Mwumvire

Bavandimwe na bashiki banjye nkunda, mbega ngo nishimiye ko binyuze mu ikoranabuhanga twashoboye kubonana tukanaramya muri iki gitondo cyo ku Cyumweru. Ko turi abanyamugisha kumenya ko inkuru nziza ya Yesu Kristo yagaruwe ku isi!

Mu byumweru byinshi bishize, benshi muri twe twahuye na kirogoya mu buzima bwacu. Imitingito, imiriro, imyuzure, ibyorezo, n’ingaruka zabyo zahungabanyije gahunda, binazana igabanyuka ry’ibiribwa, iby’ibanze, n’ubwizigame.

Muri ibi byose, turabashimira guhitamo kumva ijambo rya Nyagasani, muri iki gihe cy’impagarara mwifatanya natwe mu giterane rusange. umwijima ukomeje ukurikiye amakuba bituma urumuri rwa Yesu Kristo rumurika kurushaho. Tekereza ibyiza buri wese muri twe yakora muri iki gihe cy’imvururu ku isi hose. Urukundo rwawe n’ukwizera mu Mukiza bishobora cyane kubera umuntu intandaro yo gutahura Igarurwa ry’inkuru nziza yuzuye ya Yesu Kristo.

Mu myaka ibiri ishize, Mushiki wacu Nelson na njye twahuye n’ibihumbi byanyu mu isi hose. Twahuye na mwe mu bibuga byo hanze, no mu byumba byo kwiyacyira bya hoteli. Muri aho hose, numvise ko ndi imbere y’intore za Nyagasani, kandi ko nabonaga ikoranya rya Isirayeli ribera imbere y’amaso yanjye.

Tuba mu minsi “abakurambere bategereje bahangayikishijwe n’amiringiro .”¹ Dufite imirongo ya mbere y’intebe yo kubona biba ibyo umuhanuzi Nefi yabonye gusa mu iyerekwa, ko “ububasha bwa Ntama w’Imana” bwamanukira “ku bantu b’igihango cya Nyagasani, bari baratatanyirijwe ku isi yose; kandi bari bambaye ubukiranutsi n’ububasha bw’Imana mu ikuzo ryinshi.”²

Mwebwe, bavandimwe na bashiki banjye, muri muri abo bagabo, abagore, n’bana Nefi yabonye. Tekereza ibyo!

Utitaye aho uba cyangwa imimerere yawe iyo ariyo, Nyagasani Yesu Kristo ni Umukiza wawe , n’umuhanuzi w’Imana Joseph Smith ni umuhanuzi wawe . Yimitswe kera mbere y’iremwa ry’isi kuba umuhanuzi w’ubusonga bwa nyuma, ubwo nta kintu kizahishwa³ Abera. Ibyahishuwe bikomeza gutemba biva kwa Nyagasani muri uru ruhererekane rw’igarurwa rukomeje.

Bikubwiye iki ko inkuru nziza ya Yesu Kristo yagaruwe ku isi?

Bivuze ko wowe n’umuryango wawe mushobora komekanywa hamwe burundu! Bivuze ko kubera wabatijwe n’umwe ubifitiye ubutware buturutse kuri Yesu Kristo, ukanemezwa nk’umunyamuryango w’Itotero Rye, ushobora kwishimira ubufasha budashira bwa Roho Mutagatifu. Azakuyobora anakurinde. Bisobanura ko utazasigwa nta humure cyangwa ngo ubure uruhushya ku bubasha bw’Imana bwo kugufasha. Bisobanura ko ububasha bw’ubutambyi bwaguha umugisha igihe ubona imigenzo y’ingenzi unagirana ibihango n’Imana kandi unabigumamo. Mbega ukuntu uku kuri ari igitsika ku bugingo bwacu, cyane cyane muri ibi bihe ubwo inkubi y’umuyaga yiyongera.

Igitabo cya Morumoni kivuga amateka y’ukuzamuka n’ukugwa kw’isanzuramuco ebyiri zikomeye za kera. Amateka yabo yerekana uko byoroshye ku bantu benshi kwibagirwa Imana, bakamagana impanuro z’abahanuzi ba Nyagasani, bagashaka ububasha, kwamamara n’irari ry’umubiri.⁴ Kenshi, abahanuzi bahise batangaje “ibintu byiza bitangaje ku bantu, batigeze bemera.”⁵

Ntaho bitandukaniye no mu minsi yacu. Mu myaka yashize, ibintu byiza binatangaje byumvishwe kuri alitari zabigenewe mu isi yose. Ariko abantu benshi nti bemera uku kuri—kubera rimwe baba batazi aho bagushakira⁶ cyangwa kuko bumvira abadafite ukuri kose cyangwa kuko banze ukuri, bakimakaza gukurikira iby’isi.

Umwanzi ni umunyabwenge. Mu myaka ibihumbi yerekanaga ikiza nk’ikibi n’ikibi nk’ikiza.⁷ Ubutumwa bwe bujya gusakuza, ntibutinya, kandi bwuzuye ubwirasi.

Ariko, ubutumwa bwa Data wo mu Ijuru buratandukanye bigaragara cyane. Avuga byoroshye, bucece, kandi byumvikana bitangaje ku buryo Utamwumva nabi.⁸

Urugero, igihe cyose yerekanaga Umwana we w’Ikinege ku bantu ku isi, yabikoze ku buryo budasanzwe n’amagambo make cyane. Ku musozi w’Ihinduka, Petero, Yakobo na Yohana, Imana yarababwiye iti “Uyu ni Umwana wanjye nkunda: mumwumvire.”⁹ Amagambo ye ku Banefi muri Bountiful ya kera yari “Murore Umwana Wanjye Nkunda, nishimiye, muri we nakujije izina ryanjye—mumwumvire.”¹⁰ No kuri Joseph Smith, muri rya tangazo ryimbitse, ryatangije ubu busonga, Imana yavuze gusa, “Uno ni Umwana Wanjye Nkunda. Mwumvire!”¹¹

Ubu, bavandimwe na bashiki banjye nkunda, muzirikaneko muri izi ngero eshatu zivuzwe aha, mbere y’uko Se yerekana Umwana we, ababwirwa bari bafite ubwoba, banihebye ku rugero runaka.

Intumwa zari zifite ubwoba igihe zabonaga Yesu Kristo azengurutsweho n’igicu ku Musozi w’Ihinduka.

Abanefi bari bafite ubwoba kuko bari baranyuze mu irimbuka n’umwijima iminsi myinshi.

Joseph Smith yari ari mu nzitiro z’imbaraga z’umwijima mbere neza yuko ijuru rifungura.

Data wa twese azi ko iyo twugarijwe n’urujijo n’ubwoba, icyadufasha cyane ari ukumvira Umwana We.

Kuko iyo dushatse kumva—kumva byukuri—Umwana We, tuzayoborwa mu kumenya icyo gukora mu gihe icyo ari cyo cyose.

Ijambo rya mbere mu Nyigisho n’Ibihango ni mwumvire,¹² Bivuga “Kumva ugamije kubaha”¹³ Kumvira bivuga “kumwumvira”— kumva ibyo Umukiza avuga maze u gatega amatwi inama Ze. Muri ayo magambo abiri—“Mwumvire”—Imana iduha inzira yo gutsinda, ibyishimo, n’umunezero muri ubu buzima. Tugomba kumva amagambo ya Nyagasani, kuyumvira no gutega amatwi ibyo Atubwira!

Uko dushaka kuba abigishwa ba Yesu Kristo, imihati yacu yo Kumwumvira igomba kuba ibigamije cyane. Bitwara kumenya no guhozaho umuhati kuzuza ubuzima bwacu bwa buri munsi amagambo Ye, inyigisho Ze, n’ukuri Kwe.

Ntitwakwizera gusa amakuru tubona ku mbuga nkoranyambaga. N’amagambo atabarika ari kuri interineti, no mu isi yuzuyemo kwamamaza gushakira isoko mu rusaku, imihati mibisha y’umwanzi, ni he twajya kumwumvira?

Twajya mu byanditswe. Bitwigisha kuri Yesu Kristo n’inkuru nziza Ye, uburemere bw’Impongano Ye, na gahunda ya Data wa twese y’ibyishimo n’incungu. Kwirundumurira kwa buri munsi mu ijambo ry’Imana ni ingenzi mu kurokoka kwa roho, cyane cyane muri ino minsi y’imvururu ziyongera. Uko twigaburira amagambo ya Kristo buri munsi, amagambo ya Kristo azatubwira uko twasubiza ingorane tutigeze dutekereza guhura nazo.

Dushobora no Kumwumvira mu ngoro. Inzu ya Nyagasani ni inzu yo kwigiramo. Aho Nyagasani ahatwigishiriza inzira Ye. Aho buri mugenzo wigisha ku Mukiza. Aho twiga uko twavanaho igihu tukavugana neza kurushaho n’ijuru. Aho twigira gucyaha umwanzi tukanavana ububasha mu butambyi budukomeza n’abo dukunda. Mbega ugushishikara buri wese muri twe yakagize gushakirayo ubuhungiro.

Ubwo izi nzitizi zagateganyo za COVID-19 zizavanwaho, mugenge ibihe byo kuramya no gufasha mu ngoro. Buri munota w’icyo gihe uzaguhesha umugisha n’umuryango wawe mu buryo nta kindi cyabishobora. Fata igihe cyo gutekereza ibyo wumva n’ibyiyumviro byawe iyo uri yo. Saba Nyagasani kukwigisha uko wafungura imiyoboro yo mu ijuru ugaha umugisha ubuzima bwawe, n’ubuzima bw’abandi ukunda kandi ukorera.

Ubwo kuramiriza mu ngoro bidashoboka ubu, ngutumiye kongera ubwitabire bwawe mu mateka y’umuryango, no gushaka ayo mateka, unayandika mu irangiro. Nijeje ko uko wongera igihe cyawe mu ngoro n’umurimo w’amateka y’umuryango, uzongera unanoze ubushobozi bwawe bwo kumwumva.

Tuna Mwumva neza kurushaho iyo tunononsora ubushobozi bwacu bwo kumenya ukongorera kwa Roho Mutagatifu. Ntibyigeze biba ngombwa kumenya uko Roho akuvugisha nk’ubu ngubu. Mu Bumana, Roho Mutagatifu ni intumwa. Azazana ibitekerezo mu bwenge bwawe Data n’Umwana bashakako ubona. Ni umuhoza. Azazana ibyiyumviro by’amahoro mu mutima wawe. Ahamya ukuri azanemeza ibiri ukuri ubwo wumva unasoma ijambo rya Nyagasani.

Nongeye kubasaba gukora Icyo ari cyo cyose bisaba mu kongera ubushobozi bwa roho bwanyu kugirango mubone ibyahishuwe byo ku giti cyanyu.

Gukora ibi bizabafasha kumenya uko mwakomeza kureba imbere mu buzima bwanyu, icyo mwakora muri ibi bihe by’ibibazo, n’uko mwamenya mukanirinda ibigeragezo n’uburiganya bw’umwanzi.

Hanyuma, Tumwumvira dutega amatwi amagambo y’abahanuzi, bamenya, n’abahishura. Intumwa zimitswe za Yesu Kristu ziramuhamiriza buri gihe. Zerekana inzira igihe turi kunyura mu bibabaza umutima by’igihe cyacu cy’umubiri.

Ni iki kizaba nimwumva mubigamije, mwumvira, munatega amatwi ibyo Umukiza yavuze n’ibyo Ari kuvuga ubu anyuze mu bahanuzi Be? Nijeje ko muzahabwa umugisha n’ubushobozi bw’inyongera bwo guhangana n’ibigeragezo, intambara, n’intege nke. Nijeje ibitangaza mu ngo zanyu, imibanire y’umuryango n’akazi ka buri munsi. Kandi nijeje ko ubushobozi bwanyu bwo kumva umunezero buziyongera nubwo imidugararo yakwiyongera mu buzima bwanyu.