“Iloilo Lou Aoaoina 6: Alema 17–Alema 52,” Tusi Lesona a le Faiaoga o le Tusi a Mamona (2024)

“Iloilo Lou Aoaoina 6,” Tusi Lesona a le Faiaoga o le Tusi a Mamona

Iloilo Lou Aoaoina 6

tamaitai talavou o loo suesue i tusitusiga paia

O lenei lesona ua faamoemoe e fesoasoani ia te oe e iloilo ai sini ua e faatutuina, ma le tuputupu a’e ua e oo i ai i au suesuega talu ai nei o le Tusi a Mamona.

Fesoasoani i tagata aoga e aoao e faataua le iloiloga faaletagata lava ia. O iloiloga masani ma faifaipea faaletagata lava ia e mafai ona fesoasoani ai i tagata aoga e vaai ai i le ala ua avea atili ai i latou e faapei o le Faaola. Valaaulia tagata aoga e mafaufau ma le agaga tatalo i mea ua latou iloa ma o latou lagona e uiga ia Iesu Keriso. Uunaia i latou e iloilo ma le faamaoni lo latou alualu i luma ma mafaufau i suiga e mafai ona latou faia a o latou taumafai e ola i Lana talalelei.

Sauniuniga a le tagata aoga: Valaaulia tagata aoga e o mai saunia e faasoa mai mea na latou aoaoina po o ni auala na latou tuputupu a’e ai faaleagaga i nai vaiaso ua tuanai. E ono fesoasoani le tuu atu i tagata aoga e toeiloilo a latou api talaaga mo suesuega po o faamatalaga i a latou tusitusiga paia.

Gaoioiga e Ono Mafai Ona Aoao Ai

Fuaina o le tuputupu a’e

O a mea e faaaoga ai meafaigaluega nei?

Mafaufau e faaali atu ata o meafaigaluega nei pe, afai e mafai, ia aumai ni nai meafaigaluega moni.

meafaigaluega e fua ai le maualuga o le toto

E faapefea ona aoga ma taua nei meafaigaluega taitasi?

E pei lava ona taua ona fuaina le soifua maloloina faaletino ma le tuputupu a’e, e taua foi le iloiloina o lou soifua maloloina faaleagaga ma le alualu i luma. O lenei lesona o le a tuuina atu ai ia te oe se avanoa e faia ai lenei mea.

Fesoasoani i tagata aoga i lo latou alualu i luma faaleagaga talu ai nei e ala i le fai atu o fesili e pei o nei. Mafaufau e faaali atu nei fesili ma valaaulia tagata aoga e tusi a latou tali i a latou api talaaga mo suesuega a o le’i faasoaina atu a latou tali i le vasega.

O le a se mea na e aoaoina talu ai nei lea e te faafetai ai?
O a ni suiga ua e maitauina talu ai nei i ou lagona ma uiga faaalia?
O a nisi o auala ua e faaaogaina ai mea sa e aoaoina?

Faamae’a gaoioiga nei e iloilo ai lou aoaoina faaleagaga ma le tuputupu a’e. Mafaufau e ole atu i le Tama Faalelagi e fesoasoani ia te oe e faailoa le alualu i luma ua e faia ma vaega e te ono manaomia ona faaleleia ai.

O le suesuega a lau vasega i le Alema sa ono faamamafaina ai upumoni e ese nai lo upumoni o loo iloiloina i gaoioiga nei. Fetuunai gaoioiga nei ina ia faaaofia ai na upumoni sa e faamamafaina. Manatua o manatu uma e lē manaomia ona talanoaina i lenei lesona pe talanoaina foi i le faasologa o loo tusia ai.

Faamatala upumoni taua e uiga i le ata o le faaolataga ma le matafaioi a Iesu Keriso

O lenei vaega o le lesona ua faamoemoe e fesoasoani ai i tagata aoga e faamatala ai vaega o le ata o le faaolataga ma le matafaioi a Iesu Keriso mai a latou suesuega lata mai nei o tusitusiga paia. Fetuunai mea nei i se auala lea e fesoasoani ai i tagata aoga e manatunatu lelei ai ma faamatala mea na latou aoaoina e faavae i le auala po o mea sa e aoaoina atu.

Mai lau suesuega o Alema, atonu na e aoaoina ai nisi o mea ia e mafai ona fesoasoani ai ia te oe e faamalamalama lelei atili ai upumoni e uiga i le ata o le faaolataga ma le matafaioi taua a Iesu Keriso.

Filifili se tasi o gaoioiga nei e faamae’a.

Mafaufau e faaali atu tulaga faataitai ma fesili nei mo tagata aoga e tali mai i ai.

Gaoioiga 1: O le ata o le faaolataga

Vaai faalemafaufau e faapea, o se tasi o au uo na maliu talu ai nei se tasi e pele ia te ia.

I le mafaufau ai i nisi o upumoni mai lau suesuega talu ai nei, o le a se mea e mafai ona e faasoa atu i lau uo e uiga i le ata o le faaolataga? E mafai faapefea ona fesoasoani lenei mea ia te ia? (Tagai i le Alema 11; 12; 40.)

Afai e manaomia e tagata aoga se fesoasoani, mafaufau e faasino atu i latou i ni mau faasino patino e uiga i le ata o le faaolataga, e pei o le Alema 11:41–45; 12:24–25; 22:13–14; 40:11–14, 21, 23.

Gaoioiga 2: O le matafaioi a Iesu Keriso

Vaai faalemafaufau i le talanoa atu i se tasi e masalosalo e uiga i lou talitonuga ia Iesu Keriso.

I le mafaufau ai i nisi o upumoni mai lau suesuega talu ai nei, o le a se mea e mafai ona e faasoa atu i lenei tagata e uiga i le matafaioi taua a Iesu Keriso? (Tagai i le Alema 26; 34; 36.)

Afai e manaomia e tagata aoga se fesoasoani, mafaufau e faasino atu i latou i ni mau faasino patino e uiga i le matafaioi a Iesu Keriso, e pei o le Alema 26:12–14, 16, 22, 35–37; 34:8–10; 36:16–21. Atonu e fesoasoani le ta’u atu i tagata aoga e faapea o upu a Amona sa tautala ai e uiga i le Atua i le Alema 26 e mafai ona faasino uma atu i le Tama Faalelagi ma Iesu Keriso.

Lagona se manao faateleina e sui ona o Iesu Keriso

I lau suesuega talu ai nei, ua e aoao ai e uiga i le toatele o tagata o ē na suia ona sa latou aoao e uiga ia Iesu Keriso.

Mafaufau e valaaulia tagata aoga e ta’u mai nisi o tagata sa latou suesueina i le Tusi a Mamona o ē na suia ona o Iesu Keriso. O faataitaiga nei e tolu e mafai ona faasoa atu pe a manaomia. E mafai ona vaevae tagata aoga i ni vaega ma tofia e iloilo se tasi o seti nei o fuaiupu. Ona mafai lea e se tagata aoga mai vaega taitasi ona aotele mai mea na faitau e le vaega mo le vaega o totoe o le vasega.

O sa Lamanā na aoaoina e Amona: Alema 17:13–16 (a o le’i oo i le taimi); Alema 19:33, 36 (i le mavae ai)
Tamā o le Tupu o Lamonae: Alema 20:8–14 (a o le’i oo i le taimi); Alema 22:15–18 (i le mavae ai)
Alema le Itiiti: Alema 36:6 (a o le’i oo i le taimi); Alema 36:18, 24–26 (i le mavae ai)

O le a se mea na e maitauina e uiga i lo latou naunau e suia?

Manatunatu i lou manao e suia ona o Iesu Keriso. O fesili nei e mafai ona fesoasoani ia te oe e faia ai lenei mea. Atonu e te mafaufau e tali atu i nei mea i lau api talaaga mo suesuega.

E mafai ona faaali atu fesili nei, ma e mafai e tagata aoga ona filifili e tali i ai i a latou api talaaga mo suesuega.

Pe na e lagonaina ea nisi o manaoga lava nei e tasi ia na lagonaina e nei tagata i le Tusi a Mamona? Aisea e te manatu ai faapena?
O le a sou manatu o le a se mea e mafai ona taitai atu ai oe pe na taitai atu ai oe e lagonaina nei lava manaoga e tasi?

Mauaina o faaaliga mai le Agaga Paia

O se faamoemoega taua i le seminare o le fesoasoani lea ia te oe ia faateleina lou gafatia ina ia maua faaaliga faaletagata lava ia mai le Agaga Paia.

Manatunatu i ni aafiaga lata mai nei i le mauaina ai o faaaliga faaletagata lava ia mai le Agaga Paia. Atonu e te iloiloina nisi o faamatalaga na e tusia i au tusitusiga paia po o lau api talaaga mo suesuega a o e suesue i le vasega po o le fale.

A o le’i amataina le talanoaga lenei, atonu e fesoasoani le faaali atu o “Mamanu o le Malamalama: Agaga o Faaaliga” (3:04) e fesoasoani ai i tagata aoga ia iloa nisi o auala e talanoa mai ai le Agaga Paia ia i tatou. O loo maua lenei vitiō i le ChurchofJesusChrist.org.

3:6

Valaaulia tagata aoga e talanoaina nisi o auala na faamanuiaina ai i latou talu ai nei e ala i le mauaina o faaaliga faaletagata lava ia e ala mai i le Agaga Paia. O fesili nei e mafai ona fesoasoani i lenei mea.

O a ni malamalamaaga ua e mauaina mai le Agaga Paia i au suesuega talu ai nei o le Tusi a Mamona?
O le a se mea ua fesoasoani le Agaga ia te oe e te malamalama pe lagona ai e uiga i le Tama Faalelagi ma Iesu Keriso?
O a ni faatinoga amiotonu na uunaia ai oe talu ai nei e le Agaga Paia e fai?

Uunaia tagata aoga e faaauau pea ona saili mo, ma faatino faaaliga faaletagata lava ia mai le Agaga Paia.

Gaoioiga Faaopoopo e Aoao Ai

O se isi auala e amata ai le lesona

Mafaufau e faaali atu se ata o le laulau faatonutonu o se taavale e iloa atu ai moli faailoilo uma. Fesoasoani i tagata aoga ia malamalama e faapea o faailoilo i luga o se laulau faatonutonu o se taavale e tuuina mai ai faamatalaga taua e ta’u mai ai poo faapefea le alu a le taavale ma lapataiga pe afai e i ai se mea e faaletonu. E mafai e tagata aoga ona faailoa mai le uiga ma le faamoemoega o le tele o faailoga latou te mafaia i luga o le laulau faatonutonu o le taavale o loo faaalia. Faamalamalama atu e faapea, e pei o faailoga o le laulau faatonutonu o se taavale, e mafai ona fesoasoani lesona o le Iloilo Lou Aoaoina a le seminare ia i latou e iloa ai pe o ā mai i latou faaleagaga ma iloilo lo latou tuputupu a’e ma pe na faapefea ona latou faatinoina a latou suesuega o le talalelei.