Doadoahngki Kapokon Lap ong ni Doadoahk en Papah

Sang ni lepin mahsen kaselel kan, tiahk en peneinei kan, oh padahk kan me sang irail Sapwellimen Kauno sounpapah kan, kapokon lap kihong kitail soangen wiepen papah tohto—mwowe, ni ahnsouo, oh mwurin keimwseklahn wihk en kapokon lapo!

Ni Susie oh Tom Mullen ara wia sounpadahk en kaunop en misin, ira kin kangoangehki tohn kasukuhl ko irail en kin lukehdo emen aramas pwehn iang kilang kapokon lap.

“Lukehiong emen en wia mehkot iei e wia ehu kisehn doadoahk en misineri, oh e pil wia kisehn doadoahk en papah,” liho ahpw inda. “Naiht tohn sukuhl kan kin kalapw repwohtkidohng kiht duwen ia uwen pweida me wiawi ong irail oh pil ong aramas me irail lukeh ko.”

Iet ekei wiepeh kan me neira tohn sukuhl ko kin repwohtki duwen arail kin papah:

“Se kin papah kempoakepaht men me ahniki kahpwal akan me e nannanti loale. Se luke en rong kapokon lap pwehn kak alehdi pasepeng kan. Ni ahnsou me se pwarek mwurin kapokono, e indahng kiht me e rong soahng tohto me kak sewese ih.”
“Se wia kamadipw en kapokon lapo oh koaros wahdo kisin mwenge kan me se ehukipene. Uwen ah udahn kaperen se koasoanehdi me se pahn pwurehng wia.”
“I lukehiong emen kempoakepahi en iangie kilang kapokon lap. Ni aht koasoaiapene, se koasoanehdi sen tangala ni imwen mihtingo pwehn tehk ma se kak kilang mwo. Eri ihme se wia, oh aht mih mwo wia kemwekid me keieu kaselel!”

Pwopwoud en Mullen oh neira tohn sukuhl ko esehla soangen wiepe tohto sang nan kapokon lap ong ni doadoahk en papah. E wia wiepe mwahu en ehukipene ire kaselel kan, tiahk en peneinei kan, koasoai kamarain, oh padahk kan en Sapwellimen Kauno sounpapah kan!

Luke Mehtei kan ong nan Amwail Wasahn Kousoan

“Sounkomouro ketin poahngoakihong Sapwellimeh kan, ‘Duwen ei poakohng kumwail, iei duwen kumwail en poakpene’ (Sohn 13:34). Eri kitail en kilang duwen ah ketin poakohng kitail. … Ma kitail kin wiahki Ih atail mehn karasaras, kitail anahne ahnsou koaros en nantihong en ehuwong koaros en patehng.” —Presiden Dallin H. Oaks ¹

Pahr kei samwalahro aht sounpadahk Mike me kin pwarek kiht nihmwato ahpw tehkada me ngehi oh nei seri silimeno kin kilangpene kapokon lap pohn nait kisin lahpdop kis. E ahpw ahnsouohte luke kihtla pwe se en iang kilang rehn ih oh ah pwoud, Jackie, ni ah ngihtehtehki me ira pahn udahn pereniki aht iangira. Nei seri ko udahn pereniki arail pahn kilang kapokon lapo ni TV mehlel; I udahn kapingki utuht me mie oh kiht koaros peren ni aht ehupene.

Mwurin mwo, e wialahr tiahk ehu ni aht kin kohpene oh kilangpene kapokon lap. Itarete eh miehier pein naiht TV, se kin perenikihte kohla rehn Mike oh Jackie ni aht kin wah aht uluhl kan, pwuhk en inting kan, oh kisin mwenge ong kapokon lap. Rongorongpene mahsen en soukohp akan inenen kesempwalohng kiht. Se wiahla duwehte peneinei. Mike oh Jackie wiahla ekei kempoakepaht oh keriemen en pahpa oh nohno kahlap ong nei seri kan. Ara limpoak oh ehuwong kiht mehlel wia lapalahn kapai ohng ahi peneinei. I inenen kapingki mehlel ara ineng en ritingohng kiht imwara oh ara mohngiong kan ohng kiht.

Suzanne Erd, California, USA

Iren Madamadau kan

“Tehkada”

Sounkomouro ahniki ahnsou mwahu en kilang anahn en mehteikan oh mwekidkihda pwe en kak kapwaiada anahn pwuko (kilang Madiu 9:35–36; Sohn 6:5; 19:26–27). Kitail kak wia soahngohte.

“Ni Ahnsouohte Luke”

Mwurin atail tehkada anahn en irail akan me kitail kin papah, kitail en uhd mwekidkihda.“Rongorong mahsen en soukohp akan”

Kitail anahne en kin “tuhpene ahnsou koaros” (Moroni 6:5) pwe kitail en kin kasukuhlpene, keirpene, oh koasoaia duwen mahsen sarawi kan me keieu kesempwal ohng atail mour akan.

“Kohdo rong ngilen soukohp oh rong mahsen en Koht”² wia ehu luhk keieu kesempwal me kitail kak lukehki irail akan me kitail kin papah.

“Limpoak oh Ehupene Mehlel”

Pwehn kak wia mehlel en sawas oh kangoang ong mehtei kan, kitail anahne kakairada ehupeneh kan ni wahu oh “limpoak mehlel sang ni wiwia” (kilang Doctrine oh Covenants 121:41).

Kasalehda nan inderned

“Mehn koasoai en inderned wia dipwisou en doadoahk me kak sewese oh sair aramas tohto oh peneinei tohto. Oh I kamehlele me e konehngkitailehr ni atail wia tohndoadoahk en Krais pwe kitail en doadoahngki dipwisou kamarain pwukat ni pwung pwehn kadehdehki Koht Sahm Soutik, Sapwellime pilahn en popohl ong Sapwellime seri kan, oh Sapwellime Iehros, Sises Krais, Sounkomour en Sampah.” —Elder David A. Bednar³

Inderned kin mweidohng kitail en ehukihong rongamwahuo ohng sampah pwon. I pwungki mwo! I kasalehda soangen wiepeh kei ong kapokon lap, ahpw pali tohto I kin song sewese mehtei kan wiahda ehu koaskoasoaipene sang ni padahk kan en kapokon lap. Kilang peidek kan sang mehtei kan kin kak sewese kitail en kilang soahng kan nan marain kapw oh kak en wia ehu wasa ong pein atail peidek kan me kitail kin peihn koadkoadoaroapwe.

I diarada me ma kumwail doadoahngki peidek kan pwehn koaskoasoaia duwen padahk kan en kapokon lap rehn peneinei kan me kumwail kin papah, e pahn sewese kumwail en kak kilang arail roson oh pil arail anahn akan. Ehu ahi peidek me I kin keieu pereniki idek iei, ia ahmw pepehm me wia poahsoan en oaralap sang nan tiepene en kapokon lap me apwtehn neko?

Pasapengo kin kerenieng ansou koaros kasalehieng uhk dahme kin wihwiawi nan arail mour oh dahme kesempwal ong irail. E kahrehiong uhk ke en wiahla sounpapah mwahu pwehki ahmw kakehr kilang irail ni sansal.

Camille Gillham, Colorado, USA

Iren Madamadau kan

“Ehukihong mehteikan rongamwahuo”

Kitail inoukidahr en “wia sounkadehde en Koht ahnsou koaros oh ni mehkoaros, oh wasa koaros” (Mosaia 18:9).

“Wiahda mehn koaskoasoaipene”

Mahsen akan en kapokon lap kak elehda koasoai kan me kaselel, pahrek, oh diren ngehn sarawi. Oh soangen wiepen koaskoasoaipene pwukat kak kakehlaka amwail ehupeneh kan, sewese amwail kadehde en kehlailla, oh wahdohng kumwail popohl! (kilang Doctrine oh Covenants 50:22).

“Doadoahngki peidek kan”

“Peidek mwahu pahn sewese kumwail en wehwehki dahme mehteikan kin pereniki, arail pwunod kan, oh arail peidek kan. Irail kak kakehlaka amwail padahk, luke Ngehno, oh sewese aramas akan esehla.”⁴

© 2020 sang Intellectual Reserve, Inc. Kolokol pwuhng koaros. Intingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwe en Padahk kan en Doadoahk en Papah, Epreil 2020. Pohnpeian. 16986 885