« ’Ua ani Iesu Mesia ia tātou ’ia rave i te ’ōro’a », Liahona, Māti 2021
Parau poro’i tā’āva’e nō te Liahona, Māti 2021
’Ua ani Iesu Mesia ia tātou ’ia rave i te ’ōro’a
E tāmāhia tātou ’e e fa’aorahia tō tātou māuiui ’a ha’amana’o ai i tō tātou Fa’aora i te hepetoma tāta’itahi.
The Last Supper [Te tāmā’ara’a hope’a], nā Carl Heinrich Bloch
Hou ’oia ’a pohe ai, ’ua fa’atupu Iesu Mesia i te hō’ē tāmā’ara’a hope’a. I te hope’a o taua tāmā’ara’a ra, ’ua fa’a’ite ’oia i te ’ōro’a i tōna feiā ’āpe’e. ’Ua vāhi ’oia i te pāne ’e ’ua ha’amaita’i i te reira. « E nā reira ’outou ’ei mana’ora’a iā’u » (Luka 22:19). I muri iho ’ua ha’ama’ita’i ’oia i te hō’ē hāpaina uaina.
E tuha’a nō te ha’amorira’a tāhepetoma
I te fa’ahoi-fa’ahou-ra’a-hia mai te ’Ēkālesia a Iesu Mesia i ni’a i te fenua nei, ’ua riro mai te ’ōro’a ’ei tuha’a nō te ha’amorira’a tāhepetoma. I roto i te purera’a, e ha’amaita’ihia te ’ōro’a ’e e ’ōperehia e rātou tei mau i te autahu’ara’a. E pure rātou mai te au i te mau parau i roto i te mau pāpa’ira’a mo’a (hi’o Moroni 4 ; 5). ’Ei reira te ta’ata tāta’itahi i roto i te ’āmuira’a e ’amu ai i te pāne ’e e inu ai i te pape ’ei ha’amana’ora’a ia Iesu Mesia ’e tāna tusia nō tātou, mai tāna i ani mai ia tātou.
Hōho’a nā Angela Suitter
Fa’aineine nō te rave
Nō te fa’aineine nō te rave i te ’ōro’a, e feruri hōhonu tātou i tō tātou orara’a ’e i tā tātou mau mā’itira’a. E mea ti’a ia tātou ’ia tātarahapa i tā tātou mau hape ’e te mau hara o te hepetoma i ma’iri, ma te ani ato’a i te Atua ’ia fa’aore mai i te reira. ’Aita i tītauhia te fāito maita’i roa nō te rave i te ’ōro’a, ’ia fa’aha’eha’a rā tō tātou ’ā’au.
Prayer at Gethsemane [Te pure i Getesemane], nā Del Parson
’Ua hau atu i te pāne ’e te pape
’Ua riro te ravera’a i te ’ōro’a ’ei taime mo’a. E fa’aha’amana’o te mau pure ’ōro’a ia tātou ē, ’ia rave tātou i te pāne ’e te pape, tē ha’amana’o ra tātou i te tino ’e te toto tā Iesu Mesia i hōro’a nō tātou. E parau fafau atu tātou ’ia pe’e iāna ’e ’ia ora i te orara’a keresetiano. E parau fafau atu tātou ’ia tāmata i te ha’apa’o i te mau fa’auera’a a te Atua. I tōna pae, e tāmāhanahana te Vārua mo’a ia tātou, ma te arata’i ’e ma te fa’aora i tō tātou māuiui.
Fa’a’āpī i tā tātou mau fafaura’a
’Ia rave ana’e tātou, tei bāpetizohia, i te ’ōro’a ma te ’ā’au mā, tē fa’a’āpī nei tātou i te fafaura’a i ravehia i te bāpetizora’a. Tei roto ato’a ïa te fāri’ira’a i te Vārua Maita’i ’e te tāmāra’a ia tātou i te hara mai te huru ē tē bāpetizo-fa’ahou-hia ra tātou. ’O te tīa’ira’a ïa ’e te aroha tā Iesu e pūpū nei ia tātou tāta’itahi. ’Aita roa atu i tāere roa nō te tātarahapa, ’ia fa’a’orehia tā tātou hara.
That Ye Do Always Remember Me [E ha’amana’o tāmau ā ’outou na iā’u], nā Gary L. Kapp, ’eiaha e tāhōho’a
E aha tā te mau pāpa’ira’a mo’a e parau nei nō ni’a i te ’ōro’a ?
E mea ti’a ’ia hi’opo’a tātou ia tātou iho i te pae vārua, ma te hi’o hōhonu ’o roto, hou ’a rave ai i te ’ōro’a (hi’o 1 Korinetia 11:28).
I muri iho i tōna ti’afa’ahoura’a, ’ua fa’a’ite Iesu i tōna mau ta’ata i Amerika nāhea i te rave i te ’ōro’a (hi’o 3 Nephi 18).
’Ua parau mai te mau peropheta nō teie ’anotau ’ia fa’a’ohipa i te faraoa ’e te pape nō te ’ōro’a, e ’ere rā te mea tā tātou e ’amu ’e e inu te mea faufa’a roa (Te Parau Ha’api’ira’a ’e te mau Parau Fafau 27:2). I te tahi taime, tītauhia i te feiā tē vai ra tō rātou tatira’a (allergie) ’ia ’amu i te tahi atu ’ohipa mai te faraoa te huru.
© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, March 2021. Tahitian. 17464 895
The Last Supper [Te tāmā’ara’a hope’a], nā Carl Heinrich Bloch ; hōho’a nō te tamāhine e pure ra nā Angela Suitter ; Prayer at Gethsemane [Te pure i Getesemane], nā Del Parson ; That Ye Do Always Remember Me [E ha’amana’o tāmau ā ’outou na iā’u], nā Gary L. Kapp, ’eiaha e tāhōho’a