai ni ituvatuva nei Tamada Vakalomalagi vei ira na luvena. Ena vale ni Turaga, eda vakayaco veiyalayalati tabu vata kei na Tamada Vakalomalagi nida vakaitavi ena veicakacaka tabu vakalotu, era dusi taucoko vei Jisu Karisito. Sa vakarautaka tu na Tamada Vakalomalagi edua na sala vei ira kece na Luvena mera caka veiyalayalati ka vakaitavi ena cakacaka vakalotu, oka kina o ira era a sega ni ciqomi ira ena bula oqo. Ena itekivu ni yabaki me yabaki 12 kina na luvemu, sa veirauti nodra yabaki ni bula mera papitaiso ka vakadeitaki e valetabu ena vukudra na tubudra era sa mate (raica talega na 1 Korinica 15:29).

• Dau gole kina vale ni Turaga ena kena levu ga e rawa ni vakatara na nomu ituvaki. Vakaraitaka vua na luvemu na vuna o lako tiko kina kei na sala e vukei iko kina na valetabu mo toro voleka vua na Tamada Vakalomalagi kei Jisu Karisito.

• Railesuva na taro ni ivolatara ni valetabu ka veitalanoataka vata. O rawa ni raici ira ena tabana e 36–37 ni Me iSakisaki ni iTabagone: iDusidusi mo Cakava na Digidigi. Tukuna vua na luvemu na veika edau yaco ena dua na veivakatarogi ni ivolatara ni valetabu. Wasea na vuna e bibi kina vei iko me dua tiko na nomu ivolatara ni valetabu.

• Wilika vata na Malakai 4:6. Veitalanoataka na sala e rawa ni vagolei kina na yalomu vei ira na nomu qase e liu. Vulica eso tale na ka me baleti ira na nomu qase e liu ni dou vakadikeva vata na nomudou ituvatuva ni kawa ena FamilySearch.org. Vakasaqarai ira na nomu qase e liu ka ra gadreva me ra papitaiso ka vakadeitaki. E rawa ni veivuke na daunivakasala ni valetabu kei na tuvakawa ena nomu tabanalevu.

• Railesuva vata eso na ivurevure ena ikumuni ka kena ulutaga na “Temple” ena nodra iwasewase na gone ena Gospel Library. (Raica talega na “Preparing Your Child for Temple Baptisms and Confirmations” ena ChurchofJesusChrist.org.)

Na veivakalougatataki vakapeteriaki e rawa ni dua na ivurevure ni veidusimaki, veivakacegui, kei na veivakauqeti. E tiko kina na ivakasala mai vua na Tamada Vakalomalagi vei keda yadua ka vukei keda meda kila na keda ivakatakilakila kei na inaki tawamudu. Vukea na luvemu me vakavakarau me ciqoma edua na veivakalougatataki vakapeteriaki ena nomu vakavulici koya ena bibi kei na ituvaki tabu ni veivakalougatataki vakapeteriaki.

Me vulici eso tale na ka, raica na Topics and Questions, “Patriarchal Blessings,” Gospel Library.

• Wasea vei luvemu na veika o sotava ena nomu ciqoma edua na veivakalougatataki vakapeteriaki. E rawa nio wasea na veika eso me vaka na nomu vakavakarau, na kena sa vukei iko mo toro voleka vua na Kalou, kei na sala e tomana tiko kina o Koya me dusimaki iko ena veivakalougatataki oqo. Sa rawa talega mo sureta na luvemu me veitalanoa kei ira na lewe ni matavuvale tale eso era sa ciqoma na nodra veivakalougatataki vakapeteriaki.

• Railesuva vata na itukutuku nei Elder Randall K. Bennett “Nomu Veivakalougatataki Vakapeteriaki—Veidusimaki Veivakauqeti mai vua na Tamada Vakalomalagi” kei na itukutuku nei Elder Kazuhiko Yamashita “Gauna Cava mo Ciqoma Kina na Nomu Veivakalougatataki Vakapeteriaki” (Liaona, Me 2023, 42–43, 88–90). Veiwaseitaka na veika o sa vulica mai na veitukutuku oqo me baleta na vuna e vinakata kina na Tamada Vakalomalagi meda ciqoma edua na veivakalougatataki vakapeteriaki. Me vulici na iwalewale ni kena ciqomi edua na veivakalougatataki vakapeteriaki, raica na iVoladusidusi Raraba, 18.17.

• Kevaka e tiko o ira na nomu qase e liu era sa ciqoma oti na veivakalougatataki vakapeteriaki, e rawa ni veivakauqeti mo wilika vata kei na luvemu eso vei ira. Me kerei na nodra veivakalougatataki na qase e liu e ra sa mate, curu ki na ChurchofJesusChrist.orgkilikitaka na Tools ena tutu imatau e cake ni sikirini, ka digitaka na Patriarchal Blessing.

• Ni ciqoma oti o luvemu edua na veivakalougatataki vakapeteriaki, sureta edua vei ira na lewe ni matavuvale ka a tiko kina me vola na veika e a vakila ka wasea vei luvemu.

Na Kalou e vinakata mera vakaivotavota, se vakalougatataki, ira taucoko na Luvena ena “kaukauwa mai lomalagi” (Vunau kei na Veiyalyalati 95:8). Eda gole ki valetabu meda ciqoma ga vakadua na noda edaumeni, ia na veiyalayalati eda cakava vata kei na Kalou kei na kaukauwa vakayalo e solia vei keda o Koya me tiki ni edaumeni ena rawa ni vakalougatataki keda ena veisiga yadua ni noda bula.

• Vakabira edua na itaba ni valetabu e loma ni nomu vale. Tukuna vua na luvemu na veika o vakila ena vale ni Turaga. Tukuna vakawasoma na nomu lomana na Turaga kei na Nona vale kei na veiyalayalati o sa cakava e kea. Vakaraica na madigi mo lako ki na valetabu vata kei na luvemu me laki papitaiso ka vakadeitaki ena vukudra nona qase e liu.

• Vakadikeva na temples.ChurchofJesusChrist.org vata. Wilika na idusidusi me vaka “About the Temple Endowment” and “Prepare for the House of the Lord.” Vakatara na luvemu me taroga na taro e tiko vua me baleta na valetabu. Me baleta na veidusimaki ni veika o rawa ni tukuna ena taudaku ni valetabu, raica na itukutuku nei Elder David A. Bednar “Vakarautaki me Rawati na Veika Kece e Ganiti” (Liaona, Me 2019, 101–4; raica vakabibi na iwase ka kena ulutaga “Na Vulici ni Kena Usutu na Vuvale ka Tokona na Lotu kei na Vakavakarau ki Valetabu”).

• Nio vakaitavi se vakadinadinataka vata kei luvemu eso tale na cakacaka vakalotu (me vaka na sakaramede se veivakalougatataki ni veivakabulai), taura edua na gauna me veitalanoataki kina na ivakatakarakara e tiko ena cakacaka vakalotu. Na cava era matataka na ivakatakarakara? Era vakadinadinataki Jisu Karisito vakacava? Oqo ena vukea na luvemu me vakavakarau me vakasamataka vakatitobu na ibalebale ni veicakacaka vakalotu ni valetabu, ka ra vakadinadinataki Jisu Karisito tale ga.

• Vukea na luvemu me raica na nona maroroya tiko na veiyalayalati ni papitaiso ka vakamacalataki ena Mosaia 18:10, 13 (raica talega na tikina e 8–9, ka vakamacalataka na vua ni veiyalayalati o ya). Vukei luvemu talega me raica rawa na sala e vakalougatataki koya kina na Turaga. Tara cake na nona yalodei na luvemu ena nona rawata me maroroya na veiyalayalati.

• Vakaraitaka e matanalevu ka vakawasoma na sala e dusimaka kina na nomu digidigi na nomu veiyalayalati ni valetabu ka vukei iko mo toro voleka yani vei Jisu Karisito. E rawa nio vakayagataka na iVoladusidusi Raraba, 27.2, mo railesuva kina na veiyalayalati eda vakayacora ena valetabu. Kevaka o sa ciqoma na edaumeni, tukuna vei ira na luvemu na sala e vukei iko kina na qameni ni valetabu mo nanuma na nomu veiyalayalati kei Jisu Karisito (raica na “Sacred Temple Clothing” [vidio], Gospel Library; Anette J. Dennis, “Ia Dou Vakaisulu, ena Turaga ko Jisu Karisito,” Liaona, Me 2024, 10–13).

  

  4:12

E vakavuvulitaka o Elder David A. Bednar: “Na ka bibi duadua o rawa ni cakava mo vakavakarau ki na veikacivi ni veiqaravi sa ikoya mo yaco mo dua na daukaulotu ni sa bera sara na nomu lako ikaulotu. … Na ka bibi eke e sega ni baleta na lako ki kaulotu; ia, na ka bibi sa ikoya na noda yaco meda daukaulotu ka veiqaravi ena noda bula taucoko ena yaloda taucoko, igu, vakasama, kei na kaukauwa taucoko. … Oni sa vakavakarau tiko ki na dua na bula taucoko ni cakacaka vakadaukaulotu” (“Yaco mo Dua na Daukaulotu,” Liaona, Nove. 2005, 45–46). Na veika e sotava na luvemu ena nona lai kaulotu ena vakalougatataki koya me tawamudu, ka sega ena gauna ga a veiqaravi kina vakadaukaulotu.

Me vulici eso tale na ka, raica na Russell M. Nelson, “Vunautaka na Kosipeli ni Sautu,” Liaona, Me 2022, 6–7; Gary E. Stevenson, “Loloma, Wasea, Sureta,” Liaona, Me 2022, 84–87; “Adjusting to Missionary Life,” Gospel Library.

• iVakaraitaki ni sala me wasei kina na kosipeli ena sala e matau. Dau yadrava na madigi mo wasea vei ira na tani na nomu nanuma me baleta na Tamada Vakalomalagi kei na iVakabula kei na veivakalougatataki o ciqoma mai na kosipeli vakalesui mai ni iVakabula kei na nomu lewena na Nona Lotu. Sureta eso tale mera tomana na nomu matavuvale ena Lotu kei na itaviqaravi vakamatavuvale.

• Vakaraica na madigi eso me ratou veimaliwai kina na nomu matavuvale kei ira na daukaulotu. Sureti ira mera vakavulici ira na nomu itokani, se solia mera vakavulici ira na tamata ena nomu vale. Tarogi ira na daukaulotu me baleta na veika era sotava tiko kei na sala sa vukei ira tiko kina na veiqaravi vakadaukaulotu mera toro voleka yani vei Jisu Karisito. Taroga talega na veika era a vakayacora (se diva mera a vakayacora) nira vakavakarau mera daukaulotu.

• Kevaka o a lai kaulotu, talanoataka vaka rawarawa ka vakawasoma na veika o a sotava. Se sureti ira na itokani se lewe ni matavuvale era a lai kaulotu mera talanoataka na nodra. E rawa talega nio veitalanoataka na sala sa wasei kina na kosipeli vei ira na tani ena nomu bula taucoko. Vukea na luvemu me vakasamataka na veisala eso e rawa ni wasea kina na kosipeli.

• Solia na madigi vei luvemu me vakavulica ki na nomu matavuvale na ivakavuvuli ni kosipeli. E rawa tale ga ni vakatovotovotaka na luvemu me wasea na veika e vakabauta vei ira na tani. Me ivakaraitaki, sa rawa nio veitalanoataka na taro vakaoqo “Eda na vakamacalataka vakacava na iVola i Momani vua edua e sa bera vakadua ni rogoca?” se “Eda na vakamacalataka vakacava na nona gadrevi na iVakabula vua edua e sega ni lotu Va-Karisito?” (Raica na Ahmad S. Corbitt, “O Kila Li Na Vuna Au Vakabauti Karisito Niu Lotu Vakarisito?,” Liaona, Me 2023, 119–21.)

• Vukea na luvemu me yalodei ni veitalanoa kei ira na tamata. Na cava eso na sala vinaka me tekivutaki kina edua na veitalanoa? Vakayaloqaqataka na luvemu me vulica na ivakarau me vakarorogo kina ki na veika era kaya na tani, kila na veika e tu e yalodra, ka wasea na dina ni kosipeli ka rawa ni vakalougatataka na nodra bula.

• Vakasaqara na madigi eso me vulica kina na luvemu na itovo vakavanua kei na veivakabauta tale eso. Vukei koya me kila ka rokova na ivakavuvuli vinaka ka dina ena nodra vakabauta na tani.

E valetabu, sa rawa nirau vakawatitaki edua na turaga kei na marama me tawamudu. E yaco oqo ena dua na cakacaka vakalotu e vakatokai na “veivauci ni valetabu.” E dina ga ni se yawa sara na gauna me vakaitavi kina na luvemu tagane kei na yalewa ena cakacaka vakalotu oqo, na veika lalai, rawarawa, drau dau cakava vata ena veiyabaki oqori e rawa ni vukei koya me vakavakarau ki na veivakalougatataki totoka oqo.

• Raica vata “Na Matavuvale: Ai Vakaro ki Vuravura Raraba” (Valenivola Vakosipeli). Na cava e vakavulica na ivakaro oqo me baleta na bula marau ena bula vakamatavuvale kei na bula vakawati gugumatua? Cakacaka kei luvemu, mo drau digia edua vei ira na ivakavuvuli e tiko ena ivakaro mo drau vulica. Sa rawa mo raica na ivolanikalou e semati ki na ivakavuvuli oya ena iDusidusi ki na iVolanikalou. Sa rawa talega mo tuva na lalawa me vakayacori kece kina na ivakavuvuli oqo ena nomu matavuvale. Nio cakacakataka na nomu lalawa, veitalanoataka vata na revurevu ni kena bulataki na ivakavuvuli oya ena bula vakamatavuvale.

• Wilika vata kei luvemu na itukutuku nei Peresitedi Dieter F. Uchtdorf “Veivakacaucautaki Vei Ira Era Veivakabulai” (Liaona, Me 2016, 77–80). Nio yacova na iwase ka kena ulutaga na “Dua na iSoqosoqo ni Veika Cacawale,” o na via vakaraica na veika e nomu vale era cacawale kei na veika tale eso e sega. Veitalanoataka na itovo ni nomu vakamareqeta edua na ka o gadreva me bula dede. Na cava e vakatura oqo me baleta na sala e dodonu meda vakamareqeta kina na veimaliwai ni bula vakamau kei na veiwekani vakamatavuvale? Na cava tale eda vulica mai na itukutuku nei Peresitedi Uchtdorf me baleta na sala e rawa ni vukei keda kina na iVakabula meda tara cake na bula vakawati kei na matavuvale qaqaco?

• Vakaraitaka vua na luvemu na veika drau sa vulica tiko kei watimu me baleta na vakamau tawamudu e kena usutu na Karisito kei na veisala eso o sasaga tiko kina mo vinaka cake. Kevaka o drau sa vauci vata kei na watimu ena valetabu, vakaraitaka vua na luvemu ena ivakaraitaki na nomu sasaga mo maroroya kina na nomu veiyalayalati kei na Turaga. Tukuna vua na luvemu na sala o segata kina me itakele ni nomu veimaliwai na Tamada Vakalomalagi kei na iVakabula kei na sala Erau sa vukei iko tiko kina (raica talega na Ulisses Soares, “Cakacaka Vata kei na Turaga,” Liaona, Nove. 2022, 42–45).

• Ni gadrevi me vakayacori na vakatulewa vakamatavuvale, vakayacora na matabose kei na veitalanoa vakamatavuvale. Raica me rogoci ka tauri vakabibi na nodra nanuma kece na lewe ni matavuvale. Vakayagataka na veitalanoa oqo medua na madigi ni veitalanoa bulabula kei na yalo vinaka ena veimaliwai vakamatavuvale, ena gauna mada ga e duidui kina na ivakarau ni nodra rai yadua. (Raica na M. Russell Ballard, “Matabose ni Matavuvale,” Liaona, Me 2016, 63–65.)

• Ni yaco na duidui se veisaqasaqa ena matavuvale, vakaraitaka na vosota kei na yalololoma. Vukea na luvemu me raica na kena qaravi ena sala Va-Karisito na veisaqasaqa ka na rawa ni vukei koya ena nona vakavakarau kina dua na vakawati mamarau. Wilika vata na Vunau kei na Veiyalayalati 121:41–42, ka veitalanoataka na sala e rawa ni vakayagataki kina na ivakavuvuli e na veitikina oqo ki na vakamau.